海洋公園2016

我家嘅小孩好少去樂園玩，一嚟路程遠，二嚟價錢貴，三嚟...其實我地兩公婆都好怕人多嘅地方！

已經唔記得有無試過一家四口一齊去海洋公園喇！只知恐龍爸有個別帶過佢地，而我有同過牛牛參加學校N班海洋公園之旅。

兩個小朋友都好期待呢個旅程，因為係恐龍爸生日嘅優惠，我地當然要等爸爸瞓夠先出門啦！

到達時，已見到纜車因大風停駛，我地順步遊覽，無幾耐就見到纜車行返，兩個小朋友好興奮！不停咁話要去坐纜車~

等咗半個鐘左右就到我地，我呢個畏高人，好驚！最驚係中途停咗好幾次，大風到左右搖擺！好在~每次停嘅時間唔長，好快又行返....

跟住，哥哥同爸爸就開始玩一個又一個嘅機動遊戲！牛牛同媽媽就行一個又一個嘅展覽館，又食咗d嘢，終於等到哥哥玩完！

臨走，都仲要去威威嗰邊玩一轉，牛牛仲同哥哥+爸爸玩咗跳樓機！佢話有少少驚喎~

因為大部份嘅機動遊戲，牛牛都無份玩 (唔夠高)，所以呢個跳樓機對佢好緊要！佢覺得自己好叻，大個仔呀！

哈哈~~

牛牛要報小一嘛？

話說有次陪哥哥比賽，聽到其他同校校隊嘅家長傾開，先知大家都係叩門或插班入嘅！ 再傾，就係原來哥哥入咗，佢地都仲有幫細佬報一兩間直私小一，叫做人生經歷。 於是，我就諗：到底好唔好幫牛牛幫一間玩下？YW過咗喇，Hmm... KTS都好方便！ 同恐龍爸傾，佢無可無不可咁。 post咗FB問其他叩門/插班嘅朋友，佢地都有報或會報！都係俾個細嘅試下，其中一個話有朋友細仔最終因為性格同哥哥唔一樣，所以俾個細嘅入讀DB！ Hmm... 不過咁，當年哥哥係話面試辛苦，而且佢想同牛牛一齊返學，所以佢寧願自己辛苦D (講好，2-3間津校，兩年為限)，等牛牛可以跟哥哥一齊。 所以，我思前想後，覺得要問一下成件事嘅主角：哥哥！ 佢好大反應：吓？！咁咪浪費哂我嘅心機？！ 見你咁，我仲邊敢呀？！仔~

佢一路適應上唔太好，一路唔太開心，直至下學期4-5月先叫有朋友仔一齊玩，做阿媽嘅睇見都心痛架！但估唔到佢一路都仲記住當日同我講嘅嘢！ 好感動~ 佢個心其實好照顧細佬架！ 作為父母，當然"插班"唔單止有上面嘅好處，要嘅，當初揀入讀乙一就可以！深層意義上，仲希望兼顧埋哥哥嘅需要，睇見佢可以同一大班有相同興趣嘅師兄師弟，一齊出賽，一齊上台攞團體獎，相信除咗現時呢間學校，應該無乜津校可以俾到佢呢個經歷！ 希望你兩個都响呢間學校得到表現自己嘅經歷，建立自信！

之後，有晚同哥哥拍拖出街，我襯機同佢講：好想讚一下哥哥，知道你一路對自己講過嘅嘢都記响心，一定係mean it, 唔係講過就算 (佢點頭~) 我知你好緊張牛牛，好錫佢，我亦好開心見到你識得照顧家人，會為屋企人着緊，為大家做d嘢！ 佢一過點頭！ 孩子，我愛你呀！

Merry Christmas!!!!

恐龍家祝各位聖誕快樂，新年進歩！

聖誕禮物

恐龍仔早幾個月已經同牛牛講：我懷疑媽咪就係我地個聖誕老人！

~暈~

點解唔可以俾d童真呢？

一如以往，好多嘢想買，就係等聖誕，但濕濕碎碎...

