8週年~ 隨想

又係三月~

1996年3月23日.. 恐龍爸隱瞞返香港嘅日子, 俾咗個驚喜我~

2001年3月24日.. 結婚了!  當時~恐龍爸仲好細, 我地無乜錢, 唔似依家個個都响酒店擺酒, 我地响藍田擺咗12-13圍..

咁就8年喇!

當初有咗恐龍仔, 預產期計落係四月頭, 誰知小豆丁話: 你估我唔到~ 你估我唔到..  係呀~ 一改就改到四月十幾號!  咁~ 唔會希望佢37週就出世架?!

小小豆丁已經就快係兩歲小人兒!

最近, 有個同事話佢識少少點睇面相, 話我"旺夫"!!! 個心諗: 唔出奇呀~ 恐龍爸識我嗰時, 係佢呢生人最失意嘅時候...

咁當然~ 佢付出咗好大嘅努力, 先有今日嘅成就~  佢响呢間美資銀行工作, 雖然都經過好多轉變: 科網熱時入職, 身價急升, 爆破時因為唔再喺電腦公司工作, 逃過一關.. 然後, 公司合並, out source 再 in source 返, employer 個名轉完再轉, 都係响同一層樓返工! 呢次經濟咁差, 佢公司話無乜點受影響都cut咗唔少人.. 佢應該無事, 不過就會辛苦啲.. 多咗OT! 因為大家都緊張咗, 希望d嘢快d搞掂!

但係我自己... 都係咁!  

其實~ 有咗小朋友, 對兩公婆嘅關係影響好大! 無咁多閒情風花說月, 放假都要湊仔, 好似無乜得休息過... 其實都幾攰! 生活壓力又大咗..大家都好辛苦, 多咗磨擦~

但係又好想為恐龍仔添個弟妹, 好矛盾~

最麻煩嘅~ 係專科幫我加咗第二隻藥, 副作用可能會大少少, 對胎兒嘅影響.. 無嚴重問題, 不過, 化學嘢, 四肢健全, 心智ok, 係咪就係無影響?!

無人知!

心大心細... 攞咗d藥, 但係未開始食.. 不停問自己: 係咪要咁?  婆婆一知道有我時, 就無食藥喇! 一齊順利, 我足月出世! 咁~ 我自己生第二個又會唔會咁好彩呢? 上次已經非常幸運, 有驚無險 (其實~ 医生覺得有險架!)

好唔想遺傳呢個病俾小朋友, 但係.. 以現今医學, 呢個係小毛病~  都係生仔好過生女! 起碼無咗大肚時嘅附加風險!