朋友仔

哥哥用咗好長時間適應新學校，一路都係比私小分數較高，直至2015年尾，佢終於話鍾意津校！

呢件事背後重點，係佢揾到個朋友仔！

一直以嚟，轉校適應都令我好擔心，呢個人仔社交能力較弱，又無禮貌，真係得罪人多，稱呼人少！

今日接佢放興趣班，佢急不及待同我講：我今日好唔開心呀~ 我害到同學俾老師罰！

細問之下，原來小息打鐘之後，佢問好朋友攞佢地本遊戲簿出嚟，老師見到就收咗，仲話要叫媽媽寫信先會俾返佢 (我估老師一直對呢本簿好有興趣，想睇好耐~) ，而哥哥有即時講sorry~ (呢樣好好緊要！)

其實我好驚好似上次搞到訓導主任嗰度，好在今次只係班主任，於是，幫佢跟朋友媽媽講句好說話...

幸好對方媽媽都覺得好小事，重send咗d佢兩個出雙入對嘅相我睇！

仔呀~ 好開心見到你揾到朋友仔~ 要好好珍惜呀！

敏感兒 Highly Sensitive Child

有無聽過有本書叫《孩子，你的敏感我都懂》？
我想講嘅敏感唔係Allergy，而係sensitive，跟係小小嘢，大大反應！

我家有個敏感兒，要處理佢日常生活其實唔太難，但一有少少改變，就算只係落雨濕咗少少嘅褲腳，又或者有粒沙入咗鞋... 佢一定唔能夠忍耐，而我就要立即處理！

因為呢樣嘢，我試响YL嘅谷內問人，但到一d好好嘅分享！而我問嘅時間，正值係大少感冒中後期，我面對完一個好多投訴，但樣樣都唔俾我幫佢做嘅麻煩人！

首先，面係碰不得！其次，不可用薄荷！

我通常係開稀精油搽背或心口，再加腳仔，麻煩人通常只會俾1-2個位置我，有時仲要係零！當佢作嘔作悶時，我上網揾過，試peppermint+lemon+thieves，先俾佢聞lemon陣味，佢接近喇，就擰轉背開好先搽，唔俾佢聞到薄荷！佢好快舒服返，之後再試都OK，但第二日又唔俾！就連腳仔都唔俾掂。問佢要唔要糖仔？佢都話唔要！

無駛佢符！

就係呢個時候，我上谷問喇！真係投哂降！

結果，引嚟一位同樣家有火星人嘅會員，佢建議用Gentle Baby 安撫佢嘅敏感，佢用响自己孩子身上係每日三次。

當晚放工，麻煩人已退燒，但鼻塞嚴重！瞓唔到覺！唔俾搽油，唔接受幫助，自己响度喊.... 我同佢講：喊咪仲多鼻水，仲塞？！
最終，有限量俾我搽背....
但唔work.... 咁點好呢？我醒起Gentle Baby！
本來响房diffuse緊RC (呼吸道)，加咗幾滴Gentle Baby，唔理佢鼻塞聞唔聞到喇... 然後，經批准下，滴咗一滴去佢頭頂，然後我再摸佢頭仔一下...
我就出咗房，要做嘅都做哂喇，淨返落嚟就係要佢自己經驗下超級鼻塞呢樣嘢喇....
起碼，佢平靜咗d先...

過咗一陣，爸爸入去睇佢，已經瞓咗~

好喇~我有覺好瞓喇！

數學比賽

難得參加數學比賽，諗住俾恐龍仔去玩下，無乜期望。
结果，恐龍媽識嘅小朋友都分别入到決賽，有—齊插小二嘅、有小—叩門嘅、有圍棋校隊嘅，仲有—直問恐龍媽選校意見嘅。

睇恐龍仔出嚟嘅心情，初賽同決賽都係輕鬆愉快嘅，你問佢，佢會好興奮咁話你知佢點答 (可惜我聽唔明！)

