玩足(媽咪)一日!

今日係恐龍爸嘅考試日, 又係恐龍媽嘅湊仔日! 通常單打獨鬥都無乜好嘢!

首先.. 出街食早餐, 一路都唔多合作, 樣樣嘢都想睇吓, 最大吸引力嘅當然係月台上嘅路線圖! 唔夠高咩? 有媽咪嘛!  幾經辛苦去到快餐店, 好在都算合作.. 自己食咗半碗通心粉! 不過都係唔願食蛋!

好喇~夠鐘上堂喇! 呢位"老師"又搞搞震... 不停自己行嚟行去, 佢d對答笑c人! 不過睇得出老師鍾意呢隻曳嘢..

諗住同佢去遊樂場放電啦...都係四圍走, 跟住又話要食嘢! 但係最後又要媽媽餵.. 食食吓話要ng-ng, 但係恐龍媽仲未食喎.. 忍忍先啦! (其實已經去咗3次厠板, 一次話要ng-ng但無料到) 唉.. 阿仔.. 你阿媽聞到臭味會作嘔架!!!  最後食完去厠所, 又抹完一輪厠板, 竟然話無!!! 好在試多一陣就.. 總叫有d收獲啦!

路過商場嘅聖誕裝飾.. 唔願走!

返到屋企.. 唔願瞓!!! (救命呀!!!! 恐龍媽已經攰c喇!)

最後.. 3點鍾, 恐龍媽放棄喇, 出去煮嘢食, 恐龍爸返到接手.. 可惜都係唔瞓! 呢個時候, 公公婆婆上咗喇, 我地落街玩一陣啦!

然後.. 煮飯.. 食飯.. 休息一陣.. 洗白白!  難得想同隻衰豬一齊洗白白, 點知佢話要爸爸! 最後都係揀咗媽咪 (响無人"陪" or 媽咪之間)

媽媽幫仔擦身.. 恐龍仔自己又擦多一次! 似模似樣架! 然後.. 幫媽媽擦背! 仲有淋水!

恐龍仔玩住兩隻大小鴨仔話:

鴨媽媽.. 同小鴨子.. 一齊去池塘做運動呀!  

仲有小青蛙..

小鴨子: 阿媽~阿媽 (咁叫!)

鴨媽媽: quack~ quack~

最後.. 鴨媽媽帶住小鴨子爬上山 (媽咪手臂), 再返屋企~

然後飲奶瞓覺, 有人仔話要用杯杯, 但係就唔小心整到濕哂.. 點都唔肯飲完先換衫! 唉~ 搞完一輪, 你飲奶樽啦, (我無電喇!) 然後... 瞓着喇!

跟住落嚟先係戲肉: 做咗3個鐘親子功課!!!! 係一個project, 要搞料呀! 星期五通知, 星期一要帶返學校!!!!

恐龍爸呢? 瞓咗好耐喇!