~ 恐龍家 ~ : 5月 2009

2009年5月31日星期日

2009台北之旅 -- Day 4

信義區 >> 台北101 > 三越 > 誠品 >> 桃園機場 >> 香港

幾日~ 都未行過住嘅信義區!

起身執好行李, 就check-out, 放低行李咗apartment個office~

其實呢區好奇, 一邊係舊區咁, 過咗一條街, 就係地盆呀~ 田呀~ 高級住宅區~ 再行過d就係金融中心, 市政府!

由apartment行去101, 要15分鐘左右, 已經見到3架高級靚跑車!!!!

去到101, 我地落咗food count食嘢, 11點, 啱啱開! 呢個food count 超多嘢食, 咩地方嘅美食都有.. 諗嚟諗去~ 買咗碗牛肉麵同埋基隆廟口嘅鐤邊x , 唔夠! 仲來一串和果子同埋新鮮auntie anne 嘅包條~ 咁就差唔多~

再去三越~ 除咗大之外, 其實無乜驚喜! 我地响呢度買咗盒幾貴 (~NT1000)嘅教具俾恐龍仔!

再去誠品~ 恐龍爸搵到d好嘢! 見到嗰八九行嘅日文書櫃.. 唔捨得行! 差唔多時間, 又要食少少嘢~ 我地落咗誠品嘅food court, 好多嘢都同101差唔多, 不過呢度細d.. 我地食咗d少籠句~ 幾好味!

跟住就係去攞返d行李~ 再坐的士去君悅坐機場巴士~

<--巴士望向101~

去到機場~ 恐龍爸先醒起, 嫲嫲想食麻薯, 好在都仲有少少錢.. 呢個黑仔旅程.. 最後又要等多半個鐘! 班機delay咗呀!

機上~見到如止美景..

今次~ 飛機餐嘅炒麵都食得吓~ ok!

恐龍仔@26mths

好耐無update過恐龍仔最近嘅發展.. 因為已經無乜特別!

身高: 約86cm (好難度架! 所以好少度~ 大約啦!)

體重: 約25磅

講嘢~ 好肯講, 好明大人講嘢, 不過就仲未分到你同我~ 仲係成日"媽咪陪你"~ 仲有多咗好多長句子~

大肌肉~ 只要手仔腳仔夠長, 遊樂場嘅玩意難唔到恐龍仔, 佢好肯試, 不過亦有膽小時候, 係都要拖實大人隻手!

小肌肉~ 終於都做到叻叻豬喇! 之前要收埋隻手, 搵第二隻手幫手攞隻手指公出嚟架!

左手 / 右手??? 恐龍仔有超過一半嘅時候係會用左手嘅! 最近俾佢用"Toddler write" 學寫字 (手指仔跟住凸紋畫~), 都係用左手多... 恐龍媽d堂姐堂哥嘅細路, 好多個都係用左手嘅~ 真係唔知應唔應該要佢用右手好~

因為爺爺嫲嫲搬走咗~活動空間大咗好多.. 恐龍仔好開心, 好多嘢玩!

呢排開始睇reader... 發現原來恐龍仔嘅英文生字程度, 去到K2/K3! 會繼續搵readers佢睇~

睇開嘅OZMO應該會停喇~ 恐龍仔"學壞咗"! 佢成日大聲叫STOP, 仲會同人講GO AWAY~ 恐龍媽明白, 表達上, 佢無用錯, 佢真係唔想其他小朋友行埋去玩佢想玩嘅嘢~ 但係咁樣實在無禮貌! 所以~ 要戒!

2009年5月30日星期六

2009台北之旅 -- Day 3

深坑 >> 菁桐 > 平溪 > 瑞芳 > 台北市 >> 李錦利 > 西門 > 港記 > 食!

唯一一日離開市區嘅行程~

去到巴士站, 都係無運行, 30分鐘一班嘅車, 等足35分鐘!

去到深坑, 第一件事就係見隊就排! 大樹旁第一檔嘅燒豆腐! 幾好味呀~

之後一路向老街行.. 見到好多小食/手信, 好想買, 不過恐龍爸唔係會買嘢嘅人, 所以恐龍媽都無得盡情咁買!

