十年喇！！！

又一年喇！

今年係結婚第十年，好特別...  本來諗過影多次婚紗相 (不過要我減肥先影喎~) ，最後都做到一樣預計要做嘅嘢：買過對介子！

行咗一大輪Tiffany，失望而回！一係就多人到無服務員，一係就細舖，無乜款睇！唔係好明點解咁多人爭住買！最後，入咗英皇珠寶，訂造咗一對有一圈可轉轉鑽石介子！

多謝老公！

今年，牛牛出咗世喇，係一隻好愛笑嘅寶寶！加上識講甜言蜜語嘅哥哥，似乎好美滿喇！

十週年，適逢換樓大project，加上工人就放假，真係無乜心情去玩！

不過~ 人就係咁奇怪，平日吵吵鬧鬧，有事時就會企埋一齊，同心努力！

呢層樓住咗十年喇，真係好鍾意呢度，如果唔係裝修太舊又唔啱小朋友用，又要就d仔出九龍返學，真係唔想搬架！

無乜願望，只希望揾到個好買家，同我地一樣愛呢間我地當日一見鍾情嘅單位！回想當日，只係隨意睇睇樓，都未有人求婚，睇咗5-6個單位，唔係向西(海景)就係向山或者屋邨，睇到有d悶，經紀帶我地睇埋最後一個示範單位...一入主人房就唔捨得走！

嗰時仲未起公路，下面係一大片松樹林！！！

就咁，响無準備嘅情況下，買咗呢度，住咗10年！(多謝爺爺嫲嫲當日嘅幫忙！)

今日，我地正在放盤，希望事事順利，煩完賣樓之後，仲要煩搬！仲有錢嘅安排！出年啦~ 應該可以安定落嚟架喇！(呢次輪到要多謝公公婆婆.. 其實咁大個人，仲要麻煩佢地，真係過意唔去！)