病~病~病~

諗唔到應該當呢編blog係邊個嘅日記.. 就不如就恐龍媽啦!

話說~ 細菌小子上星期summer school最後一日放學開始.. 燒咗4日! 媽媽好快被傳染到, 喉嚨乾, 有幾聲咳, 已經快快去睇医生啦, 點知d藥無料到!

呢個時候, 牛牛開始有兩聲咳!

今日, 恐龍媽不支, 太攰喇, 請咗半日病假想休息吓, 可惜, 咳到瞓唔到, 起身預備出去睇医生啦, 恐龍仔醒咗去咗入房..

佢話: 濕濕呀!

我望吓佢條褲.. hmm.. 無著底褲嘅? 佢話响污衣籃!!!

再望望張床.. 係濕咗少少囉.. 見到個衣櫃打開咗, 相信佢自己攞咗褲換, 換完落床放咗濕褲响污衣籃度, 然後出嚟搵大人!

我同工人都讚口不絕!  叻到咁~

之後~ 帶埋佢出去睇医生..

入到医生房, 照例搞搞震啦, 医生叔叔請佢食糖 (都唔明點解d医生會做d咁唔健康嘅嘢~) 出到候診室, 恐龍仔發現咗d意見書, 問媽媽攞咗枝筆, 然後响"医生"嗰欄 tick 咗 excellent! 佢話: 因為請我食糖!

之後~ 我地去咗食下午茶 (姑娘話食d嘢先食藥嘛!  ) 隻傻豬仲填緊意見書, 我就餵佢食d 吐司, 食d雞翼啦~ 到食完, 佢扭哂計話肚餓, 要食雞翼! (佢就係咁架喇~ 有得食時唔會話你知佢想食, 到食完就話仲要!) 最後~ 去咗KFC買雞翼, 都好~ 叫做肯食嘢囉!

返到屋企~ 不得了: 見到牛牛咳醒! 爛瞓牛平時瞓好多架! 諗諗吓~ 都係帶佢去見吓医生好d

就咁~ 我過咗一個極攰嘅下午!

夜晚, 牛牛都係好易醒.. 唉~ 煩c人!