我愛大自然

呢排工人放大假, 日日湊仔出街.. 目的地包括近近地嘅公園 (遊樂場+花草樹木+藍天白雲+鳥語花香+海)後山, 濕地公園, 北潭涌.. 附近海邊(石灘)

其實..都係d平日想去又懶未去嘅地方~

令恐龍媽有感而發嘅~ 係濕地公園遇到嘅一個爸爸, 佢同個仔講: 呢度就係大自然喇!!

吓?! 乜唔係濕地嘅公園咩?!

恐龍家住喺郊野公園附近, 高密度住宅嘅盡頭.. 初初住時, 腳下一大片松樹林! 依家~松樹林就只淨返平台旁一列老松樹, 恐龍仔知道叫樹林~

未有孩子時~ 會話等有之後就搬出市區; 但係依家, 真係唔願搬! 恐龍爸話: 呢度真係好~ 有山有水!  (唔怪之得聽見有人為孩子由九龍塘搬嚟呢度住..)

我地連附近嘅石灘都未去過哂呀! 仲有大把空間發掘!

大自然? 跟本就响身邊! 有太陽每朝出現 (屋企向東!) 晨運時經歷四季天氣轉變, 仲有樹木同埋小動物相對嘅轉變 (依家夜晚有青蛙叫聲!) 走遠少少.. 去聽海浪聲, 看潮漲海浪湧埋嚟(跟住逃跑)

想講: 濕地公園係一個好接近自然環境嘅一個窗口, 呢個係一個叫"濕地"嘅habitat~ 生活响呢度嘅生物好特別, 有自己一套方法去適應咸水呢個特殊嘅生態環境, 如果你未做功課去, 就無咗部份教育意義, 恐龍仔好好彩~佢阿媽讀生物出身嘅(多謝恐龍爸提醒~其他人好可能唔識呢d嘢.. 不過mangrove係A-level biology嘅嘢!)

想講~ 教孩子懂得欣賞自己四周嘅事物, 家長可能都要做d功課..一齊學!