~ 恐龍家 ~ : 2月 2010

2010年2月28日星期日

不想長大的恐龍仔

唔係想講呢個weekend恐龍媽有幾辛苦喇.. 只係想講講..今日有個小小插曲~

一早~ 恐龍媽問阿仔: 你鍾意弟弟定妹妹呀?

佢答: 哥哥!

再問都係相同答案!

之後~

話說.. 恐龍仔好鍾意睇地圖, 好鍾意睇地鐵嘅路線圖~ 咁呢日, 恐龍媽自己帶住隻仔去上音樂堂, 恐龍仔見到地圖就叫媽媽抱佢睇, 恐龍媽依家嘅身勢, 又點抱呢? 又係話佢大個仔喇, 叫佢食多d飯, 快高長大, 夠高就睇到囉!

但係呢次~ 佢好唔開心, 仲話佢唔要食多d飯, 要媽咪抱! 因為佢重嘅話, 媽咪就抱唔到佢!

OMG~

去到婆婆屋企.. 因為恐龍媽尋晚為食飲咗半杯珍珠奶茶, 成晚瞓唔着, 咁食完午飯就瞓咗一陣, 婆婆帶咗佢去遊樂場.. 返到嚟, 恐龍仔破例肯瞓喎! 不過一個鐘後.. 熱醒咗, 喊哂~

咁人仔又未醒得哂~ 嗲住媽咪, 要抱抱.. 恐龍媽都未試過好似抱住隻bearbear熊咁抱住隻仔.. 大家都好enjoy~~

於是.. 就教佢要hug hug喇..

之後, 公公婆婆當然要引佢玩啦, 咁佢醒哂之後, 叫婆婆抱佢睇嘢.. 事後婆婆講返, 恐龍仔話其實佢肚仔餓, 不過媽咪話佢重, 抱佢唔起!!!! 所以唔食飯~

又又~ 佢又話要個哥哥..

婆婆哦咗恐龍媽一輪.. 其實都一路同佢講, 佢大個仔, 爸媽抱佢好辛苦.. 爸爸手痛(係真架!)

估唔到..

其實恐龍仔好耐無高/重過架喇~

唉~~~

---------

之後兩日, 其實都有教佢hug hug~ 希望佢會明白, 爸媽幾時都咁錫佢.. 我地仲可以hug hug架嘛! 但係佢要錫爸媽嘅, 唔係唔食嘢囉!

2010年2月26日星期五

2010 BB春季購物節暨兒童成長教育展

去咗一轉~ 個場對比每年8月嘅Baby Expo, 真係好細, 而且俾NB嘅嘢好少.. 好似奶粉廠呀~ 就個雪印同XO! 奶樽嗰d都唔多!

主攻教材!

恐龍媽一入到會場就俾Cordlife嘅職員跟住, 講sorry都無用 (可能應該講: 我join咗喇~ 唔該!) 然後入咗荷花.. 我最” 恨” 嘅 babycocona 竟然$999 (VIP)!!! 唉~ 都係太貴喇, 好想有人送.. =P

之後見到your child can read, 睇咗少少demo, 個職員話俾3+嘅小朋友, or YBCR之後 (佢話有個媽媽俾BB 1.5mth就開始睇YBCR, 10mth 開始睇 YCCR! Crazy!!! ).. $880, 但係如果套YBCR响佢度買, 會再減.. 會場同出面一樣價! 唔~咁唔買住喇! (不過其實買得過嘅~)

再行.. 去到小人國, 恐龍仔至愛嗰套中文兒歌就係舊年8月响呢間嘢買嘅, 今次.. 掃咗成套普通話歌 ($103@, $270 全套) 希望隻仔鍾意啦! (返到屋企俾佢見到, 佢問: 邊個買架? 然後就開始播, 入哂迷!)

繼續行.. 新雅都有一個小檔, 3本幼兒書只係$50 (原價$22@) 恐龍媽買咗6本最新出, 關於德育嘅..

講咗咁耐都係買嘢俾個大嘅, 咁細B呢? 其實都買咗3件NB 開胸body, 仲响cotton candy kids買咗條sling ($80) 同Mag傾咗幾句, 大住個肚都仲坐陣! 好嘢~

最後入返荷花訂書.. 先發現市中心附近d 7-11唔係on-list! 無得攞書, 咁點訂呀?! 最後個IC手寫上去, 話ok.. 都唔知係唔係嘅~

5月babymo會有個expo, 8月就係荷花個大型Baby Expo~

到時再戰!