到一齊插小二嘅奧數人，佢兩次出嚟都話好深！有幾多條無答！

我再問仔，佢話全部答嘅

結果，係答唔哂嘅攞冠軍，即係一係識，一係唔識！

阿仔呢？佢呢次真係無限創意，乜都答得一餐！

哈哈

我鍾意咁喎，勇於嘗試嘛！

另一邊，小一組，聽聞題目同小二一樣

賽前我會覺得叩門人仔應該好勁，有人話我知有叩門生IQ極高，雖然我唔知係咪講緊同一個人仔，不過.... 就當係先啦！

點知，佢得第四/五名，而小朋友輸唔起，好失望！

反觀，呢位插班生同班嘅同學，之前同佢爸爸有d溝通，估唔到呢個仔都好強，好似攞到第二

我相信睇住自己同學攞獎盃嘅感覺應該唔太好受

係時候要學輸喇！

睇完呢d人仔，好慶幸我地已經走過呢d路

恐龍仔已經克服咗輸 (當然都會唔開心，但好快無事)

故事哥哥時間

今日突然問哥哥：不如你同牛牛講故事呀？有貼紙獎...
佢好興奮咁答應，以往問佢都不情不願... 今次似乎有進步！

本來叫佢地俾媽媽靜下，點知一夠鐘，兩隻嘢攞住書走入爸媽間房！

初初都係講故事嘅

 <-- 不安份嘅腳趾 

講完之後，牛牛揀咗本遊戲書，兩兄弟就好開心咁尋寶喇！

之後 隻牛就開始心散，要玩喇！

不過呢，哥哥肯開金口已經唔錯，抵讚！

公益金便服日

上星期收到通告，問要唔要捐錢，恐龍媽一直以為捐錢先可以穿便服，隨口叫阿仔問老師，佢又隨口答我話無所謂。

星期一放工，恐龍爸比我早返，佢第一句就話：今晚你唔駛理佢d功課！

好~慳返！
但曳人揾唔到本補充練習，我去幫手，俾恐龍爸鬧！
我見到本手冊離奇地放咗書堆面頭...

之後阿仔話無帶手冊 (言下之意，好似解釋點解佢做哂d功課!)

我教去上網抄返，繼續唔理...

之後好似話原來老師有俾寫佢抄...

* * * * * *

今朝如常攞衫，叫醒曳人，俾衫佢換..
如常落樓去校車站...
當佢見到其他人穿便服，佢就開始發癲，點都唔肯上校車！
仲要怪我唔睇手冊！！！嬲爆！
姨姨氹、其他家長又講幾句，連司機叔叔都落車氹佢，就係唔肯上車！
唯有叫人開車啦！
佢一路慢慢行跟住嬲爆嘅媽咪..
返到屋企，我只對工人姨姨講咗一句：帶佢坐巴士返學！

嗰位曳人慢慢咁自己換衫..
仲要著住長白襪唔肯換！搞到七點正，出門口！
我好想好想佢遲到！承擔一下後果。佢自己都要負責，點解自己唔記得要穿便服？！

可惜，夜晚問返佢，7點半就返到學校喇！第時兩個一齊返學，真係坐巴士好過坐校車！唯一係怕日曬雨淋...

中秋猜燈謎活動

恐龍仔今日學校有猜燈謎活動，恐龍媽為表支持阿仔，同埋想睇同學們返學係點...

