點解要讚

 

Forward from Fion~

 

很多媽咪都有很類似的問題，例如小朋友發脾氣、掟嘢、大喊大扭、打人、唔肯食飯、唔肯瞓、唔肯行要抱，大小小嘅就懶、唔做功課唔專心、駁咀等等….. 其實呢一切「唔好」嘅行為，都可以用「讚」嚟矯正，現在就想講嚇點用「讚」嚟化解一切！


首先，點解要讚？

無論大人同細路，都唔會鍾意被人「鬧」同 「話」，「話」得聽，世界和平啦！因此，今時今日，你去「話」人地嘅壞行為，只有好少數人會自我反省去改正，小朋友就更加唔駛諗，媽咪有時覺得勁「鬧」甚 至打會有效，其實好多時，小朋友都只係因為怕媽咪嬲而收一收，到太多嘢都俾人話時，打駡就冇效了！而較大的小朋友更加會因為被話太多而令他們不停諗啲嘢嚟 駁咀同對撐，令媽咪以為係「反叛」！其實佢地係用駁咀「反抗」媽咪「話」佢地，你試嚇叫佢打完機去遊樂場再食雪糕，睇嚇佢反唔反叛？

但讚就個個人都啱聽，你只須用讚嚟話佢知乜嘢係好行為，來代替「罵」或者「話」他一個不當的行為便成了，不要以為簡單便無效……
一般媽咪會忽畧咗口頭讚，，其實對小朋友嚟講，讚係相當重要，因為你肯定佢，清楚咁話佢知做對咗乜嘢，而你也是因他做了這件事而開心的，他往後做什麼也更有信心，相反，你永遠都「話」佢唔得、未得、錯，雙方關係變差同大家唔開心之外，佢重唔會知亦唔會諗自己原來係得嘅！


點解有啲媽咪覺得難去讚，甚至唔信係work所以唔試？

對於媽咪來說，一心諗住小朋友做啱係應該，做錯就「話」，扭計的大小bb，鬧都嚟唔切，重要去「吼」佢冇扭嗰陣讚！有冇搞錯？自己細個時都俾阿媽鬧到飛起離地，鬧十樣裡面，都有幾樣會有影響去改，當然照板煑碗：阿仔/女做錯就話或鬧或罸甚至打，依家明明係曳，無啦啦重要我讚？呢個心理關口媽咪必須克服，你至會知道「讚」有幾 powerful！或者咁，徹徹底底咁試一次，你嘗到甜頭，真係得，至會信十足！

唔好擔心以為會讚壞或者令佢驕傲，你只係讚佢一個好嘅行為，而唔係讚佢某種能力，唔須要同人比較，所以唔會驕傲，亦唔係認叻，只係代表俾佢知佢係媽咪心目中行為好嘅乖孩子！


點讚？

其實非常簡單：

舉個例，假設你的小朋友會容易動手打人，咁即係，
壞行為 = 打人，相對地，好行為= 沒有打人時
要矯正他打人這個行為，就要在他沒有打人的時候讚他。
如果壞行為 = 發脾氣；好的行為= 不發脾氣的時候
要矯正他發脾氣這個行為，就要在他沒有發脾氣的時候讚他。

他在家好端端時(心情靚更好)便可以讚：bb好乖喎，冇發脾氣，冇打人，好好呀，等媽咪錫錫再一齊食雪糕啦！ (可以是看TV或講故事，只要他喜歡的，hug一嚇亦可)

注意不可以在他發脾氣時才用這些話試圖安撫，是完全沒有用的，所以 timing 很重要，第一次用的那一天，可以早午晚講一次。


應用技巧

(1) 讚要盡情
讚要真心、開心、冇保留同唔可以有條件(condition)或即時翻舊帳，即係唔可以話：「嗱，咁做就乖啦」、「唔打人就乖啦」 (有條件的讚，表示打人就唔乖)，或者「咁先至乖架，之前咁咁咁咪唔好囉！」(翻舊帳話佢之前唔啱)，咁就唔算係「真」心讚，因為你依然有話佢！

(2) 認清目標
當你用讚來矯正一個唔好嘅行為時，記住每次讚的目標只可以有一個，例如你想處理「含飯唔吞」問題，讚佢時佢好開心，但突然太開心大叫，你又忍唔住去話佢：「咪嘈啦！」咁就又冇咗嗰個氣氛，佢又跌番落穀底，同冇讚過一樣，亦發揮唔到應有效用；總之，讚的時候，其他嘢最好全部唔好話佢住！舉多個例，你讚佢冇掟嘢落地，佢即刻好興奮爬上梳化跳，咁你就唔好話佢跳梳化，可以依然開開心心咁走過去，順勢抱高(舉高)佢，同佢玩兼離開張梳化，總之就唔好響嗰陣話！

(3) 掌握讚的 timing
有啲媽咪會話：佢根本冇乖嘅時候，點讚？時機可以製造，只要係開開心心嘅氣氛便成。舉例：(1) bb吃飯吃幾啖便走開，點讚？可以響佢食咗第一啖就讚，甚至一坐低就讚：bb好乖喎，食飯坐得好好冇走開喎。食多幾啖又再讚。(2) bb響遊樂場見到細過佢嘅就推，出手好快，點趕得切讚？當然要響佢推之前，為確保一定讚得到，一到達遊樂場就讚，我教過一個媽咪，佢起初讚唔切，後來索性未去到遊樂場就讚，嚇到佢C6以為佢傻咗......點知，幾次就搞掂咗冇再推人！


善後工作 (Follow Up Work)

1/  用讚改正壞行為，讚緊當時係唔講解其他嘢(例如點解唔好做乜等)；咁幾時先至「教」番佢乜嘢係啱，乜嘢係錯？我常說是講故事時間，因為那時氣氛最好，你用故事，如「三隻小豬」嚟教佢唔好懶，又唔係話佢，咁幾好！

2/  對於處理扭同哭鬧來說，讚之外，重要加 ignore 一齊用，即係要對佢哭鬧冇反應(不可表現嬲，不可罵或話，甚至說話都可免則免)至得，再清楚d，你用讚嚟話佢知「唔扭」係好，但如果佢扭就有嘅 (或者攞到你的情緒反應)，咁佢好難唔扭喎！

佢哭、鬧、扭時，除咗絕不可有任何反應外，亦不好罸關他在房中，因為這是嚇不是罸，你見不到他只會更擔心他在做些什麽，他若在房中大哭，你放他出來時，他會以為是因為他哭所以放他，反為助長了他下次哭得更耐！

3/ 若他不是扭，而是做錯事如打人、掟嘢等，只須用堅定的語氣告訴他一次他打人和掉嘢不對，然後可以罸他他站或坐 naughty chair，他離開便將他抱回，要注意的是不要當時罵或者「話」，比如同佢講：我話咗你啦.....又俾我罸.......衰唔衰呀等，因為罸站或坐已經係罸咗，唔須要再附加啲乜，「話」更加係冇用同傷感情！之後，簡單告訴他多一次他錯什麽，要他 say sorry，然後hug 他一嚇表示冇事錫番！