Happy Day

因為哥哥要準備考試嘅關係，媽媽呢排成日同牛牛一齊出街街

街市嘅姨姨叔叔都讚牛牛乖

又定又唔亂搞嘢，仲主動幫手攞嘢！

今日同呢個人人拍咗大半日拖

佢要同 Mr. Bump Bump 拖手仔！

會話媽咪隻手凍，主動幫我暖手！

剪頭髮時會坐定定但好多表情！

去到探公公，大大聲話好掛住公公！引到公公好開心，仲要唔捨得走！

之後仲順路陪媽咪行美亞開倉，媽咪見到隻杯鍾意，仲話送俾媽咪做聖誕禮物！

呢個人仔真係氹死人！

Merry Christmas!!!!

恐龍家祝各位聖誕快樂，新年進歩！

聖誕禮物

恐龍仔早幾個月已經同牛牛講：我懷疑媽咪就係我地個聖誕老人！

~暈~

點解唔可以俾d童真呢？

一如以往，好多嘢想買，就係等聖誕，但濕濕碎碎...

好在！有嫲嫲大利是幫忙，恐龍媽多個大籍口shopping買嘢俾兩兄弟！

~哈哈~

而呢兩個細路話鍾意拆禮物喎

於是，恐龍媽攞d報紙出嚟... 有得拆就得啦！

佢兩個睇住媽媽包禮物，呢個世界真係唔係點駛驚喜

小朋友自己要記得扮驚喜先好！

數學比賽

難得參加數學比賽，諗住俾恐龍仔去玩下，無乜期望。
结果，恐龍媽識嘅小朋友都分别入到決賽，有—齊插小二嘅、有小—叩門嘅、有圍棋校隊嘅，仲有—直問恐龍媽選校意見嘅。

睇恐龍仔出嚟嘅心情，初賽同決賽都係輕鬆愉快嘅，你問佢，佢會好興奮咁話你知佢點答 (可惜我聽唔明！)

到一齊插小二嘅奧數人，佢兩次出嚟都話好深！有幾多條無答！

我再問仔，佢話全部答嘅

結果，係答唔哂嘅攞冠軍，即係一係識，一係唔識！

阿仔呢？佢呢次真係無限創意，乜都答得一餐！

哈哈

我鍾意咁喎，勇於嘗試嘛！

另一邊，小一組，聽聞題目同小二一樣

賽前我會覺得叩門人仔應該好勁，有人話我知有叩門生IQ極高，雖然我唔知係咪講緊同一個人仔，不過.... 就當係先啦！

點知，佢得第四/五名，而小朋友輸唔起，好失望！

反觀，呢位插班生同班嘅同學，之前同佢爸爸有d溝通，估唔到呢個仔都好強，好似攞到第二

我相信睇住自己同學攞獎盃嘅感覺應該唔太好受

係時候要學輸喇！

睇完呢d人仔，好慶幸我地已經走過呢d路

恐龍仔已經克服咗輸 (當然都會唔開心，但好快無事)

