空中飛人

如常一早同兩個仔落平台行一陣.. 玩對小朋友發展好大好處嘅韆鞦..

望一望鐘, 差唔多8點2, 離開遊戲場, 行開去等校車.. 呢一日爸爸唔帶哥哥返學, 所以要坐校車!

出到路邊, 同响水池邊嘅小朋友打個招呼~

身後突然 BOMB 一聲! 咩事呢? 唔通嗰架倒後緊嘅私家車撞到嘢? 又唔係呀.. 佢仲行緊..

然後~ 一個清潔工跑出嚟, 大喊: 救命呀~ 救命呀~ (架車撞到佢?!) 救命呀~ 有人跳樓呀!

吓?!

工人可能唔知發生咩事, 拖住哥哥隻手, 想過去八吓! 我叫住佢! 同另外一位同校車嘅家長傾咗兩句 (好驚呀!!! ) 校車就到喇.. 送咗隻恐龍上車!

我個腦不停轉.. 好在啱啱行開嚟, 好在佢無早幾分鐘.. 頭先都唔覺有人响埋邊打掃架 (如果唔係佢.. 又會係邊個做第一個呢..)

好在... d細路乜都睇唔到!!!

跟住上樓, 準備返工~

再落樓, 有兩架警車响度, 事發地點有d隱閉, 只係响兩座之間望到過去, 所以有車迫响度就乜都睇唔到~

保安話: 個清潔工呆哂 (之後返咗屋企)

諗嚟諗去, 如果恐龍爸送個仔返學嘅話, 我就唔駛經歷呢幾分鐘嘅事! 好恐怖!

有排都唔敢行去嗰個遊樂場玩.. 都唔知幾時先會再去打韆鞦..

 

之後同個鄰居傾開, 佢話d看更話佢知, 當時有小朋友响度玩緊, 好在啱啱走咗, 佢當時都响平台, 聽到..

我話: 嗰個咪係我地囉.. 好險!!!