於是，報名參加咗家長義工，幫手是次活動！

今次認識咗d小一家長，個個都係重視小朋友教育嘅家長，睇嚟呢間學校競爭都唔細！

最開心就係見到班小朋友，好可愛，一個二個飛跑去排隊猜燈謎，見到佢地嘅笑面，真係好開心！哈哈~

不過有個傻仔以為媽媽會接佢放學，唔願上校車，搞到校車姨姨，同成架車都遲開，真係好好意思喇！

可憐的豬手！

有日，恐龍仔去咗自己棋院比賽

呢次有其他國家選手參賽，所以d獎都靚d，係水晶獎座。

有人攞咗自己個獎之後，唔知點解跌咗落地，然後心急去執！

到媽媽去接仔時，佢啱啱叫止咗血！

但傷口好似好深下！！

但可憐豬仲要俾醫生洗傷口，痛死佢呀！

真係豆大嘅眼淚，一滴滴咁滴落媽媽隻手臂！

唉~

當日已黃昏，阿媽懶，無即時去聯針，第二日洗傷口發現唔多對路

於是上仁安聯針，急症醫生話要入院

骨科醫生話嗰個位多神經線，如果有碎片會好麻煩

又話8歲先可以局部麻醉入手術室

講咗一大輪，即係要聯針就要全身麻煩！

下午四點幾，你叫我點搵醫生？問好唔問好？出院仲有無得claim保險？！

唉~ 問完，雖然大家都話唔好做全麻，但又唔確定一定去到有得聯針

算啦~就咁...  就第一次全麻！

辛苦你喇~阿仔！

佢出嚟之後嘔咗兩次，都瞓到，第二朝已經掛住玩，食到！

但隻手就包到豬手一樣！

不過第二日去醫院就換返簡單dressing

呢個星期，有人唔駛學琴、唔駛游水喇！

面試日

收到面試通知，就當然要同個仔講聲，打定底先！

恐龍仔問：係咪有泳池架？
媽：係呀？舊同學仔讀嗰間都有呀~
恐龍仔：你唔係話有間乜乜乜收咗，無泳池架咩？
媽：係，不過嗰間無你讀緊嘅咁好喎~
恐龍仔：我唔要呀！唔要去呀！
媽媽一路數學校有咩優點...
恐龍仔：唔得呀！佢地d圍棋唔勁呀！
媽媽開始滴汗！
媽：好啦~ 咁我拆咗個泳池，咁得未呀？
恐龍仔：咁好啦~
(！！！！)

當日去到，好多細過恐龍仔嘅小朋友响度做緊運動，經友善嘅工友/家長帶路，我地去到校務處等，同我地一齊嘅，仲有另一位個子大d嘅"哥哥"。

等咗十幾分鐘，女職員叫咗恐龍仔入房見校長，5至10分鐘後，叫埋我地兩公婆，校長講俾我地知，先前同恐龍仔傾咗d乜，然後就要恐龍仔應承校長3樣嘢，先可以入學！

恐龍仔望住媽媽，唉~呢次難搞喇！
你眼望我眼一輪，校長俾我地出去商量，然後再講佢知，緊接住，就叫咗嗰位"哥哥"入去！
感覺上五分鐘左右，又再叫我地 (點解人地咁快嘅？！)，好彩呢次阿仔合作，滴住汗嘅恐龍爸媽如夢境中一樣，出去辦理入學手續！

Task Completed! Stage Cleared!
Next Level: P2!!!!

充滿驚喜嘅一日[下]

响牛牛學校門口，遇到同恐龍仔同期跟Sam Sir嘅小朋友家長，大仔入到男校，今日去幫細佬攞成績表。

到樓梯，遇到哥哥同班畢業同學家長，妹妹同牛牛一班，哥哥都係讀男校，傾咗幾句...

又會咁啱？！
個腦都唔得閒諗嘢，其實知道哥哥落選，唔多想見人~

上到樓上，都遇見另一位又係有兩兄弟嘅家長，又傾咗兩句...

