Sam Sir 籃球隊

恐龍媽太忙喇.. 唯有偷住d相先 (都唔知幾時先有時間寫返呢幾個發生嘅事..)

呢日~ 落咗堂, 三個唔願走嘅小朋友, 加上唔趕時間嘅Sam Sir, 就隨得佢地自己活動喇!

都唔記得邊個攞咗個波波玩先喇, 總之一個玩, 其他嗰兩個就跟住玩, Sam Sir 仲成籃波搬出嚟~ 任玩!

星仔鍾意雙手入籃~

恐龍仔同初六都係單手嘅~

不過因為係偷相關係..  都係偷恐龍仔嗰d..

 

 

sea-horse vs seashore vs see-saw

恐龍仔呢個星期, 會同恐龍媽响床玩時, 爬响媽咪身上, 然後話: 搖搖板~ 搖搖板! (佢阿媽條腰未好返哂架!)

恐龍媽响圖書館借咗幾本書, 其中一本叫seashore.. 早兩晚, 恐龍仔不停咁"sea-horse", 恐龍媽見唔到書面有海馬, 只見書名係seashore.. 相信係工人教錯!

今朝~ 恐龍仔不停咁"see-saw", 大家都以為恐龍仔想玩搖搖板~ 但係做阿媽嗰個, 硬係覺得佢唔會咁講... 因為, 恐龍仔攞住seashore本書!

落到平台, 見到個伯伯耍太極, 恐龍仔就企定定.. 然後~ 跟住耍埋一份! 唔叫都唔願走!

恐龍爸媽就當然.. 企响樹慢慢欣賞啦!

行晨運, 比往日有主見~

恐龍仔自己話: 打韆鞦~

然後自己行向韆鞦方向..

打咗一陣.. 恐龍爸就話玩搖搖板

恐龍仔唔停咁講: 搖~搖~搖~搖~ 搖搖板!

恐龍媽都仲係覺得~ 恐龍仔唔知see-saw係搖搖板!

之後~ "睇杜鵑!" 然後行咗向車路嗰邊..

睇定花花~ 自己話"go home!" 然後行咗向樓梯.. "上樓梯~"

恐龍媽仲教咗恐龍仔講: we are going home~

今日好出奇, 平時唔鍾意返屋企架! 可能佢自己都覺得成身臭味~~ 呢隻曳豬一朝早飲完奶奶玩跳跳... 然後跳哂d奶奶出嚟呀!

dino x babymo (成長印記)

等咗都好幾個月~ 終於出街喇!

雖然唔係好update

e.g. 恐龍仔已經無食飯/瞓覺嘅問題

身高應該有83cm左右, 體重就大約23-24磅

但係.. 見到咁近恐龍仔生日 (話哂係3月號)

真係好開心呀!

唔該哂Sylvia (如果咁啱路過見到~)

今期~ 仲有星仔, YY, 同埋傻B呀!

一朝早~一肚氣!

去買豬腸粉做早歺 (其實知道唔應該食架喇~ 久唔久一次啦!) 去到大大聲叫"少醬", 見阿姐好落力咁加.. 再叫!

到俾錢.. $12.5 , 恐龍媽俾$15.5過佢, 阿姐話:"唔收亳子.. 不過算啦~" 點知佢諗諗吓, 又話: "我有得找俾你呀, 唔要你d亳子呀!"

嬲得我呀! 最衰自己唔係d識嘈交嘅人, 走咗出門口 (趕時間) 先勁想同佢講話唔要盒腸粉! 落咗咁多醬!!

返到公司見到超多醬~仲嬲! 見到已經唔敢食!

真係唔應該幫襯佢, 亦唔應該再食腸粉!

唉~

 

 

可惜~我是双子座!

最近~ BK有媽媽話恐龍媽周身刀~張張利~

見到, 覺得好慚愧! 因為双子座出名係: 周身刀~無張利!

從小, 都唔覺得自己咁多興趣, 但係整整吓~ 一時睇星座書, 一時沈醉打橋牌.. 畢業喇~ 又要讀part time, 跟住就係拍拖, 都無乜特別興趣, 係生咗隻仔, 就對關於佢嘅一切大感興趣, 於是睇吓育兒書, 教仔書.. 呢排仲睇埋營養書 (鬼叫d大人個個都有城市病咩!)

最後~樣樣識少少, 扮代表!

恐龍媽媽其實最近會開始好忙! 公司個schedule排到復活節假! 功課都忙, 因為又有presentation, 又有assay要寫~ 都係復活節假前! 呢個weekend已經唔得閒陪仔.. 跟住落嚟嘅星期六都會! 所以~ 有d唔開心!

