做節

經過今晚, 肯定嫲嫲唔會再話自己煮飯做節! (其實本身都無咁嘅習慣~)

話說~ 恐龍媽公司嘅活動到6pm左右完, 响黃金海岸返MOS, 用咗起過個半鐘, 8点前到, 叔仔&女友未到~

到恐龍媽沖個快涼出返嚟, 恐龍仔行出行入, 隨口問恐龍爸: BB食咗飯未, 佢話唔知~ 轉頭再問工人, 佢話未食, 因為嫲嫲叫等埋條魚!

吓?!?!?!?!

開飯啦, 恐龍仔唔願食, 太多人同佢玩喇, 仲有, 就係佢已經好眼瞓! 恐龍媽叫工人入房餵~  (嫲嫲仲要問点解!)

到恐龍媽極速食完, 睇吓個仔, 再問, 先知道上一歺係2:30pm!!!!! 有無搞錯呀!?! 恐龍仔真係唔願食喇~ 餵奶啦!

開奶嘅時候, 抱恐龍仔同大家good night, 嫲嫲話乜都唔知~ 唔怪之得切鴨時恐龍仔umm~umm~

食完奶~ 傻豬好快瞓着!

而恐龍媽就又俾嫲嫲教点養仔: 細路仔食少一歺駛乜咁緊張?!

工人今朝飲茶淨係帶水, 又唔帶奶出去!

唔係一定要食飯嘅~ 佢咁鍾意飲奶, 咪飲奶都得啫~

我以為佢臨瞓飲奶就得~ 我都無理佢, 更唔會叫工人做嘢!

明白~係工人好心做壞事, 佢唔應該理間屋其他人做緊乜, 應該好好照顧恐龍仔!

...

十点幾, 傻恐龍喊醒! 好慘慘呀! 睇住佢喊到抽吓抽吓~ 放返落床都仲抽咗一大輪~

...

嫲嫲無耐之後叫咗恐龍爸出廳~ 恐龍媽從來都好專重佢地, 我做外人嘅唔會偷聽佢地傾密計~~ 不過, 恐龍爸公司今晚有個job做緊, 見到電話響, 恐龍媽攞咗個電話俾佢~~ 嫲嫲見到並無收聲, 恐龍媽聽到: 阿Dee(i.e.恐龍叔)個女友始終係外人.. 開心嘅日子... 唔開心都唔可以咁咁咁~~

都知一定係complaint緊...覺得食飯時好話佢~ 恐龍媽講咗d乜?? 大概係唔好俾/叫個工人幫手, 佢要照顧恐龍仔~~

唉~難為了恐龍爸喇! 都話咗如果生多個一定要搬架啦! 依家有工返已經好d, 一個星期有一日搞亂恐龍仔嘅schedule (btw, 今日出咗兩次街, miss咗兩歺!) 如果佢退休.. 就煩喇!

恐龍媽承認, 係有d發癲+嬲, 因為有人虐待我個仔~ 嫲嫲個孫! 点解佢可以咁做? (佢唔覺得係咁) 佢可以不聞不問? (因為工人喺度, 唔關佢事!) 咁~ 可能係恐龍媽要求高, 要佢管埋工人点對佢個孫! (恐龍仔係一件玩具? 帶佢出街唔駛問吓佢肚餓未?幾時要食嘢?!)