又再回到每日落平台散步嘅日子

經過一輪生活常規整頓, 終於搵到時間落街街喇!

呢一切得嚟不易! 首先係媽媽改泵奶時間表, 再嚟一個貪玩但又唔願食早歺同好好換衫返學嘅哥哥!

仲有一個夜晚活力充沛嘅哥哥~ 夜晚都仲要去放電! 但又唔肯食飯~

總之~ 要同牛牛落街, 要過到哥哥嗰關先! (好唔公平!)

有時~ 對於牛牛嘅一切, 都覺得好配合呢個家~

牛牛同哥哥一樣要早睡早起~ 而牛牛更早! 7點半開始扭計, 8點飲奶瞓覺! 呢個時間, 方便我地等哥哥食完飯, 工人煮晚飯, 然後餵奶Zzzz, 跟住工人食飯洗碗, 再瞓恐龍仔瞓~

飲奶問題~ 每次媽媽要減奶, 牛牛就自己跟住減! 佢係越食越少! 少到媽媽開始驚~~

我地無話唔俾抱bb, 我地相信只要佢地需要大人嘅關注, 佢地就有! 抱從來都唔係問題! 但媽媽最近好發現: 牛牛係一個可以自己坐响highchair 玩嘅bb! 媽媽諗: 一個被愛嘅bb, 係充實嘅, 係有安全感嘅~ 係可以獨處嘅! (哥哥當年都係咁~)

牛牛好鍾意睇住哥哥玩, 睇住大人做嘢, 到目前為止, 只有哥哥時間, 未有爸媽同牛牛獨處嘅時間!

所以~ 牛牛對我地嘅生活影響唔太大, 主要係多個人仔要搵人看住! 佢經常係無得出街嗰個!

講返晨運~ 係媽媽特意要為牛牛做嘅一件好重要嘅事!

見到哥哥行咗年幾晨運有幾多好處, 當然要有牛牛份啦!  我地都係3人行, 不過唔係爸媽+仔, 而係媽媽+兩兄弟!

其實牛牛早瞓, 夜晚無乜機會同爸爸玩, 但爸爸又想多陪哥哥.. 希望到牛牛學行時, 爸爸會改變主意, 分少少時間陪牛牛啦!