超級興奮

每逢週末, 爸媽成日陪住恐龍仔, 佢就超級興奮~ 呢個星期都唔例外!

星期日, 又係工人姨姨嘅休息日, 一早由恐龍媽接班, 恐龍爸瞓醒後, 兩父子出發去上音樂堂!

呢日, 恐龍仔要表演唱歌加做埋動作, 之前一路唔肯做動作嘅曳人, 返到琴行响老師面前又照做喎! 都話佢識架啦! 只係人地好有性格, 唔鍾意做俾爸媽睇之嘛!

之後又去咗遊樂場玩一陣, 然後去食晏~

本來恐龍爸有嘢做架, 但係最後都陪兩母子返屋企, 恐龍媽負責瞓, 恐龍爸負責陪仔瞓!

呢隻monkey.. 又唔願瞓喇! 搞咗成個鐘, 恐龍爸鍾意放棄, 放仔落樓玩, 恐龍媽都瞓咗個幾鐘!

返到屋企, 轉到恐龍媽接更, 我地不如去剪頭髮啦? 咁恐龍爸可以休息一陣..

响髮型屋, 門口寫住:歲晚加$20 (嘩! 好貴呀!) 不過見佢呢間咁鬼近又有bb櫈仔, 試吓啦!

最後, 我地等咗廿分鐘都有(好驚有人唔耐煩要返屋企!) 先有個哥哥行埋嚟, 我地唯一要求係:前面唔好剪咁短 (佢前面長少少先可愛嘛!) 哥哥少少~少少咁剪.. 一邊又話之前d頭髮太碎, 唔可以剪太多.. 其實恐龍媽唔係幾明, 不過總算有人執一執之前剪到一忽忽嘅恐龍頭... 咁算啦.. 最後$99剪咗個唔多覺剪過嘅頭!

到呢一刻, 5點幾, 都仲係充滿能量, 跑嚟跑去, 一邊跑仲一邊笑到哈哈聲! 真係有d懷疑:到底係咪正常? 點解佢唔識攰嘅??!?!?! 如果唔係Sam Sir話過Hyperactive唔係咁嘅, 真係會帶佢去check check~

又返屋企.. 洗個白白豬先!

然後又到晚飯時間, 今晚近近地, 茶軒啦! 食乜? 恐龍媽至愛嘅肉燥飯! 都估隻煩人鍾意食架喇, 雖然無high chair, 但係都好快手咁自己食, 連蛋都追住要食多幾舊!

食食吓, 當然就要搞搞震啦~ 卡位後面有個長髮"姨姨", 曳人成日搞人地d頭髮! 搞咗幾次.. 最後"姨姨"轉頭同我地講"唔緊要.. 不過呢位長髮人士原來有鬚架!  嚇到恐龍媽同恐龍爸.... 忍住忍住唔好笑呀!!!

返屋企途中, 又係恐龍仔同爸爸玩超人仔嘅時間, 呢隻仔仲係high high地, 笑到癲咗!

返到屋企, 如果乖豬擦牙就有多一個故仔, 如果曳豬就扣一個, i.e.得返兩個! 呢隻仔好識討價還價, 佢話要5個喎! 咁好啦~ 媽媽就講3+1個, 睇吓爸爸講唔講一個啦! 最後.. 聽完故仔, 飲完奶奶, 已經無哂反應, 去咗同周公玩喇!

爸媽都唔明, 點解佢咁好精力, 點解要玩到最後一刻, 然後昏睡! 點解唔識攰架?!

 

爸爸生日快樂!

多謝霖霖媽媽相助, 我地用八折响東海堂訂咗個芒果蛋糕, 朝早同恐龍仔玩咗一齊就攞蛋糕返屋企, 而恐龍爸就負責瞓覺同响屋企叫pizza~

恐龍仔好叻, 一返到屋企就同爸爸講Happy Birthday, 不過呢個爸爸隻耳有d問題, 要人講到第三次先聽到!

