Nursery.. 讀唔讀? 插唔插班?

好耐之前.. 大約係恐龍仔得6-7個月大, 恐龍爸同恐龍媽第一次去睇幼稚園開放日~ 想知道係點嘅, 要expect d乜, 方便第日加深了解..

當日, 康傑嘅老師真係好nice, 好有耐性咁介紹學校, 同埋返全日嘅好處!

因為係工人湊仔嘅關係, 我地覺得見吓其他人.. 應該係好事! 老師仲提到, 返nursery 唔係真係返學.. 其實係學習守紀律同埋自理能力! 對家中稱王多時嘅獨子好有幫助!

之後~ 去過威寶, 可能我地去嘅時間, 佢地將近收工啦, d老師全部睇我地唔到! (咁大架BB車加兩個大人都見唔到呀!) 個個三五成群咁傾計.. 地方就真係唔錯, 不過應該幾多蚊... anyways, 印象太差喇, 已經唔想講話.. 如果讀全日會over-budget!

恐龍爸同恐龍媽後來limit咗目標: 唔要國際班 (因為中文比英文難學! 打好中文底子好緊要!) nursery 要近 (K1先出去讀), 有戶外地方玩, 希望有全日班讀 (如果生多個, 工人要湊細B)

到恐龍仔歲半, 真係要報名喇.. 我地睇埋合一堂, 地方幾大, 不過唔鍾意佢好多樓梯上落.. 唔鍾意佢較"傳統" (感覺上..)

最後~ 2008年10月, 報咗康傑, 因為近, 全日班價錢ok, 有戶外操場, 老師細心, 多活動.. 諗住恐龍仔足兩歲就插班, 新學年轉全日!

插班~ 係想佢唔好成日對住工人, 亦因為佢學習進度似乎較快, 想俾多d 學習機會佢, 見多d嘢! 雖然~ 好多人會話咁早返學好辛苦啫~ 仲話返全日, 嚇親唔少人! 不過~ 恐龍家相信: 學習係開心嘅, 唔係辛苦嘅! 爸爸媽媽都仲返緊學讀書, 學自己有興趣嘅嘢! 學習~ 係終生事業, 一定要make it fun! 連家長都話讀書辛苦, 小朋友當然會話辛苦啦!

至於讀唔讀~ 其實如果係媽媽自己湊~ 唔讀nursery都得, 無問題! 重點唔係返唔返學定辛唔辛苦~ 而係: 記住0-3歲係學習黃金時期, 其次就係4-6歲, 自己湊就要好用心去教, 帶小朋友四圍走! 

但係~ 有時.. 有d嘢未必盡如人意.. 康傑am班响年尾已經full咗! 2009年2月會加開pm班!

另外~ 身邊朋友個個都好似報好多間學校, 又有人話K1嘅競爭仲大, 2007年又多bb出世~ 咁~會唔會更多嘢唔會好似恐龍媽咁諗咁順利架?! 朋友又話~ 讀康傑, 好似有d浪費咗恐龍仔喎..  (呢個又係計劃裡面無諗嘅嘢~ 無諗到恐龍仔可能需要多d深d嘅課程.. 雖然, 人地話康傑都幾深~)

於是~ 我地報咗區外一間心儀嘅學校~ 一間原本諗住讀K1嘅學校! (其實恐龍媽做咗唔多research關於K1.. 呢間係其中一個選擇) 恐龍仔面試表現唔係幾好, 做到到平時識嘅嘢, 恐龍媽嗰刻~好失望! 但係後尾就無諗喇~ 人人都表現唔到平日咁架啦! 算啦~ 等消息啦!

最後~ 係收咗.. 交埋留位費喇!

然後~ 响插班前, 因為工人放假問題, 開學時間延期一個月! 又~ 响開學前, 爆出個豬流感!!!! 諗嚟諗去.. 都係唔好返學住, 睇定d先! 錢財身外物, 買落嘅嘢無用唔緊要, 最緊要有驚無險!

至於9月前仲返唔返.. 好難講, 因為恐龍爸同恐龍媽未達成共識! 恐龍媽唔想俾咁多新環境俾恐龍仔去適應, 仲要係嗰頭適應咗就即走! 又去第二個新環境... 真係好有保留!