餓鬼~

恐龍仔係星期四開始發燒嘅。。。 到今日，第四日喇！尋日開始無再燒，但口腔就變壞，有好多粒粒，食唔到嘢，飲唔到水，講唔到嘢！

今朝，只飲咗6安奶！

問佢有無好到，定越嚟越痛~ 佢話痛咗！

陰功！

帶佢去覆診，醫生話佢好得好快，手腳的疹已經退哂喇！不過~嚟緊呢個星期都係未返得學住！

睇完醫生，嫲嫲話請恐龍仔食雪糕，佢揀咗西瓜味嘅雪糕！但係，食得好辛苦。。 喊住咁，但係又要食喎。。。食食吓，又OK喎~ 終於，因為媽媽一句：「唔好食咁多喇，因住咳呀！」恐龍仔就停咗口唔食喇！

返到屋企，勉強食咗碗粥仔，之後點都唔肯飲多少少奶，又唔肯去廁所，最後喊住瞓咗！

瞓醒，又好勉強咁食咗碗粥，唔肯飲藥 （都唔苦嘅！）見到爸爸媽媽開餐，恐龍仔扁哂咀想喊咁嘅樣！媽媽醒起嫲嫲買嗰件蛋糕，恐龍仔又好痛苦咁~細啖細啖咁食佢件黑森林蛋糕…
到佢見到媽媽食雞亦~ 不得了！睇見佢個樣，於是，媽媽鼓勵佢試一小塊，恐龍仔考慮咗一陣，又勉強試吓：好味呀！
就咁~ 餓鬼出現！恐龍仔食咗兩隻雞亦，媽媽件粟米，最後連爸爸嗰件都唔放過！！！

之後，我地落街買豆腐花，古怪牛眼望望，見到哥哥好鍾意食咁，佢又“呀~”埋一份！於是，兩隻仔不停咁“呀~”！十足兩隻雀仔咁！剩係餵呢兩隻嘢~媽媽差d無得食！

媽媽相信，聽日開始可以食到嘢架喇！雖然都仲未好番哂，但係已經好咗好多喇！仔呀~ 繼續努力呀！