聖誕咭

今年玩自製聖誕咭

首先响angry birds 書scan 咗兩頁

兄弟各自揀自己想要範圍同設計

買靚咭纸同信封

印！

再俾兩個寫

希望收到嘅同学仔鍾意啦！

而牛牛，今年都收到好多好可愛嘅聖誕咭呀。

擦鞋仔

擦鞋仔
擦
鞋仔！

聖誕海報設計比賽

學校年年都搞聖誕咭設計比賽，年年d家長都玩得好大，贏嘅好多都大玩3D創作

當中有幾多係小朋友參與呢？！

所以，玩玩下都懶，上次參加係哥哥K3，牛牛PN

舊年無玩呀~

今年見主題改咗，變咗係海報設計，仲講明係平面創作！

好！又等我問下牛牛想唔想玩

佢就當然話好啦！

我隨便攞張紙俾佢起稿，問佢要有d乜

講下講下，就變成咁！
 

因為時間緊迫，即日買哂所有可能幫到手嘅嘢

呢度有唔同物料，買咗過百蚊架！

但一路跟住個初稿做，牛牛好開心，連我都好有滿足感！

完成喇！

我用咗最大嘅努力，忠於原稿架！

好滿足，我估參賽作品中應該絕少係小朋友自己嘅主意

更加唔好講成個設計係牛牛自己諗嘅

有無獎唔緊要，重要嘅係過程！

好開心呀！

Happy Day

話說，牛牛有個同班同學係住同一個屋苑嘅，而兩位媽媽响學期初已經相認。

佢兩個好好朋友，有時晴晴會約牛牛玩，有時牛牛會約晴晴玩，不過佢地成日唔記得咗同阿媽講，亦唔識得約好時間。

學校教師發展日，放假一天

牛牛話要約晴晴玩，佢話自己約喎！

你兩個嘢，乜可以自己落街架咩？

呢次當然係媽媽出馬啦！

由9點玩到11點，兩個都唔捨得走！

多謝晴媽影低佢兩個玩嘅相！

見到都好開心，現場睇一定俾佢兩隻嘢笑死！

牛牛玩完仲要黃昏話喉嚨痛，唔去畫班！

~ * ~ * ~

最經典係，有日佢話：我係小白菜 (我姓蔡架嘛！)，要有太陽先可以生長......

我好驚訝，點解我個仔識講d咁嘅嘢？！

仲要咁鬼浪漫添！

而佢兩個仲要都係四月出世，嚟緊响學校會一齊開生日會！

開心死！

Positive parenting for gifted children

是日聽書

成堂不停講感恩

到底，係要教小朋友感恩

定係家長應該感恩，所以唔好要求咁高呢？！

唉~

吳大琪教授講座

吳大琪教授，係香港資優教學學苑嘅院長，講座中佢話:
大部份人会認為資優生已經係幸福嘅—群，上天賜與佢地嘅嘢比其他人多，唔應該去問政府攞資源！其實，資優生諗嘢方法與别不同，正因為呢D不同，佢地耍面对好多問題，例如情意教育係讓佢地正面咁面对呢D不同;校外課程除咗俾嘢佢地学之外，更重要係認識同類，揾到被認同嘅感覺(我唔係怪物!)。。。。嚟緊最大嘅任服係令資優教育学苑生存落去，揾支助！

聽完好感慨，資優同其他特殊学習需要(SEN)—样，係要人幫架！但偏偏社会並不重視佢地嘅需要，就算学校嘅教育心理学家都只係忙於處理其他SEN...

FB 嘅朋友當中，好幾個係資優兒家長，有d真係幾個都好生性，上常悶得唔搞事！有d學術上只係中上，但情緒上落好大；有個好緊要分數，又係隨時爆煲類！而我嗰件.... 唉~各人有各人嘅問題啦！

吳教授嘅講話當中，提及聽話：家長覺得佢地唔聽話，其實佢地好有主見，佢地諗嘢嘅方法好唔同.... 另我諗起哥哥最鍾意同我講：媽咪呀~我真係唔識聽你話呀！

唉~

Miffy 兔仔

上遊戲治療簡介班，第一堂臨放學，老師話下一堂帶自己細個時鍾意玩嘅玩具

hmm...

有乜玩具都放唔到幾十年啦！咁玩喎！

我諗起屋企最老嘅bear bear (牛牛叫佢做老bear，現年18歲！)

但佢個尊容，唔係好見得人！

不如帶恐龍啦？

牛牛話唔好！要我帶Miffy~

但係白色嘅Miffy唔多靚女，玩到殘哂

於是，我諗起呢隻可愛嘅兔仔！

帶咗佢返工... 佢好想出嚟玩咁！

於是放咗佢出嚟~

嘻嘻

實在太可愛喇！

學校棋班

今日係第二堂。

第—堂，大家報棋力，以最细嘅恐龍仔棋力最低，但佢間棋院比較手緊，所以唔能夠咁比較。當中有—位小朋友剛升初段，導師經常讚許！

今堂，導師已經轉口，直指恐龍仔同嗰位小朋友响班中水平最高！
課堂中段，導師仲讚恐龍仔下棋無負擔，夠膽，放得開唔緊張，如果去比謇成績—定好！(今堂到不停讃恐龍仔！)