其實~ 都怪自己懶!

双子座.. 係双重性格嘅.. 其實呢排好down! 因為覺得自己之前太懶, 懶到依家要交貨喇~ 先知死! 

一方面好逸惡勞, 一方面又要求高! 怪獸!

於是.. 依家的起心肝, 洗咗公司電腦某d bookmark! 希望返少d BK~

真係好耐無試過咁唔開心, 仲覺得恐龍爸嘅support唔夠.. 其實佢都超忙, 啱啱先叫搞掂哂買樓嘅事, 攞咗鎖匙.. 跟住呢個星期又話考試!

可能因為上星期拉傷條腰啦~ 更加睇唔到仔.. 因為同唔到佢玩!

唔知恐龍爸會唔會睇到.. 好想講: 你已經做咗好多好多! 不過人~ 總係貪心 加上 睇唔到 (或者唔去認) 自己嘅不足!

我只係好多嘢都唔想做 (~懶!) 好想推~ 但又要求高! 成日覺得有好多好多嘢要做.. 所以咁多嘢講~ 咁唔開心!

好唔想返工, 但係知道屋企經濟上唔容許咁做.. 責任上, 亦過唔到自己 (雖然無人話過只有我能夠勝任, 但係無咗我.. 相信都幾頭痕!)

呢d~ 就係双子座!

-------

講起工作.. 有d嘢不吐不快!

同個同學講起, 發覺對家真係好唔掂! 佢地做嘢係唔爆煲就即係無事, 就算出咗事無出街就ok~態度作風極度無良心, 仲口口聲聲話自己係最好嘅! 

反觀我地.. 呢期d同事真係唔錯! 大家真係好好, 無話搞事/縮骨, 個個都好盡責! 最慘呢d唔可以做selling point, 但係, Quality係由人做出嚟嘅, 我敢講: 論人材, 真係我地最好~ d硬件吹到天下無敵都無用, d人唔掂, 出錯+偷工減料都做得出!

唉~ 但係d客唔會知!

有時都會諗: 點解要駛咁多錢搞QA, d客都唔理嘅! 或者應該講: 個個都話搞QA, 魚目混珠! 外人跟本就未必check到, check到都未必識challenge你個"專業"~

 

春天~ 玩捉迷藏

呢兩日~ 天氣無咁潮濕, 今朝仲好大風添... 菇菇謝哂喇!

再無新嘅菇菇.. 舊嗰d都開始乾喇!

唔知而潮濕時.. 菇菇又會唔會從現呢?  春天就好似活潑頑皮嘅小孩.. 愛玩捉迷藏!

 

---------

尋晚, 我地竟然响黑夜當中, 見到毛毛蟲呀!!!

 

-------

今日~ 恐龍爸媽都有事在身, 無時間陪恐龍仔~

媽媽一早就出咗去做功課.. 3点前趕返屋企陪恐龍仔上playgroup, 然後又出咗街..

爸爸成日都响屋企, 不過要做嘢呀!

 

 

探菇菇

自從發現咗菇菇之後..

我地每朝都去探吓菇菇!

佢地由最初得3隻.. 跟住5隻.. 6隻

今日~ 有七隻咁多呀!

其中一隻~ 仲開到好大 (有恐龍仔隻手仔咁上下啦~)

呢隻就尋日已經瞓低咗.. 唔係係咪有人拉咗佢出嚟呢?!

真係有d似恐龍爸好鍾意食嗰隻 ~ BBQ蘑菇~ 呀!!!!

今朝~ 除咗探菇菇, 我地仲由平台一邊"跑"到去平台另一邊!

嗰邊有一個長期欄住咗嘅大仔遊樂場.. 有一小塊田..

同埋期待中嘅茶花! 已經好多花蕾喇!!!

其中有一朶仲開咗添~

恐龍仔好大聲講: ROSE~

唔係呀~ 不過都近架喇! 因為茶花同玫瑰好親架!

過幾日再去睇過!

恐龍媽媽早幾日拉傷腰背.. 抱起隻仔先知痛!

都幾日喇.. 仲係有d痛, 雖然已經無再抱仔..

呢個weekend 恐龍爸仲要自閉溫書.. 唉~ 好想去做按摩呀!!!!

發現。春天

尋日~ 同恐龍仔晨運, 路過舊年見到毛毛蟲嗰棵樹.. 又見葉面到好多洞洞, 恐龍媽心諗: 唔知會唔會又搵到呢???

