寫聖誕咭

今年, 我地試吓寫聖誕咭。

之前已經寫咗俾公公婆婆、爺爺嫲嫲、叔叔姐姐、舅父舅母同表弟.. 仲有學校老師! 今日, 再問仲有邊個? 個傻仔話Auntie Elen 同埋Auntie Aida (兩個工人).. 咁仲有無同學仔?

恐龍仔一時時講到同學仔d名.. 就算d女同學已經講到"阿邊個今日响學校嘔", 恐龍仔依然連學校做過乜都答唔出!

恐龍仔話: 仲有弟弟!

恐龍媽指住個肚: 呢個?

恐龍仔: 係呀~ 牛牛呀!



之後.. 恐龍仔話仲有爸爸媽咪!

其實小朋友只係負責揀貼紙, 同埋貼上去! 仲有就係亂畫! 恐龍媽都會捉住手仔一齊"簽名" 嘅!



------
好在, 弟弟都有準備禮物俾哥哥!

同Sam Sir通過電話, 好多"仔"都過唔到呢關, 變得好痴身, 大倒退! 希望响恐龍仔身上問題唔好咁大啦.. 唉~ 呢排又扭計要媽咪陪瞓喇! 你話咁樣點敢諗轉校呀? 佢個世界會反轉呀!

提一提有老二嘅媽媽, 記得及早落藥呀! 俾小朋友知道要做大喇, 弟弟妹妹會好錫哥哥姐姐架! 係~你無睇錯, 唔係個大嘅要錫個細嘅, 俾人搶嘢仲要錫佢? 咪傻啦!!! 最多話弟弟妹妹會好錫哥哥姐姐, 咁哥哥姐姐都要幫手照顧弟妹呀~