2010年2月24日星期三

救命呀!

恐龍仔呢排又唔願食晚飯, 含飯情況極嚴重!

之前嗰晚, 用咗半個鐘一路玩一路食.. 都係食咗1/3碗, 我叫工人收嘢, 佢就喊住話重要, 但係口嗰啖就唔願吞! 最後再搞咗半個鐘先肯吞咗嗰啖飯!

c未!?!

問佢鍾意食乜.. 佢話sushi喎~ 好啦, 第二晚整俾你食啦!

尋晚~ 一放工就返去整sushi, 之前睇定點整玉子燒, 返到去就即時開工!

都無乜期望佢會食好多.. 但係呢隻衰豬竟然玩我d紫菜! 放咗入口唔鍾意就一小片一小片咁掟落地! 叫極都唔理!

好喇~ 完全喇.. 咬咗一啖就唔食, 都知佢唔鍾意用手攞嘢食, 咪叫工人攞叉俾佢啦~ 佢揀哂d蛋食!

又開始要玩唔要食嘢喇! 咁就閂哂d房門, 去走廊企吓啦! 喊到.. 唉~

再嚟過~ 食一啖~ 又要玩!

到我食埋飯, 佢都叫食咗一半, 最後搬師走廊加咗條芝士腸再食多幾啖白飯~

我知自己唔係幾得喇.. 到隻曳豬刷牙, 我嘅血壓高到15x/98!!!

唉~

阿仔~ 你阿媽唔激得架!

又要改變戰略: 瞓醒唔俾食嘢, 早dd食晚飯, 問咗少爺想食乜先煮, 唔迫, 半個鐘時限, 响走廊食, 唔俾玩, 快d食完就走得!

真係唔明, 點解會時好時壞嘅?!

2010年2月20日星期六

恐龍自學日文

啱啱睇返, 原來未post過呢幾張相~

呢日係31/1/2010, 恐龍仔攞咗爸爸本初級日文書睇, 然後開始寫..

好鬼認真架!

仲叫媽咪睇吓啦~

不過.. 佢之後發現咗樣更好玩嘅嘢..

就係搞破壞喇!

2010年2月19日星期五

New Toys again~

恐龍媽放假嘅日子, 教具店東主話有新貨到, 叫恐龍媽去睇吓.. 咁好啦, 睇吓有乜收獲先:

(懶影相, 本來想copy d相架, 點知唔得, 唯有加link啦~)

Monkey Match 猴子配對 - 幾特別, 小朋友可以自己玩, 學習唔同事物嘅關係

王子與龍 - 想揾d要用腦嘅嘢, packing話5+喎, 唔知幾時玩到呢?

動物圖像配對盒 - 難得揾到mirror image嘅圖! 哈哈~ 店主話無乜人有興趣, 得我同佢!

套柱螺絲工具車 - 小手要做多d小肌運動呀! 而且到e+都未識邊個方向上緊同轉鬆..

其他推介~

磁石積木多樣拼盤 - 我地有類似嘅玩具喇, 所以無買, 不過呢set真係幾方便, 又易收埋!

其實恐龍仔仲有幾件玩具未開, 上次買嘅Magnetic Match Ring (for 3+) , 都係最近先開出嚟玩, 恐龍仔一口氣玩咗大半個鐘, 砌咗2x個pattern (total有40個), 如果唔係要洗白白, 可能一路玩落去!

2010年2月16日星期二

年卅晚

恐龍仔瞓醒晏覺, 恐龍家就出外行花市! 呢日又凍又落住毛毛雨, 我地一行3人著住風衣戴埋帽就行~

因為天雨關係, 生意難做~ 竟然有人行埋恐龍仔度硬sell 喜羊羊拼圖(12塊/$5), 加送mini棒棒氣球&兩粒糖! 恐龍媽無乜興趣, 不過恐龍爸話5蚊啫~算啦! 就咁~ 恐龍仔就一路玩住棒棒, 恐龍媽就攞住拼圖, 袋住嗰兩粒無人食嘅糖..

