—個獎盃

恐龍仔自少唔識表達自己，好多時會令媽咪好嬲！

尋日生日，呢個仔無d表示，佢要求我接佢校車，我就趕返屋企，趕去落樓，再上樓換衫

但佢見到我都唔會笑，我要用電腦佢就掛住玩！

到我真係趕佢出房，我上到網查地址等，真係要出門口，先發現charge緊電嘅電話唔見咗！

嬲得我呀！！！

嬲到本應要去會所交錢報魔術師班(最後限期)，都唔記得，行到出屋苑大門醒起，嬲到唔行返轉頭！

今晚，同個仔講返件事，佢喊咗一輪，我只係想話佢知：媽媽好錫你，但你都要講d嘢，唔可以完全唔理人感受！

佢個傻豬粒聲唔出攞咗個獎盃入我房，然後又寫咗張紙：媽咪！

佢要將佢最靚嘅獎盃送俾我！

呢個仔，就係唔識得講嘢！

Mama's bday

今年嘅生日，想搞低調

首先，响FB唔再公開生日日期，無人洗版！

然後，公司好多新人，無人會理我！

但呢個星期都好多食神，先係有高層請食自助餐

再約咗位舊同事食日本嘢

跟住食咗一餐酒店中菜

尋日就同新高層食西餐

哈哈~幾好呀！

尋晚就一家四口隨便去咗附近嘅酒店自助餐，多謝老公抽空訂枱

我忙到無時間坐响自己個位！

小朋友們好開心，特別係見到d甜品！哈哈！

今日呢？休息一天

哥哥如常一早大呼小叫

牛牛如常笑面迎人

我仲叫咗小鬼唱生日歌我聽

佢好聽話，甜到漏！

今日約咗小鬼食lunch，一早會去荃灣幫哥哥領獎

都好忙架！

=)

生日願望呢？

唉，尋晚大老爺心情唔好，我都無蠟燭吹...

希望人人身體健康，事事順利！

五月份比賽總結

3-4月已知，5月恐龍仔會好忙，好多比賽，而部份仲要撞期！

好似响九龍塘某女校搞嘅隊制賽，本來係唯一學校安排到報名，有機會代表學校出賽嘅比賽，但撞咗恐龍仔舊年攞冠軍嘅賽事，上天幫我地做咗個決定，就係因為預備鋼琴考試，2點先可能趕到返學校點半開始嘅選拔賽，恐龍仔話唔趕喇！

就咁，佢無緣去一場賽制可能有d唔公平嘅比賽

換咗個冠軍返屋企！

成個5月，攞到一個自家棋院比賽亞軍，一個大型公開賽季軍(小一+小二組)，兩個公開賽冠軍(小一組)！

仲有獎金$3500！

呵呵！

阿仔識揾錢喇！

經過呢幾個比賽，恐龍仔响小一組別實力應該屬頭幾名

以往輸過嘅，佢進步快過人，已經可以贏到喇！可喜~

級數高佢3級嘅，佢都係贏多，証明呢間棋院都真係幾緊！

久咳！

已經唔記得邊個先病，總知3母子呢幾個星期都响度咳，仲有工人姨姨！時好時壞！

呢日，豬豬話：我唔鍾意牛牛咳！我鍾意牛牛開心！

呢句說話出自牛牛 (扮豬豬講嘢)，實在太可愛喇！

希望你快d好番啦！

又係學整餅嘅時間...

雖然d仔過哂生日，但恐龍媽一路都想去學整蛋糕，學咗先！

然後整自己想整嘅公仔！

今次係去學整擠花蛋糕，我覺得應該易過整糖皮蛋糕

呢次都係買團購，老師係後生女，但好pro!

好有心機教！

不過呢，整成品個樣就衰d，因為比例有d唔啱~

下次要學整3D蛋糕！

How to train you dragon!

上回講到，恐龍仔睇完Rio2電影，抱住Rio2小說唔放，相信佢起碼睇咗兩次！

今次到恐龍爸出招！佢話搵咗套電影好耐喎... 終於响恐龍仔數學測驗100分嘅大日子，獎佢睇卡通！

然後呢.... 就到故事書出場！(恐龍爸偷橋呀！)

結果？係有日床上面總係有本書，段估佢睇緊，但唔知佢幾時睇  =P

下一套戲，會唔會係朱古力獎門人呢？ 

贏在起跑線？職場篇

恐龍媽最近有機會面試揀卒，突然好有感觸。

作為"雇主"，我點睇呢班求職者呢？

我想搵個唔係3分鐘熱度嘅人，佢願意付出，緊張自己嘅表現，唔好太過少爺小姐格 (雖然好難避免)，樂於同人溝通，肯學肯做，有責任心…
唔知點解，肯學嘅性格可能內向d，做得長嗰個其實好無上進心，唔願意付出，到樣樣都好似OK，就屋企有錢！(我地行頭偏門，香港畢業生睇我地唔上眼，所以見到嘅好多都係外國大學畢業生，屋企有返幾個錢嘅少爺小姐)

最終點揀？
性格開朗，易於溝通，肯學肯做

學業成績，睇都唔睇！分別只係有無學位，而有學位嘅又通常真係醒少少~有多dd解決問題嘅能力！

令我想到教仔，一向意識到恐龍仔不善溝通，唔會同人講自己感受，多番鼓勵下，叫做會學牛牛講嘢，爭寵！(有個細佬的確係多d同人溝通嘅機會！)，未來，要多d機會俾佢學溝通，培養開朗性格，唔怕辛苦，肯學肯做，同埋有責任心！
當大部份人集中火力教功課嘅時候，恐龍仔唔係好駛我地擔心佢嘅功課，可以多d機會教佢書本以外嘅嘢！

100分！

第一個100分！

數學~佢最有信心嘅一科！

我地從來無懷疑過佢唔識

呢個100分背後嘅意義，

係恐龍仔終於認真作答

小心複卷，仔細寫字

繼續努力呀！

Egg tart

突然好想整d嘢俾兩隻仔食

既然買咗d模，就整d蛋鐽

今次無發到好大，但d蛋就收縮，剩返好少好少

唔明點解會咁！

仲有，d細路個個鍾意食d蛋多過個皮！

不如下次整燉蛋算啦！

學游水

呢堂係第二堂游水課

媽媽無去公司做嘢，留低睇牛牛上堂

一位教練帶4個小朋友，兩個兩個咁跟教練游

另外兩個就留响池邊踢水

牛牛好乖，有練習架！

不過呢~練練下，教練話：仲乜練到上咗岸架？！

哈哈

臨走，小朋友要跳水

牛牛就變咗一隻樹熊