恐龍媽最近帶恐龍仔上咗3次音樂班, 發現有d問題, 恐龍仔好似坐唔定, 四圍走, 好鍾意老師注意佢, 好鍾意做老師, 仲有就係用自己方法去跟老師做動作! 即係識做又唔跟足嚟做 !
收咗另外兩間幼稚園offer之後, 終於的起心肝打電話俾恐龍仔個班主任, 想了解吓佢响學校上堂嘅情況, 係咪一樣坐唔定呢?
响學校, 好多時聽咗幾句老師講乜, 好快明, 然後就問問題, 或者行開搞其他嘢! 佢好有好奇心, 學嘢好快, 記性特別好!
咁會唔會影響老師上堂呢?
其實佢問問題, 其他小朋友可以學多d嘢, 係好事, 不過唔知其他老師會唔會唔鍾意佢行嚟行去, 班主任話, 佢覺得未係咁影響, 起碼佢唔係成日喊, 要老師安撫嗰d~
其實佢可能想引人注意, 所以成日爬上爬落, 又會拉d厠紙, 話佢就笑!
老師仲話..
佢講嘢好清楚, 記性好好..
恐龍媽都係擔心, 到底佢適唔適合傳統教學呢? 雖然話仲有幾年先升小一..
依家好多小學1-3年級都唔係真係好傳統架喇.. 會有project做, 唔係好似以前咁架喇! 而且仲細.. 慢慢適應啦~
Hmm.. 呢位老師答得好官腔~ 呢次收獲唔大.
都仲係有d苦惱, 又同恐龍爸傾咗一大輪, 結論都係: 唔轉好過轉!
好想搵到間學校 (遇到d老師) 唔會抑壓小朋友嘅好奇心, 同時, 佢又可以學習到要守規矩, 識得專重他人! 讀大班教學同較傳統嘅學校, 又怕會抑壓好奇心~ 注重creativity嘅又怕唔識守規矩! sell語文能力嘅.. 又好似偏重某方面咁~
最後耳邊又響起一些聲音叫恐龍媽好好栽培呢個仔, 到底.. 即係點做呢? 雖然話幼稚園收生無乜準則, 但係眼見兩間名校都收佢上午班 (我地講明唔考慮下午班架~), 個心其實好開心, 好似得到肯定咁~ 但係跟住點呢?
學音樂? 學跳舞? 學英文去考d公開試?? 畫畫? 仲有游水? 最好近近地~ 方便接送喎!
唔鍾意跟，自己行左去，或者鍾意用自己的方法做動作，應該係佢已經知道要做咩，覺得簡單，唔鍾意 repeat。我睇到佢上次行得好鬼遠，俾爸爸捉返黎，下次等我睇下點樣俾佢用自己方法參與啦。唔跟足唔係問題，又唔係填鴨，不過你講得o岩，要o係守規矩同 creativity 中間拿捏平衡，唔容易呢。 學咩 ? 我實話音樂架喎 ，佢鍾意學咩就咩都俾佢試下，再慢慢揀啦，more exploration is always good for a curious kid
回覆刪除[版主回覆12/09/2009 11:43:00]你有無興趣教呀? 不過我地打算出年足咗3歲, 上完呢期栢C先開始.. 唔係想谷, 只係想俾佢試試.. 睇吓有無興趣先!
豬弟同恐龍有啲似 老師又係話佢學嘢快, 但係又係坐唔定 老師今日仲叫佢聖誕聯歡上台表演 (釋放吓佢嘅表演慾 )
回覆刪除[版主回覆12/09/2009 11:45:00]總之就煩啦! 呆又煩, "精"又煩!
我今日見到恐龍呀!! 見到你個姐姐抱住佢去搭車.. 當時我o係小巴度, 打唔到招呼添
回覆刪除[版主回覆12/09/2009 13:49:00]放學時間响界限街?? 衰豬呀~ 要人抱!