恐龍第一次外遊@金佰樂馬術學府

聖誕假期有乜玩? 我地book咗個day trip.. 去東莞嘅馬術學校睇馬仔!

呢個其實係會籍推廣活動, $160/成人, 12歲以下免費, 包來回旅遊巴、午餐、15分鐘騎馬、參觀活動、下午茶 (sales推廣) 約5:30pm回程~

基於呢次agent响恐龍家住嘅屋苑做推廣, 巴士响樓下接送, 好吸引呀!

第一次坐長途車, 半個鐘唔夠, 有人已經話要落車喇! 又過多半個鐘, 經過深x灣大橋, 終於要落車過關~ 因為有小朋友嘅關係.. 排隊再排隊! 恐龍仔都算合作, HK關員問佢叫咩名都肯答, 反而大陸嘅關員問恐龍媽小朋友叫乜名! Hmm... 唔知有無讀錯, 唔知國語點讀喎!

再上車起程, 大約45分鐘就到.. 地方唔係好大, 不過對住個水庫, 有湖feel!幾靚!

我地首先去探馬仔..

餵吓馬, 原來d馬都好多性格架, 包括好似d曳人一樣, 會扭計踢門!

驚驚唔敢摸

但係又好奇喎!

呢隻係恐龍仔之後會騎嘅小馬(成年)

呢隻係得幾個月大嘅bb小馬

之後係午餐, 西餐關係, 份量唔多, 我地叫咗3個餐! 恐龍仔照例食少少, 然後就話要返屋企!!!!

跟住就係戲肉: 騎馬仔!

咁當然要戴帽先啦! 估唔到恐龍仔好鍾意喎!

仲覺得好得意, 笑哂咁!

呢幾十張相真係好可愛呀!

跟住就行去馬場.. 上馬!

在場嘅家長都話恐龍仔好嘢, 完全唔驚, 好定!

不過都要多謝d教練, 真係一路扶實恐龍仔, 仲好好笑容咁!

人仔騎馬仔 (小馬)~ 超可愛呀!

之後當然又係等.. 同時又影吓相啦..

又係表情多多~ 古靈精怪!

跟住四圍參觀, 玩咗一陣吹氣彈床, 再落波波池玩..

最後4點下午茶~ 無乜選擇, 不過d cookie幾好味!

當然要俾d sales悶一陣啦, 不過都ok, 唔會難為你! 因為其中一個家庭好好傾, 最後5:45pm先開車, 恐龍仔仲要玩, 唔願瞓, 但喊咗幾聲之後靜哂! 已經俾睡魔call咗去玩..
過關~ 一路恐龍爸抱住, 排咗好耐隊, 呆呆滯滯咁, 但係都識答自己個名喎!
返到屋企成8點喇.. 飲完支奶, 繼續同睡魔玩!

 

Ref:

Agent: China Dragon Membership Services Ltd, Alan Cheung

alan@membership.com.hk, 6183 9543