長假.. 過後..

呢幾日長假, 我地推咗兩個party.. 不過節目都好豐富, 足夠攰到恐龍仔傻咗, 作息大倒轉.. 算啦~ 都預咗架喇, 好在仲有一個星期假, 只怕呢隻嘢掛住玩唔願瞓晏覺!

聖誕日, 我地去咗BBQ, 估唔到11點都未夠, 泥涌d爐就已經俾人霸哂! 我地嘅先峰Caroline姨姨轉咗去大網仔一帶.. 終於搵到個向海嘅爐! 玩到2-3點就返屋企瞓覺豬 (係一屋覺覺豬!) 瞓醒都差唔多6點喇! 又係食飯嘅時間!

Boxing Day, 節目係東莞馬術學校! 恐龍仔第一次出遊, 上到車就話要落車, 玩玩吓又話要返屋企! 影咗好多影~ 好可愛呀!  最後上車無幾耐就瞓咗.. 返到屋企飲支奶又繼續.. 最後瞓到5點幾!

27號, 恐龍仔上完音樂堂陪爸爸媽媽食埋午餐就返屋企.. 兩公婆拍拖! 估佢唔到~ 竟然唔肯瞓!!! 又買咗幾本書嚟講故事, 個傻豬等埋爸爸嘅story time先瞓.. 但係聽故事聽到想喊! 伊索禺言原來會整喊人嘅~

今朝~

恐龍仔8點先醒, 媽咪陪佢响床傾咗一陣計:

媽: 邊個最錫你呀?

仔: 媽媽同Auntie

媽: 爸爸都好錫SS架喎~

仔: 爸爸~ 仲有..

媽: 爺爺嫲嫲公公婆婆..

仔: 仲有姐姐!

媽: 係呀~ 仲有牛牛喎! 佢依家陪唔到SS玩, 所以送咗隻恐龍陪你玩囉!

仔: 多謝牛牛!

媽: SS好乖喎~

真係唔想返工! 望住呢隻仔乜都夠喇!

 

孩子, 願你永遠懂得珍惜愛護身邊嘅一齊!