我地响濕貨區行咗幾個圈, 想買盤花, 開到盡嘅水仙都唔平, 成百幾二百蚊架! 最後我地搬咗盤芍藥返屋企

恐龍仔中段已經嘈哂話褲褲同鞋仔濕濕, 要返屋企呀!

大年初一

今年嘅初一節目有d唔同, 只係上公公婆婆屋企玩.. 多謝舅舅一家去酒樓攞位飲茶, 我地响婆婆度玩咗一輪, 食咗好多開心果同蘿蔔糕先落樓, 恐龍仔好鍾意表弟嘅玩具, 佢兩個繼上次造節之後, 又繼續"爭玩具"!

之後上咗婆婆度再玩一輪, 呢次爭玩具爭到有人想喊~ d大人當然當睇唔到啦! 爭吓好呀! 只要唔大打出手就無問題啦!

3點左右, 我地返屋企喇, 恐龍仔想玩唔想瞓, 但响巴士度終於不支~瞓咗!

大年初二

一早, 上咗爺爺嫲嫲度拜年, 食糕糕~

中午~ 節目係團拜, 我地出咗黃大仙見舅公舅婆表舅父仔等等~

我地經過仲買咗個小風車添~

呢餐飯都幾好味, 不過貴d, 無計啦, 小朋友多就要訂房, 咁就要訂酒夕~

今日恐龍仔唔瞓, 玩到傻哂, 黃昏時候嫲嫲上咗嚟煮開年飯, 叔叔同姐姐到上埋嚟玩, 因為恐龍仔無瞓晏覺, 所以... 8點未夠就開始發癲, 大人都未開飯, 佢就要上床瞓喇! 連湯丸都未食呀!

大年初三

完成咗拜年嘅節目, 呢日我地上霖霖屋企搞事!

恐龍仔見到人地嘅玩具, 自己興趣啦, 仲追住貓咪"妹妹"玩, 搞到妹妹避開佢! wahahahah~

恐龍仔呢日好叻, 自己食到碗幾螺絲粉呀!

之後我地去咗playtown玩, 呢次係恐龍仔第一次去, 恐龍媽無入去呀, 聽聞恐龍仔好鍾意咁..

但係呢兩個小朋友無瞓晏覺, 開始反常, 去到晚飯時間, 恐龍仔連至愛鍋貼都唔食!

----------

其實好怕放假, 次次都發癲! 唉~

2010年2月15日星期一

恭喜發財!

早排嫲嫲送咗隻鸚鵡俾恐龍仔.. 呢隻嘢會錄音然後播返出嚟 (兩次!)

聖誕, Caroline 姨姨送咗隻識講故仔嘅Elmo..

兩隻都好嘈!

不過都有樣好, 鸚鵡識講"恭喜發財"!

最近兩日, 恐龍仔愛上..

嘈到想鬧人! 恐龍爸話十足有兩隻鬼佬哎交! 但係恐龍仔好似好欣賞咁!

本來換哂衫要出去拜年, 都忍唔住要影低佢!

2010年2月11日星期四

花市活動

呢一日, 係學校華服日, 小朋友星期一帶咗d新年裝飾返學校, 成個星期嘅主題係新年, 去到放假前嘅呢日, 全體老師都穿上華服, 仲有一大班小朋友一齊, 好熱鬧呀!

是次活動, 有家長義工幫手, 咁~ 恐龍媽大住個肚就當然唔會做義工啦! 多謝哂霖霖媽媽, 佢幫恐龍仔影咗好多相呀!!!

嚟個大合照先~ 恐龍仔個樣好傻呀!

黃老師點解要安撫呢隻嘢呢?

靚仔! 呢件衫係Angela姨姨响兩年前送俾我地架~ 估唔到仲啱著! 真係唔講, 人地以為係今年買架添! (阿仔, 你太細粒喇!!!)

霖霖件衫都好靚靚呀!

仲有遊戲玩喎~

恐龍仔好似好有興趣咁喎~

笑得好.. 含蓄咁嘅?!

呢個樣就似平時嘅曳人喇!

兩隻嘢又開始勞動喇!

打鼓?! wahahahaha~

再次多謝霖霖媽媽!

