食魚骨!!!

今日爸爸返學，所以見唔到爸爸~

但係我地都通咗個3G電話--> 恐龍仔一見到爸爸就飛吻, 乜都唔講, 唔停咁"唔mark"~

恐龍爸就發達啦~ 平時恐龍仔好少派錫錫架!!!!

----

工人話: 今日晏晝行開去開奶, 恐龍仔自己响地下, 爬上張櫈, 再爬上床!

重点就係: 張櫈同張床相距成呎!!! 雖然平時都識爬落床, 但係張櫈係泊埋床邊架! 真係未試過見佢自己爬上床囉!

嚇死人~

叫咗工人~ 張櫈要長期泊埋床邊, 方便少爺上落!

----

恐龍仔又有幾聲咳呀!

----

晚飯~ 恐龍媽分d鮫魚俾恐龍仔食..

鮫魚本身少骨而且d骨好粗大, 圓頭(唔尖), 好啱小朋友食!

但係, 大意媽媽就因為咁, 放咗條魚骨入恐龍仔個口..

嫲嫲: 小心有骨呀~

恐龍媽: 無骨呀~

恐龍仔食到怪樣~ 梅吓梅吓.. 嫲嫲就問: 有骨骨呀?

恐龍仔無應~ 不過手仔指住個咀!

大人再問: 係咪有骨骨呀?

恐龍仔: 骨骨!

再指吓個咀..

但係都唔識lur出嚟! 於是媽咪出手响咀角撩返條魚骨出嚟! 而魚肉就已經吞咗喇!

嫲嫲當然唔會放過呢個機會.... (唔想諗返佢講d乜~ but nothing serious)

恐龍仔叻叻!!

恐龍爸問恐龍媽有無嬲.. 咁當然無啦! 係自己大矇先架嘛! 不過真係好瘀囉!