------------------------

午飯後返工，响地鐵上，無乜電嘅手提響起，聽~
吓！！
男校打嚟~要見校長呀！！！

呢日係原本校長見新生嘅日子，我地得知同班同學係幸運兒，我地已經落選，叫了咗件心事，打算明天去買書買暑期作業，準備新學年，但係，原來佢真係唔去讀，補上嘅~係成績差唔多嘅恐龍仔！

傻媽媽响車箱內又喊又笑

仔呀~ 我知你係得架，總會揾到欣賞你嘅人！

終於到筆試喇~

感激所有祝福我地嘅人，為恐龍仔打氣嘅人！

近來，恐龍媽收到好多網友嘅祝福，因為阿仔收到電話要去考入學試！有人問入場卷資格，成績/獎項，有前輩提供個人經驗！

我覺得自己好幸福呀！

雖然，相信總有d人好似睇戲一樣睇呢件事~
但更多人係出於好意！
平時不厭其煩去幫人嘅恐龍媽，覺得好恩惠，好想多謝再多謝佢地！

無論結果如果，阿仔~you are the best!

入圍通知

記得年半前，網上見到有人收到男校第二次面試通知，好緊張~
舅父打嚟，表弟入圍，但我地仲未收到信...
最後，都唔記得咩原因喇 (好似封信打回頭，學校打返俾我地)，總之有份見校長，好開心好興奮！
我知道，恐龍仔係得架！3000人揀300個，應該有佢份！
最終，面試失敗，但只係無緣份，唔係無實力！

一年多後，一個有實力先可以入圍嘅筆試，又係見到網上有人收到電話通知，個心開始緊張！
尋日，恐龍媽帶仔去做健康普查，做完返歸，入電梯時電話響，對方响邊"嘟"咗一聲，好似junk call，返到屋企都無回電....
見人有我無，有朋友覺得不可思異！作為媽媽，有dd失望...我個仔...幾叻呀！
今日先知，原來係學校打嚟！原來我地都入圍呀！

恐龍爸收到通知，都緊張埋一份！
呢個遊戲到呢一刻，其實好睇阿仔自己能力去到邊，緣份呢家嘢....我地控制唔到喇！
但真心歡喜，又一次得到"入場卷"，都係一份認同！

仔！無論結果係點，媽咪以你為榮！

我最鍾意嘅人！

有日，有個貪得意嘅媽媽，突然蒙住恐龍仔對眼，問：你估我係邊個！

恐龍仔答：我最鍾意嘅人！

媽媽本來以為佢會答：媽咪！
但竟然係咁~開心死！

哈哈~

—個獎盃

恐龍仔自少唔識表達自己，好多時會令媽咪好嬲！

尋日生日，呢個仔無d表示，佢要求我接佢校車，我就趕返屋企，趕去落樓，再上樓換衫

但佢見到我都唔會笑，我要用電腦佢就掛住玩！

到我真係趕佢出房，我上到網查地址等，真係要出門口，先發現charge緊電嘅電話唔見咗！

嬲得我呀！！！

嬲到本應要去會所交錢報魔術師班(最後限期)，都唔記得，行到出屋苑大門醒起，嬲到唔行返轉頭！

今晚，同個仔講返件事，佢喊咗一輪，我只係想話佢知：媽媽好錫你，但你都要講d嘢，唔可以完全唔理人感受！

佢個傻豬粒聲唔出攞咗個獎盃入我房，然後又寫咗張紙：媽咪！

佢要將佢最靚嘅獎盃送俾我！

呢個仔，就係唔識得講嘢！

五月份比賽總結

3-4月已知，5月恐龍仔會好忙，好多比賽，而部份仲要撞期！

好似响九龍塘某女校搞嘅隊制賽，本來係唯一學校安排到報名，有機會代表學校出賽嘅比賽，但撞咗恐龍仔舊年攞冠軍嘅賽事，上天幫我地做咗個決定，就係因為預備鋼琴考試，2點先可能趕到返學校點半開始嘅選拔賽，恐龍仔話唔趕喇！