好在！有嫲嫲大利是幫忙，恐龍媽多個大籍口shopping買嘢俾兩兄弟！

~哈哈~

而呢兩個細路話鍾意拆禮物喎

於是，恐龍媽攞d報紙出嚟... 有得拆就得啦！

佢兩個睇住媽媽包禮物，呢個世界真係唔係點駛驚喜

小朋友自己要記得扮驚喜先好！

聖誕咭

今年玩自製聖誕咭

首先响angry birds 書scan 咗兩頁

兄弟各自揀自己想要範圍同設計

買靚咭纸同信封

印！

再俾兩個寫

希望收到嘅同学仔鍾意啦！

而牛牛，今年都收到好多好可愛嘅聖誕咭呀。

新屋again

又係超市送貨嘅日子，牛牛一見到就大叫：

I have a new home!

(教極都唔識講new house!)

臨瞓都要油一輪顏色，佢話佢間屋要係深啡色喎

之後，仲叫哥哥幫佢油

一轉眼，媽媽發現轉咗油漆師傅！

~哈哈~

第二朝一早，又繼續油！

兩個仲合力浪費膠紙！

哥哥返咗學，佢就搬佢嘅早餐入屋食

佢可能練緊縮骨功！

笑死我喇！

Dinner @古朴年代

住嘅地方算係舊區，有村屋有唐樓

都係食街坊嘢嘅地方多

難得有間裝修同食物都似soho區嘅餐廳

最特別係有玩具玩！係用腦嘅，大人細路都玩得嘅遊戲！

哥哥要溫書，媽媽同牛牛去等位

人唔多，不過d位俾人book哂！

我地一邊睇書，一邊睇貓貓

溫咗兩日書，去鬆一鬆

食到好似萬聖節化裝咁！哈哈

呢間嘢食意大利餐，5點半前仲有all day breakfast食！

推介！

故事哥哥時間

今日突然問哥哥：不如你同牛牛講故事呀？有貼紙獎...
佢好興奮咁答應，以往問佢都不情不願... 今次似乎有進步！

本來叫佢地俾媽媽靜下，點知一夠鐘，兩隻嘢攞住書走入爸媽間房！

初初都係講故事嘅

 <-- 不安份嘅腳趾 

講完之後，牛牛揀咗本遊戲書，兩兄弟就好開心咁尋寶喇！

之後 隻牛就開始心散，要玩喇！

不過呢，哥哥肯開金口已經唔錯，抵讚！

Happy Moments

好鍾意見到佢兩個手拖手

而呢個情況並不常見

因為响街，就算哥哥都要拖實，咁佢兩個就無得拖手

仲有，有人仔成日發小脾氣，唔要哥哥！

只愛媽媽！

牛牛今次好興奮，好生猛！

牛牛經常令媽媽發笑！

~哈哈~

so cute!

為食人仔

打風，無無聊聊想搵d嘢搞下

於是整木糠布丁

叫兩個人仔整餅碎，落力非常！

到我打cream，佢兩個幫手"洗嘢"！

一人一支，好似食雪糕咁~ 

~yummy~

之後，連隻mixing bowl都唔放過

~暈~

Summer 2014 - 南丫島之旅

當大部份朋友仔都出國玩，恐龍家好苦惱：到底去邊度玩好呢？

假？無乜~

錢？唔多鬆動~

但總想俾d細路覺得有去過玩，有放過暑期！

放事，就計劃咗呢個沙灘旁酒店之旅

簡簡單單

但呢兩隻人仔真係玩到唔願走！鬼叫平時無乜機會帶佢地走沙灘咩！

首先，香港邊度沙灘旁有酒店呢？仲要個沙灘要OK靚嘅！

係酒店，唔係渡假屋！

其實唔多，呢度叫洪聖爺灣！水同沙嘅質素都very good!

