奶奶與工人

今晚好唔開心..  其實幾乎見親嫲嫲, 心情都差d, 因為佢好鍾意訴苦/鬧人! 無乜開心嘢/無聊嘢講, 一問口就係d 負面情緒! 但係總覺得大家一齊就要傾計.. 每次都係得佢講無人講! 我都唔知自己係咪EQ低, 每次都接收唔少負能量!

我問恐龍爸: 我嫁俾佢係咪要聽埋佢阿媽訴苦?

心嗰句: 我嘅先後次序係自己同bb/阿仔, 跟住仲有老公同公公婆婆, 幾時得嚟有精力應付佢呀? 大肚婆要保持心境愉快架! 唔好响我面前發放負能量好無?! 唔彩你又嬲, 答咀又怕講多錯多~

唉~

-------------

事原, 我地一齊住咗8年, 舊年年尾因為種種原因, 決定安排兩老遷出, 今年4月終於成事, 恐龍仔可以响自己屋企自由活動! (孩子~ 幸福唔係必然架!)

但係爺爺嫲嫲仲有好多雜物放响原處~ 之前已經發生過一單"問過話咗唔要, 返轉頭嚟要搵"嘅事件~  今次係閉門失竊! 嫲嫲想幫叔叔搵返佢3年無掂過嘅一個舊袋(有牌子嘅)同埋一件皮褸!

搵唔到~ 唔高興, 就番舊帳! 仲有一支人參唔見咗喎!

我一路好信任個工人, 因為咁樣大家先會相處得開心, 既然交得個仔响佢手, 你對佢好d點都會係件好事! 相處兩年, 只唔見過一張新出俾佢嘅8達通! 我當時記响心, 無鬧, 再出多張俾佢, 兩年來, 屋企嘅錢, 值錢嘢同埋個人仔~全部安好!

但係响恐龍仔面前, 嫲嫲不停咁數~鬧~仲有教訓我唔應該信個工人, 我一路無出聲, 佢越嚟越嬲我無反應, 於是我講咗句: "唔好响個細嘅面前講呢d嘢啦!"

嫲嫲話: 佢邊識聽呀!

唉~佢知你數緊佢最親近嘅人, 你唔信任呢個人~ 仲唔夠?!

嫲嫲見我無乜反應.. 鬧多幾句, 教我要數數自己d金器.. 然後就唔等爺爺, 自己走咗!!!

恐龍爸返到嚟, 聽到呢d麻煩嘢, 又唔高興!

---------

我知佢夾响中間, 但係我就係箭靶, 你要當唔關你事嘅, 我都無辦法! 我唔係識講嘢嘅人, 我唔會見人講人話, 唔會因為幾句說話就改變自己對工人嘅信任, 亦唔會講d肉麻骨痺嘅嘢去令人覺得我聽完好認同!

簡單d講, 我唔識氹人開心!

其實唔止一次, 嫲嫲嘅直覺最後發現係錯嘅! 請人食咗死貓當無事就算, 反而我要代佢同個工人道歉!  成日話d工人無個好人, 大家都打工啫, 你老板咁講你鍾唔鍾意呀?! 講到底~我有個細嘅响佢手, 我真係唔會亂話佢囉! 倒轉~ 我都唔想老板屈我啦!

最後~ 我搵得返哂d金器, 我記得返早三幾個月見過嗰個袋.. 工人話嫲嫲個工人帶走咗! 好啦~ 你兩個賓賓自己搞掂, 唔好咁揚, 等個袋自己出現返就算喇! 等佢好落台.. 件皮褸應該响一切添!

支人參.. 真係唔知喇! 會唔會係俾過我送俾婆婆呢??? 因為我同爺爺都唔食得人參, 無乜用! 3年前話買俾我嗰d鹿茸仲响雪櫃!

唉~ 人老咗, 係咪就會咁煩架?! 你無記性唔緊要呀, 唔好咁大脾氣就好喇!