睇佢上堂，会周身郁，但專心，但積極投入答問題，如果平時返學都係咁，都已經好乖乖喇！

新屋again

又係超市送貨嘅日子，牛牛一見到就大叫：

I have a new home!

(教極都唔識講new house!)

臨瞓都要油一輪顏色，佢話佢間屋要係深啡色喎

之後，仲叫哥哥幫佢油

一轉眼，媽媽發現轉咗油漆師傅！

~哈哈~

第二朝一早，又繼續油！

兩個仲合力浪費膠紙！

哥哥返咗學，佢就搬佢嘅早餐入屋食

佢可能練緊縮骨功！

笑死我喇！

一時沖動下買嘅~~麵包機！

一直無買P仔，一來係貴，二來係我地已經有二合一焗爐

一直話有二合一爐，所以唔駛買麵包機，無地方，浪費

但心嗰句係：我知P仔勁，我個二合一焗廢廢地

一直想買慢磨機，已經睇中，等我每月一淘就有得玩

點知... 响FB見有人放二手機，只用過一次！

仲要响屋企附近交收，佢見我住咁近，直頭攞去我樓下

於是，我多咗件玩具喇！

急不及待，來一機先！

因為上次見d yeast無乜反應，呢次落多咗嚟試

第一機就出咗個高大威！

哈哈！

真係好鬆軟，隔日食都仲係咁軟熟！

配埋幫牛牛做功課而整嘅藍莓果醬！

yummy!!

Dinner @古朴年代

住嘅地方算係舊區，有村屋有唐樓

都係食街坊嘢嘅地方多

難得有間裝修同食物都似soho區嘅餐廳

最特別係有玩具玩！係用腦嘅，大人細路都玩得嘅遊戲！

哥哥要溫書，媽媽同牛牛去等位

人唔多，不過d位俾人book哂！

我地一邊睇書，一邊睇貓貓

溫咗兩日書，去鬆一鬆

食到好似萬聖節化裝咁！哈哈

呢間嘢食意大利餐，5點半前仲有all day breakfast食！

推介！

新書包事件

牛牛N班時，哥哥讀K3

所以哥哥個書包係可以留俾細佬用嘅

但係，學校轉咗新顏色，舊年牛牛K1老師無嘈 (佢地轉到頭都暈，嘈都生人跟進啦！)

但今年，老師一而再要我地換新書包，真係.... 