不過~ 都買咗d好味道嘅小食做手信! (d同事真係幾鍾意咁~)

呀~ 仲試過地道燒玉米.. 一次就夠喇! 以後唔會再試 (恐龍爸話, 之前都好似試過一次啦, 第二度嗰d唔好食架!)

仲有另一檔臭豆腐, 真係無之前嗰檔咁好味道~

再上車去平溪時, 攞住一大袋嘢食..

原來16路車經過菁桐架~ 我地企响呢架過山車上面大半個鐘, 受夠喇, 所以提早落車, 改一改行程啦!

落咗車, 恐龍爸响十分鐘內已經回復正常, 恐龍媽就好耐都仲暈.. 想嘔! 我地去咗間鋪度坐吓, 叫咗兩碗豆腐花~

跟住慢慢行去平溪.. 見到路過嘅一班火車 (好多人!!!) 其實, 一路上都見到好多遊人~

到平溪, 見到有人放天燈, 我地又坐低食d嘢, 然後就去火車站買票: 售票員話delay咗30分鐘喎.. 算啦, 等吓啦!

於是响隔離coffee shop坐吓... 但係坐坐吓越嚟越多人! 廣播話, 班車delay 45分鐘喇!!! 好驚! 我地check check"過山車"個班次, 又咁啱開咗班, 好啦~唯有上定月台等啦..

大約遲咗一個鐘, 開去菁桐架車到喇! 月台上過百人努力咁迫上車.. 好走難feel呀! 好彩~ 都幾多人响菁桐落車, 我地有位坐喇! 但係去返平溪時, d人已經上唔到車喇! 因為呢班車已經遲咗, 唔想再走難, 我地決定唔响十分落車, 直去瑞芳~

沿路風景其實好靚~ 車軌一邊係峽谷, 見到下面條河 (唔怪之得有瀑布啦~) 不過, 睇怕無人有咁嘅心情欣賞囉~

去到瑞芳, 因為要排隊買票, 走咗班車! 唉~黑仔! 又等多半個鐘! 出到台北, 已經係7點喇! 我地要去三越換錢, 再去買百仙果 (其實真係唔明, 點解台灣無d找換店架呢??).. 跟住就到今日最後目的地: 西門町喇!

响港記收工前趕到, 然後飲咗杯蜂蜜苦瓜汁 (yummy~) 再來炸雞塊同埋花枝丸.. 嘩~年紀大, 唔受得d油炸嘢喇~ 好辛苦! 再來多杯蜂蜜苦瓜汁(加青瓜)

行咗個圈~ 好想食d清d嘅嘢! 好掛住度小月, 可惜附近無分店啦~ 隨便入咗間好多人嘅sushi店~ 係咁e都食咗差唔多NT1000!!! 台灣有一樣衰~就係好多地方唔收信用咭!!!

又大包細包咁返apartment~

2009年5月29日星期五

2009台北之旅 -- Day 2

市內遊 >> 永康街 > 度小月 > 鼎泰豐 >> 書局街 > 金石堂 > Starbucks > NOVA >> Apartment >> 敦化區 > 阿宗麵線 > SOGO > 乾杯 >> Apartment

瞓到九點半有多~ 好起身喇! 肚餓喇!!!

恐龍媽做足功課, 樓下巴士總站有巴士去永康街, 一落樓就見到有車, 司機叔叔幾好人, 等埋我地~

去到永康街, 鼎泰豐已經好多人等緊位喇! 要等成個鐘.. 咁要搵嘢食住先喎!

於是~ 行咗去度小月~ 我地叫咗一個擔仔麵, 肉燥飯, 鴨蛋, 同埋炸花枝丸~ 恐龍爸從此對碗肉燥飯念念不忘.. 而平時唔鍾意食花枝丸嘅恐龍爸都話好味道!

