又係一拖二嘅日子，恐龍爸要返工！
之前一路諗住去一次農墟，還返d玻璃樽俾菇菌圓，順便八吓！一早睇見個天咁黑，都心知不妙，但總比屈响屋企好！
於是，坐火車北上，去到太和落大雨，响商場避咗一陣，出發！
去到，恐龍仔發哂脾氣：都唔好玩嘅！我無諗過係咁！
農墟其實好細，6字型，兩邊有出口，夾埋都可能得廿檔！大部份係賣有機蔬菜，另外仲有d健康食品、新鮮菇、乾菇等…
因為同小朋友們講好會去鐵路博物館，媽媽唔敢買重嘢，但難得見到想買多時嘅乾菇包，當然唔會放過佢啦！
恐龍媽買咗一盒壓縮裝木耳，同埋一包牛肝菌切片。
下午去到婆婆度，就心急攞出嚟~發~，嘩！真係好勁！可以炒餸，又可以涼拌，啱哂想食多d沙津嘅恐龍媽！呵呵~
講返行程，離開農墟之後，我地向火車博物館進發！第一件事就係確定方向！恐龍媽有超強嘅方向感，加上google map，無嘢難得到我地，就算落住大雨都唔驚！係呀~恐龍媽一手拖住隻雨衣牛，一手自己” 打傘” ，恐龍仔就自己顧自己，跟實。就咁，我地去到得幾個自由行嘅鐵路博物館！
而我地第一時間就當然係上火車避雨+玩啦！
行咗一陣就停雨喇！
而遊人又開始多，包括一班小童軍！
我地响頭等車箱休息咗一陣 ....
實在太鍾意牛牛呢張相！好似大師出品一樣！哈哈！
就起身行多個圈
然後去搵食！
我地隨便去咗間茶餐廳醫肚，叫咗一碟楊州炒飯，同埋恐龍仔自選嘅焗芝士火腿意粉！
兩個小朋友都好鍾意食炒飯，而好少食到火腿嘅牛牛…就連平時至愛嘅叉燒都唔食，對火腿發狂！
之後點咗杯凍檸賓(少冰)，兩兄弟又搶，於是又叫多杯！
呢兩兄弟真係好少食茶餐廳….
之後，原本諗住返屋企嘅媽媽响恐龍仔嘅反對之下，改變方向，去咗巴士站去九龍搵婆婆！
於是，就有恐龍仔第一次離開爸媽，外出過夜嘅故事…
沒有留言:
發佈留言