第五日自已返學

今朝換衫, 都係好似有少少唔願.. 不停叫住"爸爸媽咪帶"你"去.."

係呀! 我地一齊落樓搭車, 然後媽咪返工, 爸爸帶你返學~

到著鞋又無乜問題, 不過一路都好似心事重重咁嘅樣!

 

恐龍爸報告: 恐龍仔今日叻叻豬喎, 入學校之後, 回望爸爸一眼, 就自己行入課室, 唔駛俾d手手拉入去喇! 亦無喊喊喇!

hmm... 我地估, 其實佢唔係好捨得爸爸媽咪, 所以每次都偏咀眼濕濕... 但係又要學做大個仔架, 無計啦! 

加油呀!

----

老師報告 (@7:20pm) 恐龍仔好鍾意做手工, 好乖好聽話~

(聽到~ 當然開心啦!)

其實呢個星期, 真係好想好想多謝黃老師, 佢日日打嚟報告, 今日仲做到七點幾仲响學校! 知道好多學校連一個電話都無, 但我地已經收到一個星期嘅電話, 真係放心好多架!

另外就係見到恐龍仔d書~ 老師話要溫習喎! 其實都係d基本嘢 (A, 1, 紅色), 但係講出嚟好似好緊要咁! 好似大個仔喇!

睇返d書, 好似康傑嗰d仲深仲靚喎~  不過可能仲下學期嘅嘢, 無得咁比較啦~