2010年2月10日星期三

牛牛@29wk

又係恐龍媽覆診日~

am, 心臟科~

佢對恐龍媽加藥後嘅反應好唔滿意, 要改變食藥時間 (由早晚變早午晚, 煩!) 希望藥力平均d, 血壓穩定d~

一路話唔放心.. 要過年後再見佢喎.. 唉~

pm, 產科~

佢對個心臟科嘅concern唔多關心, 話恐龍媽上胎都無乜事, 捱得到38wk, 都只係血壓高, 無妊娠毒血, 所以呢胎唔係太過擔心有變~ 一來過咗食藥嘅時間 (asprin~) 二來d藥會有副作用.. 佢話如果有乜嘢, 最多Plan B 去PWH! 睇吓到時bb有幾大, 如果太細嘅, 就去PWH生囉! 總之我留意有無頭痛肝痛之類嘅問題~

遲d可以驗血睇吓Platelet/uric acid/liver function 會唔會有問題~

好喇~ 照照佢先!

上次見到長腳叔叔, 都估医生搞錯咗架喇..

今次讀數:

BPD 7.7cm 29w5d

AC 25.4cm 29w1d

FL 5.6cm 29w2d

average 29w3d 1467g (3.2LB)

腳仔正常返哂!

牛牛e+頭仔向下, 胎盤胎水無問題, size正常, 中碼, 無乜特別嘢~ 基本上唔問都唔講, 唔講即係無問題!

牛牛~ 努力呀! 照咁睇, 出世時一定大隻過哥哥~

响度都希望表姐仔努力加油呀, 佢應該大過牛牛3星期, 不過以size計, 可能大過牛牛個幾星期咋~ 加油呀!

2010年2月8日星期一

大曳人!!!!

每逢週末.. 又係出事日子!

呢個星期日, 我地又係上音樂班, 今日係第一個學期最後一堂, 小朋友上次試過一次响老師面前表演, 今次就叫多一個觀眾, 所以恐龍媽都有去~

上次, 恐龍仔係識邊唱邊做動作架.. 今次就唔願唱加唔願做! 老師話俾多次機會佢, 呢次肯唱喇, 不過自創動作!!!

恐龍爸唔多高興, 有乜辦法令到d曳人知道要盡力做好每一件事呢?!?!

之後, 去婆婆度, 又唔瞓覺 (都預咗架喇~) 等恐龍媽休息咗一個鐘, 我地行吓超級市場啦! 晚飯時間, 扭計唔願食, 但係坐落就高速解決咗碗飯! 仲不停話要牛肉添!

見你咁乖, 獎你多一個故事啦!

返屋企一上的士就開始出事喇... 恐龍仔第一時間讀出司機叔叔個名, 咁司機叔叔就好興奮, 唔停咁同呢個小朋友傾計, 無幾耐, 司機講咗句"老友", 咁呢個曳人就講"蘿柚", 然後狂笑! 唔知點解.. 變咗"dum你個蘿柚", 恐龍爸媽開始叫停, 但係曳人仲唔停咁重覆同笑.. 過咗隊道無幾耐, 已經無哂d故仔喇! 但係佢仲好興奮.. 繼續笑!

叫極都唔停, 無收!

司機叔叔都問: 今晚會唔會發惡夢架?

甚少~

返到去, 洗白白, 總算冷靜落嚟, 爸爸都同佢講咗一個故事, 然後飲奶奶覺覺豬.. 中途, 人仔話凍 (唔記得俾被被佢冚~) 咁恐龍爸冚好被, 恐龍仔就瞓着咗喇..

兩個鐘之後.. 恐龍媽聽到外面有怪聲, 好似恐龍仔喎.. 恐龍爸仲話"乜都關你個仔事?!", 第三次, 恐龍媽忍唔住出去睇吓, 個傻仔喊到cc吓, 成頭汗! 媽媽抱住一陣, 見佢無喊喇先放返落床, 好彩無再喊返, 自己瞓覺覺.. (真係發惡夢定係熱過頭呢?!)

--------------

今朝, 叫醒隻仔, 佢醒咗無幾耐 (仲响張床) 就突然攞住恐龍A話: 我唔再講喇!

跟住攞住恐龍B話: 我會再講架!

然後又開始發作喇!

呢次, 當然又俾人鬧啦~ 媽媽嬲喇, 唔要同個無禮貌唔聽教嘅小朋友玩.. 無幾耐, 佢打開媽媽房門, 問佢仲講唔講, 佢話唔講喇! 媽媽帶佢見爸爸, 再講多次sorry同埋以後唔再講~

聽住先啦!

