悶悶不樂

同平時一樣, 媽媽七點半叫恐龍仔入房叫爸爸起身..

今日, 恐龍仔由自己間房行咗出廳, 發現尋日媽媽買嘅新書 (寫一寫~ ABC, 搵咗好耐喇!) 恐龍仔笑住抱新書入房搵爸爸!

入到房, 二話不說就要攞支筆出嚟, 打開~ 開始寫ABC.. 筆畫序錯哂, 恐龍仔除咗第一筆係由上到下之外, 其他都係由下至上!

佢好努力咁玩... 但係尋晚講好去探木瓜樹架!

恐龍仔 : NO!   you (I) want this!

喊咗一輪~~~ 媽媽努力地引導恐龍仔講出自己感覺~ (其實恐龍爸媽都响個心度笑緊, 因為買咗樣佢鍾意嘅嘢, 又覺得呢個仔好得意, 鍾意寫字多過落街!)

又俾佢玩多一頁啦~ 都係唔願行..

於是出絕招 : 爸爸媽媽落街喇~ 你去唔去呀?

如我所料~ 恐龍仔好爽快咁答: YES!

仲想讚佢乖.. 點知一路自己行向大門, 一路喊! (喊咗兩聲啫~)

落到平台, 唔願打招呼, 唔願行, 唔願講嘢... 悶悶不樂!

又要媽媽抱抱!

最後~ 總算摸過木瓜, 睇咗一陣網球 (一早就有人打網球呀!) 跟住又要抱! 爸爸話"不如行到第三座媽媽先抱啦.." 咁佢又唔出聲自己行.. 行到第三座, 媽媽都幾乎唔記得咗要抱, 但係恐龍仔就停低咗, 然後抱住媽媽對腳! 唔出聲~

小朋友就係好唔開心咁喎~

返到屋企, 媽媽送上書書.. 恐龍仔又開始好用心去寫, 連媽媽要返工都唔願理!