出返嚟~ 都仲未有位~~ 入金石堂等啦! 見到d啱恐龍仔嘅書, 不過唔買住, 睇定d先.. 再等~ no.到喇, 叫嘢食.. 再等!!!!! 未有位喎!

今次去鼎泰豐無乜驚喜, 炸排骨都唔錯~

坐返同一路車, 去到書局街starbucks門口, 因為唔想太辛苦, 所以行咗入金石堂, 掃咗一輪就唔行喇! 無discount, 其實買貴架! 不過又唔想周圍格價, 又怕細鋪唔收信用咭.. 所以都係諗住一間書局買到幾多就幾多囉~

然後去Starbucks坐~ 嘩! 又係超多人! 估唔到台灣人咁自私嘅, 個個人都羈兩個位架! 一個位用嚟放袋! 有人羈多張枱放嘢添呀! 好鬼離譜~

再去NOVA行咗個圈就坐捷運返apartment, 遇正有人跌咗落軌.. 好少車, 好多人!

返到去, 休息片刻, 又出去喇! 本來諗住去美麗華坐魔天輪架! 點知等極都無車, 恐龍爸話上下一架巴士再算.. 於是, 我地上咗"信義"路公車.. 去到大安站落車, 再諗仲去唔去美麗華, 因為太肚餓嘅關係, 決定咗敦化附近搵食.. 第一站係阿宗麵線! 都係咁好味!

然後行吓行吓, 決定去食烤肉, 去攞位~ 要等個半鐘呀! 去SOGO行吓等啦~ 恐龍媽發現: 台灣d奶粉平過HK好多, 恐龍仔食緊嘅雅培, 都係賣大約HK$15x 咋!真係想入返d貨呀! 可惜咁重, 算罷啦! 我地响超市買咗d茶葉就算喇~ 9折中 (嘩~ 咁d奶粉咪仲平! $140咋喎!)

乾杯又係d要人企响門口點菜嘅地方! 之後繼續等!!! d食物ok啦~ 炭燒~幾特別囉~ 不過恐龍爸好似唔係幾受落.. 我地唔飽都無再order, 走lu~

成十點, 唔知食乜好.. 响永春站附近嘅7仔買咗兩個杯麵...

2009年5月28日星期四

2009台北之旅 -- Day 1

香港機場 >> 桃園機場 > 信義區Apartment > 北投春天湯屋 > 淡水 > Apartment

一早起身~ 恐龍爸同恐龍仔玩咗一陣.. 出門口時, 真係好唔捨得阿仔.. 佢喊得好慘呀!

去到機場, 排隊check-in完再到中華旅行社攞入台証~ 嘩! 等成個鐘呀!

草草响海皇食早歺~ 最衰嘅~ 就係入錯咗恐龍爸個出生日期, 搞到要過到桃園機場再等過~~

登機時~ 我地差唔多係最遲到嘅.. 仲有5分鐘起飛!!!! last call喇!

食咗幾啖唔好味嘅飛機歺..

過到台北, 排隊換錢, 排隊做証, 排隊入境~

好好彩, 一去到就咁啱有班大有東線車就要開喇! good start呀!

去到君悅落車上的士, 個的士佬都唔係好知响邊樹! 响街口落車, 自己搵啦!

好彩~ 間屋都唔錯, 比一般酒店大, 有廳有廚房, 陽台係洗衣機, 不過就唔係幾用得着~ 想讚一讚個按摩企缸, 唔錯!

放低行李, 第一件事係打去春天問吓湯屋駛唔駛等~ 佢地五月有promotion, 雪村館湯屋做緊半價呀! 我地睇中咗有兩個池嘅C屋~ 好好彩, 唔駛等呀! 於是出發喇!

行去最近嘅捷運站(永春站)需時約10-15分鐘, 我地路過sub-way, 叫咗個6吋包包兩份食~ 恐龍爸話, 比美國嗰d好食, 因為係熱嘅!

去到捷運站, 買優悠咭, 然後坐成20個站捷運...

終於去到新北投! 我地等十幾分鐘就有shuttle, 咁當然唔行啦!