----------------------------

唉~ 其實佢"玩文字" 都有兩三個星期, 分別幫嫲嫲同爸爸改咗花名, 諗起就大笑.. 仲有當人叫醒佢, 佢自創"早bye" , 然後每朝都記得講返, 跟住傻笑!

好頭痛, 恐龍仔乜都唔怕, 好貪玩, 完全唔聽教! (唔好迫我出手呀!)

可以想像, 大d如果仲係咁, 會成日見家長! 佢會係老師又愛又恨嘅出位學生!

點樣可以令佢知道, 我地要"控制"自己嘅行為, 包括適當時候要表現最好, 聽大人講~

可以想像.. 呢隻仔就嚟識頂咀!

2010年2月6日星期六

第一份成績表

今日係家長日嘅大日子, 恐龍爸工作完畢無機回港都經深圳返.. 都係為咗呢份成績表!

尋晚問恐龍仔要唔要跟埋去, 佢話好, 今朝問咗幾次都話唔要, 見到爸媽著鞋時又話要去! 咁就快d去換衫啦~ 煩人!

去到都等咗半個鐘, 學校播咗d小朋友上堂嘅影片幫家長解悶, 但係點解見到班主任黃老師好多次, 都見唔到恐龍仔嘅?!?! 原來呢段片都幾新鮮, 係啱啱呢個星期拍架, 恐龍仔有d咳, 要帶口罩, 所以媽媽見佢唔到!!!!

不過到揾到.. 都係覺得呢隻仔唔專心上堂, 掛住望攝影機或者周圍望嘅!

入到去班房, 枱面就係份成績表喇: 好多A噃~ 老師講返d評語..

(成績表咁寫) 個性開朗，樂於參與群體活動，思考敏捷，善於觀察事物變化，學習主動，勤學好問，記憶力良好，中英認讀表現優良。

係專注力差dd, 好快就問其他嘢~

講吓講吓, 人仔插咀問老師: 點解某組張枱唔見咗嘅? (按: 呢間係平時佢上堂嘅班房, 有3張枱, 分別係紅黃綠色, 我地坐紅組枱, pm班家長/老師喺另一張枱..)

老師仲話, 尋日有講俾小朋友聽, 今日會係家長日, 老師會同daddy mami傾計, 但係恐龍仔反應好特別, 佢好似唔係好鍾意人哋講佢咁喎~

呢隻仔~ 都知你有d嘢架喇, 有街街都唔願去, 願來係唔要爸媽同老師傾計!

另外, 學校派咗份相片portfolio俾家長睇返小朋友响學校影嘅相 (要還架.. 學期尾再派返) 仲有之前個project嘅summary.. 小朋友响學校"玩"嘅情況, 有9頁紙呀! 恐龍仔仲做埋封面"人物"添! (有個傻仔攞住個放大鏡望住阿主角"柚子")

至於成績表..返到屋企數過, 17個關於體能(5)/智能(8)/語言(4)嘅項目, 得3個B (雙腳向前跳/拋物技巧/辨識不同聲音)其他全A! 至於學習態度(6)/社交情緒德育發展(6)/美感發展(5) 17項正面嘅評述, 係"有時"樂意接受指示/專注地工作和遊戲, 其他嘅都係"經常"~

今日, 仲遇到幫小朋友嘅姨姨萍姐, 佢細細聲話俾恐龍媽聽, 恐龍仔好乖 (乜唔係monkey咩?!)

其他老師仲話, 唔怪得恐龍仔話自己係哥哥啦~ (哈哈! 希望第時唔好變番bb啦!)

Honey, mami is proud of you!

2010年2月5日星期五

Dino Dad is not home (Day 3)

I don't want to type Chinese again..

Dino dad is missing!

Well.. he told me that he has a business trip to 杭州, leave at around 8am, and come home at around 11pm, tonight. Didnt mention anything related to the flight no., hotel nor airline.

When I tried to check the HK Airport arrival website, I can't found any flight coming from 杭州 after 6pm! OMG!

Dino Dad is missing!

Actually, he told me that originally there's no flight available after work, but finally got one. We need to go to Dino's first Parent's Day tomorrow. And that's why daddy need to come back after work, but not staying for one more night.

So, where are you????

need to come back from another airport?