牛牛@5mth

唔經唔覺, 牛牛5個月大喇!

近個幾星期有幾聲咳, 原本食得唔多嘅牛牛 (130ml x6), 呢個星期食 90-100ml x6.. 媽媽睇住倒咗d奶奶.. 好肉赤!

d咳未好~ 晚晚醒幾次~ 超辛苦!

表演食牛:

最慘係.. 本來有一覺可以瞓到6-8個鐘, 呢期變返4-5個鐘! 即係飲兩餐夜奶~ 無命!

半夜仲有d怪事~ 就係手仔鍾意捉住被被, 一係放入口, 一係冚住塊面!!! 仲要係唔識攞返走張被~ 於是.. 依依呀呀嘈醒媽媽去打救佢!

好彩~ 呢兩日有番d胃口喇, 120ml 都餐餐清, 仲食得好快.. 已經加返130ml喇! 嚟緊, 應該可以加奶~

體重~ 大約17磅

試過一次俾香蕉佢食, 無乜興趣, 唔出唔入, 都唔知點算好!

開始好鍾意坐, 仲可以自己坐sofa.. 俾佢睇住哥哥玩, 可以坐半個鐘bumbo chair添呀!

依然咁鍾意笑~

----------------------

牛牛5個月, 媽媽都做咗5個月奶媽喇~

個奶泵呢個幾月古古怪怪, 媽媽好想快d換咗d parts試吓會唔會好d, 但係.. 懶出旺角(要返屋企湊仔呀!) 有日, 半夜唔泵.. 改為手擠, 諗住無咁嘈, 唔想再嘈住嗰個不停醒嘅牛牛~

點知~ 有意外發現: 仲多奶過泵!!!!

原本一日得唔多夠700ml, 到試手擠兩日, 差唔多有740ml! 望住牛牛餐餐清要加奶.. 真係覺得好奇妙! 次次要加奶俾佢, 身體就好似知道咁, 雖然都係唔多夠, 不過已經好滿意!