個湯屋幾正, 雖然恐龍媽想要d睇到戶外嘅就仲好, 不過有時又唔可以太過貧心嘅~~~ 浸咗成個鐘唔熱嘅溫泉(血壓高唔浸得太熱呀~ 呢個又係湯屋嘅好處, 自己想幾熱都得!) 我地好肚餓喇! 要走喇!

外面~ 開始天黑... 未有shuttle.. 呢次, 要行落山喇!

<--地熱谷

<--路邊

討論咗好耐, 到底去邊度医肚好~ 最後決定去淡水!

去到~人山人海! 咩日子呀? 咪端午節囉! 我地一心諗住行去老街街尾食可口魚丸湯同埋炸蝦捲, 估唔到.. 遇到巡遊, 放炮丈! 後尾仲有烟花添呀!

行返出海邊, 我地試咗阿給同埋蚵仔煎, 恐龍爸對酸梅湯無乜好感, 恐龍媽自己一個飲哂! yummy~ 佢自己就飲西瓜汁..

臨走~ 買咗幾個donut諗住放响雪櫃看門口

返到apartment都十點幾喇! 對腳好攰~ 第二日都係留响市區hea啦!

2009年5月27日星期三

不捨得~~您

今朝~ 如常落平台晨運..

天陰, 落過雨~ 地下濕濕~

一路行~ 一家3口, 每人手執一朶花: 恐龍仔拿着雞蛋花; 媽媽拿着硬枝黃樿; 爸爸呢?... 是一朶有4片花瓣的小花 (一直記不下它的名字~ 恐龍仔愛把它叫做"五星花"~ 每次, 媽媽都要提他: 五星花有五片花瓣呢~)

走着走着~

見到天空有一角的藍~

陽光從密雲中間穿過~ 我們曬了片刻太陽!

回到家~ 媽媽忙着妝扮上班.. 恐龍仔見到媽媽穿鞋, 就嚷着: "跟你!" 這孩子自己穿起鞋子來..

媽媽真的要出門了~ 他跟上來! 好吧~ 跟着遊一轉吧!

天~彷彿知道孩子想見多媽媽一刻, 正下着大雨!!! 媽媽只好上樓拿雨傘..

這次~ 沒有讓孩子入電梯, 這孩子哭了.. 媽媽在電梯內.. 遠遠還能聽到哭聲!

不捨得吧? 之後數天孩子也不能跟爸媽去晨運了~

其實~ 媽媽很不捨得.. 但又怕一起外遊, 大家都辛苦!

2009年5月26日星期二

鵝媽媽

一路搵緊d童謠, 又有書, 又有歌仔嘅~ 其他好耐之前都聽過話鵝媽媽好~ 不過無放响心, 直至真係要搵兒歌.. 先發現唔多選擇!

Mother Goose ABC

其實呢套教材, 有兩個版本: 一個係分4套嘅, 每套有4本書/cd;

單元1：Rhythm & Rhyme節奏及押韻 (適合初生至6個月)

這單元中的詩歌包括簡單的言語及柔和的節奏，可刺激小孩的開心反應及逗他們發笑，鼓勵他們使用身體及言語來與外界溝通。搖籃式的詩歌可鎮定小孩發脾氣的情緒，令他們休息或入睡。
單元2：Bouncy Beginnings開始蹦蹦跳跳 (適合6個月)

這單元包括發笑的、跳躍的及動感的詩歌，可促進小孩作自發的反應及提高早期的活動能力來發展出肢體協調力、控制力及節奏感。

單元3 : 跟音樂一起動 (適合1歲)

當中的滾轉、踏步及蹦跳的動作式詩歌很適合學步兒，可促進小孩發展出自發的動作及反應，而結構性的節奏可令小孩重覆單字、片語及聲音。

單元4：童謠故事 (適合兩歲或以上)

單元中的詩句可刺激幼小孩子去探索新的技巧、角色扮演遊戲及想像遊戲，更可幫助學步孩童掌握大部分的身體動作。當中的詩歌較長，並以重覆的方式來練習關鍵字及促進語言學習。