呢個傻佬無諗住預個工人, 只係叫咗個2人餐, 唔緊要啦~ 我地有甜品嘛! 食完pizza, 其實大家都唔飽, 响恐龍爸未發作之前, 恐龍媽攞咗個點着蠟燭嘅蛋糕出嚟~ 有d人仔已經等唔切, 想吹蠟燭!  喂喂~ 邊個生日呀?!

好在~ 主角對個蛋糕都幾滿意

之後係午睡時間~ 全屋恐龍去搵周公.. 最早醒嘅係恐龍仔!

晚餐去邊度呢? 未諗, 不過我地去騎木馬先啦! 嘩~ 好多人呀! 等咗成半個鐘呀!

問人仔鍾意西餐定中菜, 佢好快就答西餐! 到底~佢知唔知係d乜呢?? 恐龍媽想去d靜少少坐個好d嘅地方, 最後我地決定去Mr. Steak! 去到要等位呀, 不過都唔駛等好耐~ 因為恐龍仔鍾意食麵, 於是恐龍媽响餐牌上有限嘅麵餐裡面, 點咗和牛+蟹腳伴麵.. 恐龍爸就點咗和牛+龍蝦~ 上枱: 原來恐龍爸都有麵麵嘅, 不過隻龍蝦好細隻, 相對隻長蟹腳, 就真係唔多抵喇!

恐龍仔自己食麵, 仲食咗豆豆同牛牛, 不過就對d蟹腳無乜興趣.. 坐咗成個鐘, 都算好叻架喇! 最後仲食埋甜品添!

之後出咗平台玩.. 又玩到唔捨得走, 喊哂! 要抱佢離開現場!

返到屋企差唔多十點喇! 又破紀錄喇!

 

好嗲嘅恐龍仔

恐龍爸最近較忙, 雖然定咗七點半開飯, 但係好多時佢都返唔切, 但係煩人食飯超煩, 唔想拖吓玩吓, 大家都唔高興, 最近決定咗八點前收工, 食飯時掛住玩就無story time, 飯後無人陪佢玩..

呢日我地七點半前開飯.. 八點前收到工, 玩一陣, 恐龍爸終於放工, 不過可能一返到嚟隻仔就要瞓喇~

我地刷完牙, 講完故事 (恐龍仔話: 我要5個故事!) 差唔多喇, 爸爸返到屋企!

黑面人一見到個仔話: "我要聽故仔!" 就抱起隻仔講: "你錫我一啖先啦~ "

跟住..    笑哂啦!

好啦~ 講1個故仔啦!

講完~ 爸爸要食飯喇!

恐龍仔: 我錫咗3啖哦!

恐龍媽响房聽到.. 笑到 哈哈~ 你鬼馬喇!!!

最後, 爸爸唯有講多一個故仔啦!

---------------------

要瞓喇.. 又想媽咪陪, 經驗話: 呢隻仔由媽咪陪就唔願瞓, 除非好攰好攰!

媽媽唔係唔想陪仔, 而係個肚一日一日大, 要定定地坐响度有一定難度, 已經攰喇, 仲要坐得咁辛苦.. 真係唔想陪, 但見到佢好可憐咁: 我要媽咪陪呀~

點呀?!

陪你都得, 你要乖乖瞓覺覺架, 如果唔係媽咪出去叫auntie入嚟喇!

佢話: 係呀~ 我要瞓覺架~

信嘛? 半個鐘頭裡面, 不停講嘢, 有時起身抱住媽咪隻手, 俟個頭埋嚟, 好嗲咁講: 媽咪呀~

點呀?

又唔出聲!

如事者.. 真係頂唔住喇, 隻牛都唔多滿意, 就出去搵救兵~

恐龍仔喊哂.. 都喊咗幾分鐘, 好可憐咁! 唉~ 你又唔乖, 咁點呀?!

 

恐龍哥哥

一開始就同恐龍仔洗腦, 經過呢幾個月努力, 都見到d成效架~

好似有時恐龍媽攤咗响sofa, 恐龍仔會突然去埋嚟對住大肚講:

哥哥讀緊書呀!

