晨運

好耐無影相喇! 因為恐龍爸怕咗小手, 所以鎖咗個相機防潮櫃呀! 尋日朝, 恐龍媽終於攞到相機喇! 仲影低之前好想影嘅嘢..

首先.. 就係平台嗰一列大葉紫薇! 有d仲係未落哂葉, 就已經出緊新葉; 有d就得樹枝尾有d細葉, 其他嘅都慢慢大喇, 不過都係少少啡黃色; 有d就已經變成茂密嘅綠色大葉, 可能好快就會開花, 見到紫色嘅花花呀!

另外, 仲有好大朶嘅白色花花, 好靚, 不過唔知叫乜名! 佢開咗就好快謝, 今朝見已經開到好大喇!

而呢隻恐龍仔.. 佢話要同洋紫荊影相喎~不過恐媽同相機唔係幾熟, 唔識較境深.. 所以.. 只係見到有少少紫色响樹上面..

 

之後, 又行咗去睇蕃茄, 恐龍爸讚第一張蕃茄影得幾好喎~ 仲有木瓜仔, 同埋一小片田~ 有恐龍仔好鍾意嘅三色堇.

恐龍媽掛住影相, 恐龍仔就掛住玩! 呢個遊樂場有一個角落長期欄住咗, 呢隻嘢就攞條鏈玩! 好似好新奇咁, 幾開心呀! 玩玩吓玩到上頸! 俾爸爸鬧!

 

臨走~恐龍仔當然唔願行啦.. 又想行圓柱.. 不過呢次無人扶, 想行又唔敢行, 諗嚟諗去.. 都係要求救!