最後, 見到有塊葉底.. 有pupa! 諗咗一陣.. 係"蛹"! 不過恐龍仔對呢舊咁醜怪嘅東西乜興趣..

 

咁好啦~ 行去另一邊草地, 睇吓旁邊d花花啦~

點知~ 恐龍媽覺得地下白色一塊塊嘅東西好奇怪.. 有d似早幾年响屋企附近見過.. 成片草地上生滿嘅.. 蘑菇!

於是~睇真d啦! 原來真係呀!!! 係好似傘一樣嗰種! 不過, 恐龍仔都係無興趣睇!!!

恐龍媽再望吓周圍.. 再發現兩粒球狀菇菇! 都係白色嘅! 超開心!

不過... 人仔都係無乜興趣咁喎..

-------------------------

今朝~ 帶埋相機, 諗住影菇菇..

尋日隻大菇菇仲响度..

但係兩隻波波菇呢? 原來菇菇都會"開"架!

恐龍媽好努力咁搵.. 另外搵到兩隻波波菇!

另一邊嗰朶花花~

之後~ 恐龍爸同恐龍仔玩咗一陣bubble~

恐龍仔好開心!

捉住!

無咗!

我地當然有去影蛹啦~

~發現小手~

首先, 收埋隻手..

然後, " 登~登!" 伸返出嚟!

幾開心!

然後.. 又打咗一陣韆鞦~  睇咗一陣杜鵑

返屋企時, 見到藝人鄰居送囡囡返學 (仲一路以為佢得一個仔添)

recent photos from mobile

突然間諗起~ 好耐無load返手機d相出嚟..

 

呢張係黃昏時間~ 恐龍响公園, 坐响高處看海~ 嗰日應該好凍, 著哂羽絨!

去幼稚園interview~ 玩得好開心!

恐龍爸去Pacific coffee坐吓~ 人仔就去企吓!

(窄身喇叭褲係咪好型仔呀?)

商場燈箱~ 佢自己企埋去話要影相相!

呢張都係~ 影相相喎! 不過唔識望鏡頭嘅!

上堂~ 好鍾意自己行咗去~"筆筆" 同埋 "抹抹"

去探表弟嗰日, 行到長命電梯近尾段, 開始一級級! 人仔見到當然要行行啦!

婆婆就捉到實一實!

屋企樓下嘅古怪杜鵑, 花瓣有白紋!

佢又話影相相!

其實呢張好靚, 可惜恐龍媽唔係好識用部手機.. focus唔到!

呢份就係Sam Sir playgroup 時俾小朋友揀嚟送俾媽媽嘅情人節禮物

恐龍仔攞起咗又放返低~ 最後都係攞返紅色!

呢d係最近恐龍爸送嘅禮物~ (包括情人節禮物)

一份係過年前經過見到幾特別嘅耳環, 個Sales話:花生~好意頭呀! (不過好貴!)

另一份係立體puzzle, 恐龍爸响starbuck 坐咗成晚砌嘅.. 恐龍媽都有幫手架!

不過之後俾恐龍仔拆爛咗~ 恐龍爸又再砌過!

(好似終於識用個focus 功能喇! 哈哈哈~)

遙控車

恐龍爸之前話, 有幾樣嘢好想買俾恐龍仔玩~

分別係 泥膠一套(有好多parts嗰d set), 遙控車, etc (恐龍媽唔記得咁多. . )

之前拆咗泥膠俾恐龍仔玩, 佢好鍾意呀! 早兩晚恐龍爸的起心肝砌好架車仔喇!

佢砌得好慢.. 因為佢掛住睇d日本!

完成咗~ 就當然要去試車啦!

尋日晨運時, 就帶咗車仔落樓, 去咗會所試車..

起初, 恐龍仔見到車仔, 就當然會攞起~ 然後推向前..

但係... 車仔突然郁喎! 恐龍仔行一步~ 車仔就响佢身邊郁一吓! 然後佢又追住車仔... 就好似同貓貓玩咁!

恐龍仔覺得好有趣~ 想捉住車仔! 點知車仔突然間走開咗, 去到好遠..

恐龍仔跟住追.. 追到好遠 (恐龍媽問恐龍爸: 最多可以去到幾遠呀?  恐龍爸都唔知道~)

恐龍媽諗~ 拐子佬可以考慮吓遙控車喎!

然後~ 恐龍爸就教恐龍仔點樣控制架車, 向前同埋向後!

玩咗十幾分鐘左右.. 就要返屋企喇! 無計啦~ 爸B同媽咪要返工架嘛!

下次再玩過~