有d浪費！

於是，去EK搵，好快有，仲要係全新嘅！

承惠100蚊

睇落，真係爭好遠，連個校徽嘅高度都執過

唔知幾時，又會投訴牛牛件校服舊呢？！

體適能日義工

為咗支持阿仔，做媽媽嘅盡量安排到就做學校活動嘅家長義工。

呢次係半日嘅活動，全校學生都要參與，am / pm，我就跟住恐龍仔去咗pm，而我負責度高。

無咩特別，兩個鐘頭裡面可能度咗接近一百個小朋友，無乜特別...
過咗一半，突然諗：點解無人講"唔該"嘅？
當然，唔會亂講嘢啦~

身後嘅daddy突然讚小朋友乖，原來呢位小朋友係身後位義工收到嘅第二個"唔該"！

似乎佢比我幸運，但係.... 如果半日有500個小朋友，而佢同我加埋可能都有二百幾，咁... 會講"唔該"嘅咪只得1%？！

會唔會少咗d呢？

唉~
可能男孩子係無女仔咁識氹人啦~

故事哥哥時間

今日突然問哥哥：不如你同牛牛講故事呀？有貼紙獎...
佢好興奮咁答應，以往問佢都不情不願... 今次似乎有進步！

本來叫佢地俾媽媽靜下，點知一夠鐘，兩隻嘢攞住書走入爸媽間房！

初初都係講故事嘅

 <-- 不安份嘅腳趾 

講完之後，牛牛揀咗本遊戲書，兩兄弟就好開心咁尋寶喇！

之後 隻牛就開始心散，要玩喇！

不過呢，哥哥肯開金口已經唔錯，抵讚！

公益金便服日

上星期收到通告，問要唔要捐錢，恐龍媽一直以為捐錢先可以穿便服，隨口叫阿仔問老師，佢又隨口答我話無所謂。

星期一放工，恐龍爸比我早返，佢第一句就話：今晚你唔駛理佢d功課！

好~慳返！
但曳人揾唔到本補充練習，我去幫手，俾恐龍爸鬧！
我見到本手冊離奇地放咗書堆面頭...

之後阿仔話無帶手冊 (言下之意，好似解釋點解佢做哂d功課!)

我教去上網抄返，繼續唔理...

之後好似話原來老師有俾寫佢抄...

* * * * * *

今朝如常攞衫，叫醒曳人，俾衫佢換..
如常落樓去校車站...
當佢見到其他人穿便服，佢就開始發癲，點都唔肯上校車！
仲要怪我唔睇手冊！！！嬲爆！
姨姨氹、其他家長又講幾句，連司機叔叔都落車氹佢，就係唔肯上車！
唯有叫人開車啦！
佢一路慢慢行跟住嬲爆嘅媽咪..
返到屋企，我只對工人姨姨講咗一句：帶佢坐巴士返學！

嗰位曳人慢慢咁自己換衫..
仲要著住長白襪唔肯換！搞到七點正，出門口！
我好想好想佢遲到！承擔一下後果。佢自己都要負責，點解自己唔記得要穿便服？！

可惜，夜晚問返佢，7點半就返到學校喇！第時兩個一齊返學，真係坐巴士好過坐校車！唯一係怕日曬雨淋...

紙皮箱

印象中，恐龍仔不曾玩過紙皮箱！
面書中，總會見到有朋友把BB放入紙箱的相片，但我家沒有，不知為什麼。

這天，超市送貨後，工人姨姨閒放著兩個紙皮箱在地上，牛牛起床後看見，二話不說就爬進去！

他說：這是我的家！我要做一個新的家！

經過他的努力，這間房子有窗有門！

不得了！

Happy Moments

好鍾意見到佢兩個手拖手

而呢個情況並不常見

因為响街，就算哥哥都要拖實，咁佢兩個就無得拖手

仲有，有人仔成日發小脾氣，唔要哥哥！

只愛媽媽！

牛牛今次好興奮，好生猛！

牛牛經常令媽媽發笑！

~哈哈~

so cute!

為食人仔

打風，無無聊聊想搵d嘢搞下

於是整木糠布丁

叫兩個人仔整餅碎，落力非常！

到我打cream，佢兩個幫手"洗嘢"！

一人一支，好似食雪糕咁~ 

~yummy~

之後，連隻mixing bowl都唔放過

~暈~

家長教師會

通告係咁寫，有d confusing..

其實之前私校都試過，分班每科老師入嚟講幾句有乜特別要求，或注意事項。

其中一位老師話：佢地小二咋，仲好細，仲好BB，唔好諗住放手呀，麻煩你地要跟跟佢地d功課，有錯教返佢地，咁佢地可以改少d正，做少d功課！

唔~~好似有d問題，記得舊年私小老師一而再提醒家長要放手，要教小朋友自立，而小一係最佳時機！

另外，有老師表示，某補充習作學校定明係同學互改，但佢發現會好混亂，所以佢會自己改。但私校嘅小一生雖然4x人一班，但無呢個問題，小一要帶紅色鉛子筆返去改同學某d習作。

45人vs32人一班，點解少人仲多問題呢？！
係咪好似人地講："讀名校要家長陪讀"咁先得？！

首先，我地小一下學期已經只對有無做功課，唔太睇做得啱唔啱，要改正咪改囉，會有幾多？而且老師講一句好過我講十句，就連二線津小老師都認同我嘅睇法。

我相信係學生能力差異，令到老師嘅做法/諗法咁唔同，私小嗰班真係"你放手俾佢地做啦，佢地得架！"，就算初初成日錯，但慢慢就好。

好在，只係個別老師嘅要求....

