魔法小畫家

今朝早~ 又係晨運嘅日子~

再三催促下, 哥哥叫做食咗半碗玉米片, 等埋爸爸沖涼換衫 (今日爸爸早咗起身呀!), 我地一行四人落樓散步!

今朝, 天空一片藍.. 帶少少白色嘅煙霞

牛牛抬頭望天~ 媽媽就話: 今日天空好藍呀!

哥哥攞起隱形魔法畫筆~ 掃掃掃~ 掃成一天嘅藍!

然後點點色板: 替樹幹加上啡色~ 再替樹葉油上綠色!

媽媽都幫幫忙.. 替長椅掃上啡色.. 仲有旁邊嘅一小片樹林..

恐龍仔似乎玩得好高興, 爸爸都幫手油咗幾吓!

然後~ 恐龍仔話要換白色~ 幫天空加幾片白雲!

行吓行吓~ 時間差唔多喇..  雖然恐龍仔好想去打韆鞦, 但係.. 唯有下次先啦!

雖然係短短十分鐘, 跟住就要送爸爸同哥哥去排隊搭車.. 但係一落街, 好明顯地牛牛無咁嘮嘈, 一揹上身就靜哂! 好開心~

希望呢短短嘅時光, 除咗親子之外, 可以俾牛牛認識我地生活嘅環境, 身邊嘅事物.. 仲有~ 愛上大自然!