就咁，佢無緣去一場賽制可能有d唔公平嘅比賽

換咗個冠軍返屋企！

成個5月，攞到一個自家棋院比賽亞軍，一個大型公開賽季軍(小一+小二組)，兩個公開賽冠軍(小一組)！

仲有獎金$3500！

呵呵！

阿仔識揾錢喇！

經過呢幾個比賽，恐龍仔响小一組別實力應該屬頭幾名

以往輸過嘅，佢進步快過人，已經可以贏到喇！可喜~

級數高佢3級嘅，佢都係贏多，証明呢間棋院都真係幾緊！

100分！

第一個100分！

數學~佢最有信心嘅一科！

我地從來無懷疑過佢唔識

呢個100分背後嘅意義，

係恐龍仔終於認真作答

小心複卷，仔細寫字

繼續努力呀！

Smart Robot

呢個係爸爸送俾哥哥嘅生日禮物

但因為佢個樣似helmet pig，俾人搞到咁！哈哈！

但無呢個造型之前，好似曱甴！

佢好叻架，識得行迷宮架！

英文默書比賽

哥哥係學英文先嘅，之後都無乜點理佢d英文

估唔到學校有默書比賽，又俾佢贏到！

其實幼稚園年年都有認字比賽，我一路都唔明點解無獎攞，仲以為其實好多人勁過佢好多

都好~呢個係實力嘅表現！字庫強勁，phonics都唔錯！

保良局北潭涌營地~第二日

 

比賽第一晚，恐龍仔同恐龍爸留宿，免除舟車勞頓，但恐龍爸第二日中午就要離場，由恐龍媽接力！

呢度，恐龍媽細個時嚟過三次，分別係小五、小六，同中三。

總有d回憶... 

比賽分七個回合，恐龍媽到時已完成買局，二勝二負，成績比預期嘅理想！

因為對賽嘅多數係中國幾個城市嘅小朋友，佢地訓練嘅機會比香港多

預咗佢地叻好多！

每局差唔多兩個鐘，但越細嘅小朋友就捉得越快，半個鐘出返嚟，然後同佢四圍行！

 

呢度有唔同顏色嘅桃花！好靚呀！

而恐龍仔自己借咗部老爺單車踩，又OK喎~

之後開始落微雨，我地仲去踢足球！

比賽結果，3勝4負，名次中下，中上嘅全部係來自大陸嘅賽員~

預期結果啦！

呢度仲有一樣奇怪嘢，就係伙食！

中午大約一圍十人八席菜，除一碟朱扒之外，全素！包括素蝦、素肉、羅漢齋、腐皮卷。

到晚餐，一樣人頭碟數，但係得一碟菜！其他包括牛柳絲、白切雞、魚塊、朱扒、蒸蛋！

真係想問問佢個廚房：想點呀？！

 

Go go go~ 中國城市少兒圍棋賽

呢個唔再係本地比賽，有其他精英一齊，個個都大過佢，勁過佢

所以輸少當贏架！

 

大獎？

早幾日買咗一大Mr. Men，諗住慢慢送俾兩隻仔

見到哥哥都想要Mr. Strong，就同佢講：如果你測驗有95分以上，就送一隻Mr. Strong俾你啦！

哥哥：唔得！要99或100分先得！(當日剛測完英文，佢話應該有99或100分)

媽媽：點解呀？

哥哥：因為Mr. Strong 係大獎嚟架！

哦~原來大獎係大開心咁解！

到佢派英文測驗卷，好幾處唔小心扣咗分，但都叫夠分攞獎啦~

點知收到婆婆投訴：有人成日掉住玩！

到媽媽返到屋企，發現床頭櫃被打開過，已經一而再講，唔好入大人房搞搞震，但都係鍾意入嚟玩.... 見又唔聽，成日要人勞氣！咁點可能獎？！

於是，Mr. Strong唯有下次有機會先出場喇！

臨瞓，爸爸抱住人仔講道理，佢一路話自己唔開心，扁哂咀咁，於是媽媽靜靜攞咗Happy仔出嚟，正好，爸爸話：你知唔知道呀~唔開心係會傳染架....

唔知~開心會唔會傳染呢？  (出場！)

個傻仔即刻笑返！

不過呢份唔係俾哥哥嘅禮物！呢個係氹小朋友開心嘅Happy仔！所以要同牛牛一齊分享架！