另外，難得聽到全人教育，資優教育普及化嘅老校，原來都有參與某d科目嘅資優化課程試驗計劃，亦都話有抽離課程，甚至有level 3嘅校外支緩(舊生作mentor)，近年開始仲有talent pool！新校長真係做緊嘢！幾好~ 其實一路強調照顧能力不足嘅學生(包括經濟上)，但如果無資源俾資優，亦都唔公平，希望少少都好過無啦~

中秋猜燈謎活動

恐龍仔今日學校有猜燈謎活動，恐龍媽為表支持阿仔，同埋想睇同學們返學係點...

於是，報名參加咗家長義工，幫手是次活動！

今次認識咗d小一家長，個個都係重視小朋友教育嘅家長，睇嚟呢間學校競爭都唔細！

最開心就係見到班小朋友，好可愛，一個二個飛跑去排隊猜燈謎，見到佢地嘅笑面，真係好開心！哈哈~

不過有個傻仔以為媽媽會接佢放學，唔願上校車，搞到校車姨姨，同成架車都遲開，真係好好意思喇！

整作奶黄錎

恐龍媽自細就好鍾意食鹹蛋黃，而近年好興嘅奶黃月餅，帶少少鹹蛋黃嘅鹹香，好正！

~yummy~

一路都好想去望月學，但錯過咗兩年，今年去咗個團購班，但都係學d基本嘢！

係呀~我本身連d基本嘢都唔識架！

學咗，再上網search奶黃食譜，點知一揾就揾到望月喇！

雖然，師傅話佢年年都會修改少少嘢，不過唔緊要，試住先！

望月本身個食譜係奶黃包1/2隻鹹蛋黃

但我唔鍾意，於是改咗，整爛個黃，撈埋落去！

不過，都係仲有少少粒粒

試咗味，係我想要嘅味道，好好味！

而牛牛，連我倒落蒸盤時滴咗d糊落枱面都唔放過！佢話yummy喎~

希望佢聽日都話成個月餅好味啦！

食譜在此

Summer 2014 - 南丫島之旅

當大部份朋友仔都出國玩，恐龍家好苦惱：到底去邊度玩好呢？

假？無乜~

錢？唔多鬆動~

但總想俾d細路覺得有去過玩，有放過暑期！

放事，就計劃咗呢個沙灘旁酒店之旅

簡簡單單

但呢兩隻人仔真係玩到唔願走！鬼叫平時無乜機會帶佢地走沙灘咩！

首先，香港邊度沙灘旁有酒店呢？仲要個沙灘要OK靚嘅！

係酒店，唔係渡假屋！

其實唔多，呢度叫洪聖爺灣！水同沙嘅質素都very good!