又或者會放隻耳埋嚟聽吓, 問媽媽牛牛嘅心跳喺邊?

依家有乜好嘢, 佢會數埋牛牛嗰份, 起碼响佢個小世界入面, 牛牛係其中一份子!

呢排見千色減價, 近近地去望吓啦, 起初都怕佢唔鍾意媽媽買嘢俾牛牛而無佢份 (見佢唔肯睇吓同埋穿牛牛斗篷), 第二日同佢shopping時, 專登買咗樣同恐龍爸商量過要買嘅嘢俾佢先, 俾佢自己揀顏色, 然後先再去睇其他嘢, 點知佢個口唔停咁話:

買嘢俾牛牛!

買呢個俾牛牛..

走喇~ 返到屋企, 仲講緊:

去shopping, 買嘢俾牛牛!

聽完, 做阿媽嘅終於放下心頭大石, 佢應該唔係妒忌牛牛, 响佢個世界, 相信暫時仲未有物質呢樣嘢~

 

同老人家傾開金錢/養仔嘅問題, 先知道做父母嘅駛錢好豪, 但到自己用嘅, 就會嫌貴! 再計計數, 養一隻恐龍目前要6千多一個月 (學費+半個工人+奶粉尿片) 如果計埋衫褲playgroup, 近7千! 嘩~ 養兩隻真係... 好恐怖! 唔怪之得恐龍爸話仲貴過供一層樓!

所以成日話最辛苦係兩個要讀幼稚園嘅時候, 希望3年後恐龍仔依然好運, 入到心儀嘅直資, 學費唔太貴嗰間! 成5千一個月嗰間, 真係俾唔起!

牛牛@26w4d

26wk, 响媽媽嘅過山車式血壓+血糖影響吓, 會係點呢??

心臟科話擔心血壓控制得唔好, bb吸收唔到營養, 會細隻 (甚至唔長)

糖尿科就怕血糖過高, bb會大隻!

咁即係點呢?

阿医生今日好忙, 遲大到, 無乜心機仔細度咁..

FL 28w3d

AC 27w0d

average 27w3d, wt 1.18kg (2.6磅)

產科話: 要睇bb吸唔吸收, 會睇肚圍 (AC), 咁似乎唔駛擔心血壓問題..

但係我睇嚟睇去.. 點解會係個"長腿bb"呢?? 係咪度錯咗呀? 拉到個體重成兩磅半, 大咗成個星期! 唔好嚇人啦!!!

其他嘢, 一齊正常, 唔駛擔心喎~

不過胎盤都係仲响子宮位.. 可以唔駛煩會唔會順產喇!

-----------------

問恐龍哥哥, 你係人定恐龍嚟架?

恐龍哥哥: 恐龍!

問: 咁牛牛呢?

恐龍哥哥: 恐龍!!!

問: 媽咪同爸爸呢?

恐龍哥哥: 恐龍!!!

ok, 成屋恐龍!

長隆之旅

繼早幾個星期馬術學校一日遊之後, 恐龍家終於confirm到去長隆過一晚喇! 呢次幾經波折, 話去又唔去, 返轉頭又話去.. 多謝霖霖媽媽唔嫌我地煩呀!

大隊決定坐8:40am嘅船

 

我地經過兩個鐘嘅船程

再霸到頭位上酒店巴士 (多謝樂樂爸爸, 因為原來會唔夠位坐架!), 我地12點前到達長隆酒店, 第一時間check-in! 霖霖媽媽發輝咗佢嘅專長: 我地upgrade咗去奇趣房呀!   間房好大好靚, 特別係個浴室..

 

 Hehe~ 我地影咗一輪相就包車, 一行9個人出發去"四海一家"食lunch喇!

d嘢食ok啦, 係唔多熱, 款式勁多, 總有d啱心水, 但係大肚人唔敢亂食嘢, 所以好難俾comments, 不過唔鍾意食buffet嘅恐龍爸話ok, 都應該ok架喇!

(呢隻係牛牛送俾哥哥嘅恐龍仔, 霖霖想玩埋一份!)

