恐龍仔@兩歲半

呢編blog寫早咗.. 因為呢排恐龍媽休養中~

恐龍仔最近好易病, 病親都氣促, 咳到死吓死吓, 上次搞到照肺+聞氣, 今次好d, 医生一見佢咁就落氣管藥, 藥到病除, 不過要食消炎藥一個星期, 又要諗: 返唔返學好.. 唉~

係呀~ 人仔有氣管敏感, 恐龍媽試緊魚油, 希望會好d啦~

近來~ 恐龍仔終於識跑同跳, 仲有跳舞時可以同時舞動手腳!

英文~ 會嘗試讀一大段嘅文字, 之前望都唔望架!

中文~ 原來<基礎漢字500> 1-4 裡面大部份嘅字已經識! <我自己會讀> 睇緊第二輯喇.. 又要準備下一輯喇!

普通話~ 聽聞恐龍仔上親普通話堂都坐唔定, 老師問過恐龍爸: 佢响屋企係咪都係咁!
鬼咩~ 佢都唔知老師講乜!
不過最近又有奇事發生: 話說<基礎漢字500>裡面有普通話拼音, 恐龍仔經常要大人讀俾佢聽! 一路諗住留番俾老師教, 廢事自己教壞哂啦, 點知最近扭得好利害, 讀俾佢聽啦...今朝, 恐龍仔攞住本簡體字+拼音嘅故事書講咗起嚟! 咁當然唔多啱啦, 但係都有d紋路, 重要嘅係精神可嘉!

數學~ 因為返咗學, 無時間打韆鞦, 所以數數字已經唔"興"喇, 最後一次數到15x~
加減數都計少咗喇, 不過答啱嘅亦都多咗~

其他~ 繼續熱愛planets, 除咗識背嘅九 or 八大行星之外(中英都無問題), 仲識得流星流星雨等恐龍媽唔知係乜嘅嘢!

最近仲學識度高磅重, 度高時會腳踭離地!! (呢個仔都係細粒架喇~)

last but not least, 呢個月開始返學就變得痴身, 扭得幾利害, 不過開始改善中, e.g. 已經肯講bye bye, 唔再喊哂喇!

返學.. 老師話佢乖, 阿嬏讚佢又乖又叻又靚仔.. 恐龍仔已經.. 變咗小甜心!