佢兩個玩咗好幾次！朝早同黃昏都玩齊喇！

難得影到張合照！哈哈~

第二日等到恐龍爸起身，我地去咗行山

首先去咗睇大風車

沿路好多大大個嘅蜘蛛網，當然仲有大大隻蜘蛛啦！

兩隻小鬼一路行，一路鬥揾得多蜘蛛網！

而牛牛就一路攞住佢响酒店餐廳見到由樹上跌落嚟嘅楊桃

佢個樣幾神氣！

之後，我地再行去索罟灣，路中回望發電廠，好靚！

去到索罟灣，食午餐，食完啱啱開咗班船，想懶d唔行返轉頭都唔得！

但午後仲係好曬，我都去咗圖書館！

休息咗大半個鐘，仲要抬幾本書返歸！

呢度d書好新淨，雖然藏書唔多，但本本都係熱門書！

我地借咗老鼠記者

走到咁遠借書，呢次絕對經典！哈哈~

想要讚下四歲幾嘅牛牛，無扭計，幾乎行足全程，一程要一個鐘架！

當然，哥哥都好叻，無乜投訴

第二晚，我地行返出榕樹灣食晚飯，好多謝恐龍爸陪恐龍媽食素！

第三日，Hea住咁出返香港，完成呢個3日之遊，兩個小朋友都好鍾意好開心！

仲問我幾時而嚟添！

新生家長日

今日嚟到一個新環境，感覺到有座無形嘅氣牆，聽講呢d叫Spirit~~

我自己係屋邨無人願讀嘅小學長大，上地區英中，再去新校讀預科...雖然家兄中學入到名校，但在我，我未感受過嗰份歸屬感，我覺得好陌生，無所適從..

校長同老師們要講嘅嘢，令我覺得好認真，呢度唔只係一間學校，我地嘅身份唔係過客，而係要將學校嘅名字變成生命嘅一部份！

學校嘅目標好明確！响呢度，讀書唔係最重要，但絕對非常重要！

孩子自己要適應，我作為家長，相信要適應嘅亦唔少，特別係嗰度無形嘅氣牆，係我無想像過嘅！

好在呢度有好幾個我認識嘅人...

我會緊記點解會行呢步，再大嘅壓力都要正念面對...

希望舊校俾到我地嘅平和溫暖感，呢樣都有機會遇到！

自家冰皮月餅

買咗材料，就當然要擇日開工啦！

今日媽媽早放工，所以返到去就撈好粉，食完飯就開工！

可惜哥哥掛住玩無練琴，所以...

唯有佢練琴，我同牛牛自己包月餅啦！

呢個人仔，手好快，搶住嚟！

真係唔睇你點搞，佢已經~搞掂！

笑死人！

手快到我影唔切！

不過，一如我所料，唔太鍾意食！

我覺得呢隻皮有d膠味！

下次要試試韋太個食譜先得！

酥皮奶黃+冰皮月餅班 2014

舊年已經想去望月學藝，點知遲咗..

今年，都係遲咗！

唯有去其他地方學啦，响團購見到呢個班，地點內容都OK，就報名！

地方算大，四張大枱，每枱八人，其32人！

無食譜派(email俾)，導師都講得快，無乜點教細微位

好似皮包餡個手點轉...