佢兩個玩咗好幾次！朝早同黃昏都玩齊喇！

難得影到張合照！哈哈~

第二日等到恐龍爸起身，我地去咗行山

首先去咗睇大風車

沿路好多大大個嘅蜘蛛網，當然仲有大大隻蜘蛛啦！

兩隻小鬼一路行，一路鬥揾得多蜘蛛網！

而牛牛就一路攞住佢响酒店餐廳見到由樹上跌落嚟嘅楊桃

佢個樣幾神氣！

之後，我地再行去索罟灣，路中回望發電廠，好靚！

去到索罟灣，食午餐，食完啱啱開咗班船，想懶d唔行返轉頭都唔得！

但午後仲係好曬，我都去咗圖書館！

休息咗大半個鐘，仲要抬幾本書返歸！

呢度d書好新淨，雖然藏書唔多，但本本都係熱門書！

我地借咗老鼠記者

走到咁遠借書，呢次絕對經典！哈哈~

想要讚下四歲幾嘅牛牛，無扭計，幾乎行足全程，一程要一個鐘架！

當然，哥哥都好叻，無乜投訴

第二晚，我地行返出榕樹灣食晚飯，好多謝恐龍爸陪恐龍媽食素！

第三日，Hea住咁出返香港，完成呢個3日之遊，兩個小朋友都好鍾意好開心！

仲問我幾時而嚟添！

煤炭屎鬼！

一直想帶兩隻嘢去睇龍貓，一直無時間！

呢日終於一家四口去咗文化博物館搵煤炭屎鬼！

一地都係！牛牛超興奮，隻隻都話要影相！

牛牛唔識睇展覽，一味去畫煤炭屎！

好搞笑！

考完試去玩喇！

哥哥考試最後一日，牛牛學校放假，恐龍媽於是請假同兩個小朋友去街街

第一次去接哥哥放學，好緊張，場面都幾混亂，細小嘅飯堂位，企咗一百人以上！

接咗哥哥，就坐巴士出尖沙咀，架巴士都幾多人，無駛雙座位，有位伯伯於是坐去另一邊，讓個位俾小兄弟一齊坐！

哥哥隨口一句：唔該！

牛牛又跟住講：唔該哂！

老人家大樂！佢話唔駛人教，自己由心咁講，如果有糖嘅話，抵請佢食糖！

哈哈！

出到尖沙咀，我地去咗食壽司，中途恐龍媽收到通知，要返公司一轉，好在仲有時間，我地去咗碼頭的士站，打的返入沙田，中途的士司機搭咀，原來佢係沙田車，俾咗張咭片我地之餘，竟然响的士站上都打折！多謝哂！

快閃完成任務，由上司送我地去太空館。

哥哥坐車頭，人地問佢係咪好叻仔，佢唔識答，之後又話唔係！

哈哈~都啱嘅，咁難答！

開始過牛牛午睡時間，去到太空館開始攰喇！

哥哥同牛牛各自玩，然後我地就入場睇蝴蝶喇！

估唔到，搞搞震坐唔定嗰個係哥哥！牛牛就不停講嘢！

之後，去咗文化中心嘅coffee shop食d嘢，兩隻嘢又開始作反！走去一邊嘅各落玩！

中間，牛牛人有三急，哥哥仲識得帶細佬去揾洗手間！

真係大個仔喇！

兩隻嘢响文化中心跑嚟跑去，真係~失禮哂！

有d意外，原來哥哥抱得起牛牛！

最後，坐巴士去九龍塘同恐龍爸會合，食晚飯。

巴士站嘅姨姨望住兩隻嘢玩，笑哂！

巴士內同我地一齊坐四座位嘅乘客都撩我地傾計，呢兩隻嘢其實無停過，好嘈！

但d姨姨就係咁望住佢地兩隻嘢笑吓笑吓！有個仲問係咪孖嘅添！

(唔係呀嘛？！)

媽媽就俾兩隻唔聽話嘅小朋友激c咗！

不過，今日真係玩得好開心！

雖然有人返屋企時話唔開心.....

大澳遊

復活節玩D乜？
我地去咗大澳！坐咗半個鐘車，坐50分鐘巴士，再坐50分鐘過山車。。。
終於到喇！！！！
好辛苦，但風味又真係幾特別！
我最愛係墨魚餅，小朋友就最愛麥芽糖！

 

 

 

想讃一讃平時比較自我嘅哥哥。
今日回程途中，牛牛不支瞓咗，哥哥叫我除咗牛牛個背包，

我抱住根本除唔到，我亦唔明佢想搞乜！

跟住又叫我打開個袋，攞本書俾佢，然後又攞我袋側支水，

全部放入佢自己個背包裡面。。。
傻媽媽終於明白，原來哥哥想減輕我嘅負擔！
大個仔識得體貼他人喇！

Rio 2

復活節假第一日，去睇卡通！
小朋友好開心，睇完戲仲可以買埋故事書返屋企重溫內容！但響火車已經。。。。愛不惜手！哈哈！
呢本係哥哥第一本無插圖嘅故事書！加油呀！

台灣訂書

 

