同學仔birthday party

今日參加咗幼潛時嘅同學仔Joshua 嘅生日會~

恐龍仔好興奮!  可惜得恐龍媽一個帶恐龍仔出門口 (出到去join 爸爸) 所以無帶相機

見到主人家, 肯講Happy Birthday呀! 我地因為就恐龍仔瞓覺豬, 所以成四點半先到, 去到無幾耐就切蛋糕喇~ 恐龍仔都有份唱生日歌架!

我地見返幾個一年前一齊上幼潛嘅同學仔~ 可惜Andrea無嚟啦...

今日~ 恐龍仔第一次自己咬雞翼 (一啖咁多), 仲有食咗d ribs, 一啖仔蛋糕 (唔鍾意食!) 仲有就係好多好多嘅意粉! 好好味呢? 因為平時唔會俾d咁咸嘅嘢佢食嘛!

主人家book咗一個房俾d小朋友玩~ 有波波池, 吹氣彈床, 仲有彩虹傘! 恐龍仔好驚個吹氣彈床同波波池呀! 佢每次嘅第一次都好麻煩.. 怕生!  到玩彩虹傘就超興奮!

走時~ 走咗迫巴士, 恐龍都算乖, 無扭計~ 不過因為食咗好多意粉, 對晚餐嘅興趣不大~

回程~ 响巴士/火車無停過口! 唔停咁講嘢!!!!

返到屋企~ 恐龍仔飲奶奶覺覺.. 恐龍媽見佢R痕, 諗住同佢攞d藥搽, 叫佢响床度等媽媽, 點知一轉身都未到恐龍媽間房, 就聽到人仔喊! 平時佢好叻上落床架喇.. 估唔到.. 唉..

喊到咳, 咳到嘔! 又要換衫抹地, 都唔得閒錫返恐龍仔! 好在呢個時候工人返到, 媽媽又哦咗恐龍仔一輪, 叫佢响床度等媽媽開奶, 呢次又俾媽媽見到人仔唔聽話, 走咗入厨房!!!

恐龍爸事後話: 都好, 佢無驚咗唔敢爬落床..

但係恐龍媽就覺得: 點解次次得返自己一個就.. 出事?!?!

唉...