初遇~ 怕丑草 (含羞草)

今朝~ 如常帶恐龍仔落樓晨運, Babi懶豬豬, 無跟埋嚟呀!

恐龍仔唔多願行, 呢隻嘢响商場就自己行嚟行去, 落平台就唔多願郁! 成日抱住Mimi隻腳!

於是, 我地就玩咗d危險動作, 如超人仔, 氹氹轉(人肉板), Swing, 跳舞~ 玩到Mimi成身汗, BB就哈哈笑~ 難為佢阿媽.. 真係係晨運喇! 轉到頭都暈呀!

仲有就係做哂SAM Sir 教嗰d練前庭嘅動作~~~

好喇~ 因為晏咗d落樓, 唔玩太耐喇 (不過都有大半個鐘), 夠鐘哂奶奶喇~

 於是, 放恐龍仔上返佢部戰車 (一路推住唔俾佢坐), 行多一個圈就上樓啦..

~ 第一次 - 蝴蝶close up ~

就响呢個時候, 見到隻唔願飛嘅蝴蝶, 恐龍仔响架戰車上面俾Mimi推嚟推去, 追住隻蝴蝶, 十足十坐住車遊動物園咁~

~ 第一次 - 怕丑草 之 接觸 ~

蝴蝶最後停咗喺水池邊, Mimi發現, 原來有一棵怕丑草呀! 直覺踢佢一吓, 原來係堅架!!!! (Babi發現流嘢無數次!)

Mimi第一時間抱恐龍仔落地, 叫佢摸摸啦~ 呢隻嘢摸完~ 莫名其妙,都係一個傻樣! 不過, Mimi都好用心解釋草草會打開同合埋,至於点解會咁~~ 當然, Mimi唔記得哂啦!

後記

寫到呢度, 發覺, 原來BB未駛返學, 爸媽未駛幫佢地補習溫書, 已經要"充實"自己, 準備回答各百科全書型題目, 諗起自己唔記得哂學堂上學過嘅知識, 只係得依稀嘅印象... 睇嚟~ Mimi呢個BSc Biology (Majoring in Zoology) 要溫吓書喇!