恐龍仔 @ 兩歲八個月

恐龍仔返咗學之後, 真係不停病! 你話佢好病咩? 又唔係喎! 總之就好易咳, 成日流鼻水, 話鼻塞, 仲有肚痛! 好易嘔!!!!

呢個11月, 睇咗五六次中医喇, 好番好多~ 但係又轉涼! 凍一凍又咳返!!! 個傻豬由肯食中藥到最近.. 開始逃走!

返風~仲有一個問題, 就係面仔爆拆! 其實幾年都係架喇, 一凍d就要一個搽好幾次潤膚膏, 不過呢隻嘢唔會定定地俾大人幫手搽架! 仲慘過餵藥! 有時扭計喊, 本來無乜大件事, 但係突然大喊, 點解呢? 原來係d眼淚滴落面仔, 痛痛! 然後越喊越多眼淚.. 越痛! 蠢到死! 有一次以為面仔好返好多, 佢唔停咁喊, 抱又唔係, 問佢係咪痛痛? 邊度.. 搞咗一大輪先知係喊到面仔痛痛! 擔心死~ 變得啖笑!

講嘢方面, 老師見到恐龍媽就話佢講嘢好清楚, 初初以為無乜出奇, 佢已經慢過女仔好多.. 點知原來好多差唔多大嘅小朋友仲係好多bb音!

最近~ 恐龍仔鍾意問: 點解點解嘅?

哈哈~ 都幾煩架!

返學之後睇少咗書, 一來恐龍仔用咗較長時間去適應新生活, 好多行為習慣倒退, 二來病痛多咗, 變咗少咗時間同佢睇書喇!

最近仲發現, 恐龍仔除咗感情豐富之外 (好多時睇書睇到眼濕濕!) 佢仲係一個熱情嘅小朋友! 佢會主動同陌生人打招呼架! 如果見到穿制服嘅人, 身上掛咗名牌, 恐龍仔更加會叫埋人地個全名添! (d大人俾佢笑死咗!)

11月~ 仲係忙於報幼稚園嘅月份, 兩個面試恐龍仔嘅表現都可以, 等等等~ 終於等到讀緊嗰間嘅留位通知, 同埋校內評估嘅結果 (1年4次評估).. hmm.. 有d搞笑 (e.g. 有人要嗲老師!) 有d開心 (e.g. 好奇心/記憶力/小肌肉等好幾項都高於同齡水平) 唯獨專注力! 仲以為佢專注力唔錯添! 不過大大吓八卦咗, 唔似以前咁定喇!

12月~將會有結果返.. 期待中! 不過煩惱可能隨之而來~~ 到底轉唔轉校呢??