佢轉得好靚呀，不過我學唔識！

其實好似唔難，但要靚，一定唔容易

你睇d同學仔，又高又矮！

完全圖！

第二日就去咗油麻地買材料，仲買咗兩set 冰皮set，老板話佢自己d嘢好食過人地喎~

試試先！

希望兩隻人仔鍾意玩啦！

可憐的豬手！

有日，恐龍仔去咗自己棋院比賽

呢次有其他國家選手參賽，所以d獎都靚d，係水晶獎座。

有人攞咗自己個獎之後，唔知點解跌咗落地，然後心急去執！

到媽媽去接仔時，佢啱啱叫止咗血！

但傷口好似好深下！！

但可憐豬仲要俾醫生洗傷口，痛死佢呀！

真係豆大嘅眼淚，一滴滴咁滴落媽媽隻手臂！

唉~

當日已黃昏，阿媽懶，無即時去聯針，第二日洗傷口發現唔多對路

於是上仁安聯針，急症醫生話要入院

骨科醫生話嗰個位多神經線，如果有碎片會好麻煩

又話8歲先可以局部麻醉入手術室

講咗一大輪，即係要聯針就要全身麻煩！

下午四點幾，你叫我點搵醫生？問好唔問好？出院仲有無得claim保險？！

唉~ 問完，雖然大家都話唔好做全麻，但又唔確定一定去到有得聯針

算啦~就咁...  就第一次全麻！

辛苦你喇~阿仔！

佢出嚟之後嘔咗兩次，都瞓到，第二朝已經掛住玩，食到！

但隻手就包到豬手一樣！

不過第二日去醫院就換返簡單dressing

呢個星期，有人唔駛學琴、唔駛游水喇！

重用膠水樽 小心傷身

copy from 明報

事實上，每種塑膠都有不同特質，今次為大家介紹的是「1號仔」PET（聚對苯二甲酸乙二醇酯），以及「2號仔」HDPE（高密度聚乙烯）。PET是生活中常見的一種樹脂，韌力強；而HDPE密度較高，更為耐熱，兩者各有優點，因此在日常生活被廣泛應用。

遇熱變形釋有害物質

PET的特點在於其優良的堅韌性，能夠抵受衝擊，加上重量輕，因此多被用作製作膠樽，我們日常生活所見的「保特瓶」正正是PET的譯音，多用作盛載礦泉水及汽水等飲品。除此之外，PET絕緣性高，因此也被用作齒輪等電器零件。

至於HDPE則比PET更耐熱，能夠抵受高達130℃的高溫，而且化學穩定性好，對於酸性和鹼性的抵抗力都十分強，因此在生活中應用甚廣，通常用作盛載清潔劑、洗髮精甚至農藥等化學物料，以及製作膠袋之用。外觀上，兩者最大分別在於PET瓶通常是無色透明，HDPE則大多是不透明的塑膠瓶。

有趣的是，塑膠回收後的用途十分廣泛，例如德國的回收公司把PET廢瓶回收，壓碎後出口至中國，用以製作毛衣，由於成本低廉且利潤豐厚，成為了一個龐大的二手原料市場。至於HDPE由於容易加工，而且其用途極為廣泛，成為了回收市場上增長最快的塑膠之一。然而，在香港塑膠回收工作一直面對不少限制，令我們的發展比其他地區遲緩。因為塑膠易受污染，處理及回收的成本相對高昂，而且不同種類的塑膠混雜一起，難以分解，增加了回收的難度。為塑膠容器訂立編碼，正正是希望令分類更方便，進一步推動塑膠回收業的發展，長遠更可達至教育大眾的作用。

長期擺放可釋致癌物

PET及HDPE用途多多，但應用不當的話隨時對健康有害。

由於PET不耐熱，盛載高溫液體會變形且釋出有害物質，因此只適宜盛載冰凍飲品。此外，長期擺放PET瓶可能釋出致癌物質，因此切忌不斷循環再用，例如用作水杯等。至於HDPE瓶，雖然可以重複再用，但由於多用作盛載化學劑，清潔得不徹底的話，殘存物質對人體一樣有害，各位要多加小心。

香港教育學院「可持續發展教育中心」 鄧文靖博士

我們的天空——望子成龍

有朋友睇咗呢集無線電視嘅節目，恐龍家基本上係唔睇電視嘅，但睇見人地討論，自己都好想睇，好想知道自己算唔算癲 (雖然，我唔會話自己係虎媽，亦真係見識過一d好瘋狂嘅媽媽！)

用咗午飯時間睇咗，真係覺得個Dicky仔好慘，連身邊應該保護佢嘅父母都信唔過！

反而，我覺得恐龍家似另外個家庭，而呢個阿媽的確有時會動搖，見到人地咁咁咁做，覺得我無咁做，浪費咗個仔嘅機會，試過想"補救"，但係又懶.... 係呀！其實我好懶！

而恐龍仔，的確係每日返屋企做完功課就玩玩玩！然後考第二嗰個！

好在，呢刻已"上岸"！

但諗返另一位同校同學，我諗，我都係一個想教好個仔，然後等上天安排嘅媽媽。我好阿Q，但呢個係我減壓方法，亦係我平時處事嘅態度。

雖然，有人話呢d叫大口氣，輸咗都當自己贏！

係呀，我個仔係後選！但係，我地已達到目的，人各有志，人棄我取，都要我夠班先得！而且，事實係叻仔多過位，學校好簡單，睇獎！

如果你睇到呢度，覺得要快d谷獎嘅話，你就錯哂！插入名校嗰班，小朋友本身能力好高，家長責任係去報名同俾機會佢地去試自己實力，我都見好幾個好似我一樣隨緣嘅家長，亦有為獎越級挑戰嘅，而搵到小朋友亮點好重要！大家都係興趣行先！無勉強過~

