進化中..

得閒觀察吓d BB, 會從新發現, 一隻有智慧嘅生物係點成長嘅~

就好似.. 口腔期嘅牛牛, 照例乜都放入口, 但係~ 唔睇唔知, 原來佢經過觀察, 然後先放入口架!

每次佢發現大人隻手, 牛牛會首先捉住, 望一大輪, 轉嚟轉去, 跟住.. 定哂咁望住目標~ 然後突然一啖咬埋去! (個咬字可能唔啱, 因為牛牛未有牙仔!)

話說, 牛牛一兩個月時, 媽媽已經攞咗哥哥細個時玩過嘅bb玩具出嚟, 但係哥哥好似發現新大陸咁: 自已攞哂去玩!

d玩具嘅下場好明顯係.. 俾工人放埋一邊, 而哥哥亦唔會再攞出嚟玩!

今晚, 哥哥攞咗個搖鈴出嚟! 媽媽順手攞去俾牛牛玩~ 牛牛望住.. 望住.. 跟手就張開口一啖咬埋去! 呢個時候.. 俾哥哥睇見, 當然唔會放過機會"扮大人", 一手拉開牛牛個搖鈴, 大聲話牛牛: "牛牛~唔食得架!! 係咁玩架~" 然後搖個搖鈴~~ 噹噹響!

媽媽都未嚟得切讚哥哥, 佢已經行開咗, 然後, 牛牛開始自己嘗試搖~ 搖~ 搖~ 搖咗一大輪, 夠喇~ 再張開口...

哥哥真係乖喇! 識得教牛牛玩, 仲會輕輕力, 唔好太粗魯喎~

-----------------

哥哥話要聽故事, 於是媽媽拉埋牛牛一齊聽啦~

原本唔多耐煩要自己坐highchair嘅牛牛, 聽聽吓就靜哂, 好專心咁聽故事!

哥哥呢? 繼續走嚟走去! (有時都唔明佢點解又要人講故事, 自己就做其他嘢~ 嬲架!)

呢次係牛牛第一次聽故事咋! 叻叻!

---------------

趣事一則

媽媽返到屋企, 哥哥玩緊, 牛牛响highchair~

媽媽同牛牛講: 叫哥哥啦!

牛牛: Hmm~Hmm~

媽媽: 係哥哥~ 唔係Ng-Ng呀!

牛牛: Hmm~Hmm~Hmm~

媽媽: 係哥哥呀~ 牛牛!

牛牛: Hmm~Hmm~

....

哥哥: 我係Ng-Ng 呀!