告別瞓咗3年嘅Dino Den

講咗好幾次, 試探恐龍仔可願意去隔離間房瞓..

唔似佢瞓開嘅上下格"丁"字床, 隔離房無床欄, 只係一套大人瞓嘅子母床!

牛牛出世之後, 我地開咗張網床放咗入去, 陪瞓嘅就瞓子母床囉~

因為講過幾次, 恐龍仔都無乜反應, 我地唔想迫佢, 但係牛牛就嚟識爬, 唔可以再瞓網床上格喇! 所以~ 其實已經買咗床墊(下格子母床係無床墊架), 準備好床欄, 諗住牛牛瞓上面, 工人瞓下格啦..

點知恐龍仔今日突然話要响嗰邊瞓! 仲自己親手搬佢d朋友仔過去一齊覺覺添!

黃昏~ 媽媽問佢: 今晚仲想唔想响度瞓呀?

佢話好呀!

為免有人中途玩嘢.. 於是, 早d瞓嘅牛牛瞓住爸媽張大床, 恐龍仔真係去子母床度瞓 (但係我地未安床欄!!!) 瞓咗~ 再搬牛牛去哥哥張床度~

第一日~ 成功!

 

唔經唔覺~ 恐龍仔返咗屋企啱啱3年喇, 工人姨姨都嚟咗3年! 依家~ 輪到牛牛瞓兒童床喇!!!