剛收貨，合時禮物！

台灣直送汪培珽書單好書~ (有幾本係我自己揀架~唔係全部都係書單好書~)
唔該哂Vicky 姨姨！
牛牛好鍾意佢d新書呀！
哥哥見到尖叫！

馬年進步

恐龍家祝大家
大吉大利
花開富貴
笑口常開
身體健康
新年進步

恭喜！恭喜！！

家教會大旅行@綠田園

呢日係哥哥學校嘅家教會大旅行，聽講係最多人參加嘅一次，差唔多有千四人呀！

咁多人，我地班小一生坐頭車有著數，就係去到第一個遊戲唔駛排隊喇！

之後度度都排長龍！

最好彩嘅係哥哥，第一個遊戲去咗坐船仔，我地有d擔心牛牛，所以無俾佢坐船仔呀~

扭咗幾聲，又OK喎！牛牛就去坐車車

而哥哥本來只可以玩10分鐘，但在水中央，無人捉佢，就咁~起碼玩咗20分鐘！

之後四圍行下

捉魚仔(我地好水皮！哈哈)

然後就開始BBQ喇！

首先，當然係餵飽d細嘅，然後到餵飽恐龍爸，跟住...

先到燒俾自己食！恐龍媽發現原來豆卜都可以燒嚟食，脆脆地，幾好食架喎！

仲有呢度d嘢食都幾好食！唔會過鹹。

兩個細路食飽就四圍玩，哥哥被好朋友"發現"，之係就兩個6歲小朋友嘻嘻哈哈

後面跟住個3歲嘅行出行入！

想用埋d代用卷，哥哥都唔願離開朋友仔

於是媽媽帶隻牛去玩電動車！牛牛好叻~d叔叔都擔心佢一個未必得

但係佢第一圈响完全無撞車之下完成！yeah!

最後，我地無坐大船仔

無得同朋友仔一齊走之下，上旅遊巴走，兩個小朋友都响車上勀到瞓覺覺Zzzzzz

都算玩得幾開心呀！

溫習週

放完聖誕新年假，哥哥開始有測驗，牛牛就要評估。
哥哥OK，自己睇—次，然後爸爸重點幫佢溫多一次。
牛牛認中文字經過爸爸毎日基礎漢字500，依經無乜大問題，但英文就只做到字圖配對，單認字就唔識！兒歌好多都無譜跟理，又溫唔到，爸爸有D唔高興。。。。

不過可愛嘅牛牛唔係蠢架！只係慢D，但有時睇完一個睇第二個，爸媽有時都會精神分裂！好辛苦！
今日爸爸帶咗Mr。Strong返嚟。。。獎勵牛牛！佢見到好開心呀！

Disney 兩日一夜之旅

十月已定下嘅奇幻之旅

一切都係嫲嫲嘅主意，因為佢份工唔可以放長假，只可以去玩個週末

嫲嫲話請d孫去當聖誕禮物

大人就自己俾

佢老人家唔揀有優惠嘅十二月中或之前，因為無氣氛

咁~我地就赤住去呢個奇幻之旅！

咁講~入到去酒店又真係好靚嘅

 

第一日午餐後坐車去，check-in再入園都5點幾，玩咗兩個遊戲，然後食晚餐，目標係睇煙花

但哥哥有d作病，個人好攰，佢食完飯就坐响度瞓着咗！

於是，恐龍爸媽抱佢返酒店！ 

牛牛就睇埋煙花先返去瞓！

第二朝，哥哥一早就醒，瞓唔到！搞住嫲嫲！

媽媽醒咗就捉佢出去玩

之後牛牛醒咗，同埋嫲嫲一齊又出去行迷宮

 

四圍行下

   

玩到差唔多，就退房，飲茶去！

  

然後先入園玩過

都唔係玩到好多嘢...差唔多時間就返酒店食自助餐

牛牛喊住話：我地嚟呢度係玩架！唔係嚟食嘢架！

哈哈！笑死我喇！

佢又講得幾啱架喎！

   

整體嚟講，都幾開心，係駛費貴咗d，無下次！