恐龍仔? 自己食咗一球雪榚! 同埋兩塊蝦片!! 仲有d炒面.. 其他嘅, 唔多食~

跟住就出發去動物園

(恐龍仔: 我要坐呢個車車呀!)

到達時3點正! 個售票員都覺得我地有d怪, 咁遲先入場!

 

第一件事, 當然係睇地圖啦! 仲要係地圖緊要過動物! sorry.. 沒收!

途經好多動物.. 真係分分鐘都有動物睇!

原來大猩猩識得用樽飲水! 我地仲見到baby monkey飲奶奶.. 活潑可愛嘅小熊貓!

之後去咗睇大象show

到差唔多時間.. 返酒店食dinner, 再出發睇馬戲~

之前都聽聞有媽媽講: 唔好坐咁前, 太嘈會驚驚~

又有小朋友睇咗一陣就要走..

咁無瞓晏覺嘅恐龍呢? 目不轉睛, 攰到半開眼, 頭仔俟住媽媽心口, 但對眼依然係望向台上! 全場約70-80分鐘, 睇哂! 仲話吊住威也响半空飛嘅姐姐好似天使!

返到酒店, 瞓响張頂腳bb床度, 典咗一輪先靜落嚟.. 張床細咗d, 佢成晚轉.. 然後撞欄! 醒完又瞓, 轉頭又咳 (好乾呀!) 總之恐龍媽就成晚跟住隻仔醒!

最後頂唔住, 都係搬上大床, 叫做好d, 但係恐龍爸唔鍾意..

就咁.. 瞓到6點幾, 恐龍仔話要玩! 咁唯有起身去浴缸玩水啦!

到差唔多時間, 我地就收拾行裝, 準備Day 2活動喇!

食完早餐, 幾happy~

最開心就係爭到玩具玩啦 (恐龍媽唔買, 唯有爭吓啦)

等車都仲有嘢爭~ 就係爭做司機!

(恐龍爸傑作!)

第一站, 坐車遊safari ~ 裡面真係好精彩, 好多唔同嘅大型動物!

等入場前.. 睇吓單張先..

出返嚟, 行咗一陣就開餐, 恐龍仔又係唔多願食!

掛住玩.. 風車係佢第一日已經想買嘅嘢, 不過我地第二日入場先買..

其實兩日裡面, 恐龍爸俾恐龍仔騎咗好多次, 由兩手空空時幫爸爸洗頭, 到有風車時變插頭! 辛苦哂呀..

回程前, 恐龍仔唔停咁話要返6414房, 唔要返屋企! 要玩!

車上無瞓, 不停講嘢!

到碼頭要過關, 連關員小姐都俾呢隻嘢迷到~ 笑哂!

最後, 恐龍爸抱住隻曳人, 要佢瞓, 喊咗5-10分鐘, 不停話瞓咗/要玩, 最後不支, 成頭汗+一串鼻水+兩行眼淚咁瞓着咗! (又係辛苦哂恐龍爸!)

恐龍仔瞓到我地返到HK, 去餐廳食飯坐低! 算係咁啦~

打俾婆婆報平安, 佢一味話一個/兩個/三個車車轉咁 (馬戲呀!) 仲有天使..

長隆, 過幾年帶埋牛牛再嚟探你呀!!!

另外仲要多謝同行嘅樂樂一家, 我地都唔記得去為回程酒店巴士留位, 唔該哂! 仲有霖霖一家.. 霖霖媽好照顧同體諒大肚人!

 

Dino in HATS

恐龍媽連日趕工.. 織咗頂帽, 因為覺得恐龍仔戴帽好可愛..

其實呢頂响淘宝買嘅都唔錯, 可惜少爺唔多like~

都係恐龍好d~

呢頂就係恐龍媽嘅大作喇! 未埋尾, 所以仲有d線頭..

同事們就話靚, 但係恐龍仔就無特別鍾意...
仲諗住織多頂架... 兩兄弟一人一頂.. HEHE~