資優兒成才十原則

去咗資優教育學苑聽個雞精講咗，點解話佢雞精？因為呢真個原則，夠講十個鐘，但要個半鐘收場，就只講咗一半，好過無啦！

不過有書仔派，可以返屋企慢慢睇~

當中有個小故事比較深刻
第一屆DSE有位智商147嘅男孩，佢覺得唔係一定要讀大學，某某同某某名人都無讀大學啦！佢有2-3個5**，但無報JUPAS，攞完成績就走去學整包！最終導師出馬加家長努力下，第二年入番本地大學讀書。
好怕我屋企嗰個諗埋一邊~~真係無命！

仲有一樣，就係科學上已証實，資優基因埋响X chromosome，男孩子嘅X由媽媽嚟，較易突顯出嚟，而女孩子就由父母各取一個X，相對拉番平均，講者話：响呢度嘅媽媽都好醒！(哈哈~)

可惜，我EQ有限，亦無能力每日鬥知鬥力！
所以我要上堂聽書！

英文版全文：
http://ge.hkage.org.hk/files/parents/publications/Ten_Rimm_Canons_of_Achievement_for_the_Gifted_ENG.pdf

知道結果之後...

當然係開心啦！

更高興嘅係得到好多好多人嘅恭賀說話！好多人鄧我地開心！
甚至係我唔認得嘅EK會員，都pm或响某d post中恭喜我地！
好多謝所有人嘅鼓勵同祝福！

FB上面有超過60位朋友讚好！

真係鬆一口氣，一天都光哂，唔駛再為牛牛小一而煩惱，當然仲有...
係呀~ 一次過滿足三個願望！
慳返恐龍爸d錢，希望我地一家四口遲d有機會去旅行啦！
牛牛都未坐過飛機...
哥哥四歲時都跟過爸媽去台灣！
不過呢個暑期飛唔到喇，希望之後有機會啦！

家長們之間嘅一段對話

事原，有位家長响FB讚姚老師, 引起以下對話...

還有兩天便告別幼稚園生活，我替她有點不捨得。但意想不到的是，她遇到一位很好的班主任，百忙之中還為她的學生做了畢業卡，這一年中我跟太太問了大大小小不少問題，她亦耐心一一回應幫忙解決！多謝您，姚老師！

我：唔知姚老師嚟緊9月跟邊班呢？我好想牛牛跟佢呀！！！

家長A: 最好教K1xx班！

我: 同我爭！ 

姚：牛牛是k2的＾＾

我：K2xx好d！姚老師識牛牛？！

家長B:不如姚老師去教小學啦XD

家長：我答先，K1xx

我：你都嚟爭！哈哈~~~~

家長B：姚老師睇住我家哥哥大架XD

姚：哈哈，小學有點難度＾＾

姚：牛牛每日經過我課室，我問佢哥哥放暑假未，佢話放左，我叫佢同哥哥講……姚老師掛

住佢，叫佢返黎探我，牛牛偷笑

家長A：姚老師，K1xx啦

家長A：B， 生多個先同我爭。


我： 姚老師教高年班架！

我：K2CA好！牛牛係個開心果！N班時班主任曾經好肉緊咁同我講：佢真係好得意架！

姚：哈哈，k1至k3都教過，要睇校長安排＾＾

家長A：我可以講，牛牛得意，絕對不及我家妹子可愛。姚老師，要我妹妹啦！

..........

只能夠講，呢班家長實在太可愛喇！