四歲喇！！！

今日係恐龍仔嘅四歲生日！

落到樓下，不停同d看更講：我四歲喇！


為咗準備佢個小小生日會，媽媽尋日再出sms提兩位同學仔媽媽，其中一位打電話嚟，叫恐龍仔聽，恐龍仔好正經咁同小女友講:

~ 係呀！食咗喇！
~ 做咗喇！七點幾就做好咗喇！ (當時咪七點幾囉！亂咁講！)你呢？
~ 好多謝你呀！多謝你嚟陪我呀！

媽媽諗：教佢咁多樣嘢，最開心係佢學識話俾你知人地做咗乜嘢佢係會開心嘅！無諗過佢識得同小朋友仔講多謝！係多謝對方會嚟佢個生日會！

仔呀~ 希望你身體健康，唔同成晚踢被，你一咳我就唔駛瞓架喇！

湊仔婆 day 5

Daily routine開始定落嚟。
一早餵咗牛牛食糊，到幫哥哥換衫食早餐出門口，我就同牛牛出去食早餐同埋買餸！尋晚我仲整到一湯兩餸，今日都唔例外！

牛牛瞓咗，我就煲粥仔同埋煲湯，仲有準備好午餐！
到牛牛瞓醒就洗白白，然後食粥仔！

今日午餐係蕃茄薯仔魚尾湯+通心粉！


而牛牛嘅粥仔就係：甘荀蕃薯小米魚粥+蕃茄薯仔湯底！

好味到拍掌仔！

好好味~ 哈哈！
------------
晚餐: 煎牛扒+炒芽菜仔



恐龍仔似乎好鍾意媽媽煮嘅嘢，兩日都唔願出街食！
可惜我嘅EQ唔高，面對越夜越失控嘅人仔... 唉！

兩晚都俾我鬧完，然後自己瞓覺覺，好似好可憐咁…無計，平時9點瞓嘅哥哥，呢兩日要同牛牛咁上下時間瞓 (8pm)，我又點可能睇到兩個呢？！

油水彩

襯牛牛瞓咗，決心同恐龍仔油水彩！

其實佢求咗我兩日架喇！推唔到~ 唯有頂硬上！

不過~ 都幾好玩嘅... 嘻嘻！

隻企鵝都幾可愛呀！

湊仔婆 day3

正式作戰嘅一日！

尋晚牛牛瞓得唔太好，半夜半睡狀態出現好似喊緊嘅呼吸聲！由急速至抽促咁... 唔知搞乜？！
朝早六點又嘈，飲完奶奶唔願瞓！唉~ 但係我仲未瞓夠喎！

七點半叫醒哥哥，換衫食早餐！仲夠時間落樓打韆鞦！哈哈~

然後，到我食早餐，買餸！牛牛開奶投訴！我知你眼瞓呀！

九點，返到屋企，開咗d糊仔俾牛牛食，然後上床瞓覺~ 都算快瞓着啦！

到我煲粥喇！仲有執執個廚房！揾返我買咗起碼3年嘅冰格出嚟~ 無用過~~~

每次見到工人，總係將d冰咗嘅肉解凍，然後再放返入雪櫃！講咗好多次，要冰前分小份呀~ d肉解完凍再冰，好易壞架！其實~佢已經有分小份，之不過係冰完一次先分，唔係解凍N次！
有進步啦~ 

今日我自己就點都要分咗小份先冰架喇！呢個冰格仲有度好，一格等於一隻麻雀大小，牛牛一日食兩格，哥哥一餐食兩格！工人姨姨就成日一日先俾牛牛食一份肉！

最好嘅~ 就係呢個冰格仲係有蓋嘅！當年，我揾咗好耐至揾到架！

-------
中午，多得婆婆嚟救我！
但今晚點呢？恐龍爸好晏先返...

------
傍晚，帶住食咗半碗粥仔，同埋好似好乖嘅哥哥，外出買嘢！第一站係訂蛋糕，恐龍仔話要英文字牌，牛牛就要中文…好怪相！
第二站係惠康，買咗盒有機牛肉腸！
第三站係點點綠，買咗一包有機雞亦！
上面嘅食物，係為咗恐龍仔嘅小小生日會嘅小小小食！既然唔係當正餐食，就食得好d啦~ 唔係咩名貴食物，但係買d靚d嘅嘢俾班小朋友食嘛！
第四站，元氣！牛牛好合作，無扭計！只係當我俾佢食大根時，試過之後就開始一手搶筷子，一手搶筷子上嘅食物 (都送緊入你口啦~ 搶乜呀？！)
哥哥都好乖，食咗成個手卷再加兩件寿司，因為佢不停講日文，引起場肉一名便裝職員注意，之後仲請佢食甜品！

今晚算係咁啦~~~

媽媽的情人

牛牛只愛媽媽！
牛牛~ 只愛濕吻媽媽！
牛牛~ 只愛噬媽媽！

自從牛牛長咗6隻牙，佢就開始"只愛媽媽"！

牛牛會含情默默咁望住媽媽塊面，然後.. 脷仔準備好，極速... 濕吻媽媽嘅面或咀！
又或者，一啖噬埋嚟，可能係下巴、面 或者 咀！

搞到媽媽哭笑不得！

--------------------------

今日，媽媽隨口同爸爸講: 老公呀~~~
恐龍仔跟住大大聲講: 老婆，I love you!!!

wahahahahahah~
跟手佢即時改口：媽咪~ I love you！

咁就差唔多！

仔呀~ 你要學識自己照顧自己，先可以娶老婆架！

湊仔婆 day 1

工人放大假，呢次非同小可，因為~ 佢要放多達17日！
第一個星期，由我全職湊仔！
今日係星期六，全職湊仔大任Day 1~
同一時間睇兩個，真係唔易！特別係牛牛上下午都要小睡，又唔係咁易瞓着！
今日，有一單煩事發生，就係牛牛唔願飲奶！其實佢尋晚半夜都係飲得兩安就唔飲，今朝我俾佢食糊仔做早餐，午餐都食得幾好！但係到臨瞓嗰餐奶~ 唔飲！係一放入口就頂返出嚟！好啦~ 照瞓啦...
到我洗奶樽先發現：個咀爛咗！陰功豬~
其實哥哥細個都試過一次係咁，但唔代表就咁就會學到嘢，第二次都係唔知發生乜事！
嬲嬲地，自己check過哂d樽，掉咗d "S"咀，掉埋d 無排氣嘅樽！終於，開咗d Dr. Brown！！！
呢d叫求人不如求己！
講咗俾工人聽好幾次，掉咗d細咀啦~ 我買咗中咀架！到我想買過d大咀，睇睇d存貨? 仲有中咀嘅？！所以，一路都未買大咀…亦都唔係好明，點解睇住牛牛用嗰d無排氣嘅樽飲得咁辛苦，叫極都要同我慳，唔開Dr. Brown用！或者，佢覺得多配件掛~~
仲俾我發現，爛咀唔止一隻！！！
辛苦哂你喇~ 牛牛！！ 有d嘢都係要親力親為好d！

自製 [牛奶布丁]

上次去Andrea嘅生日party, 好媽媽努力整各種食物填滿各賓客嘅肚~
其中，呢個牛奶布丁最令我感興趣！因為... 恐龍仔一定鍾意食！

細問之下，原來極易整！早d知就好啦~ 買開嘅日式布丁要$32/三樽 呀！

材料:
- 北海道牛奶 400ml
- cream 100g
- 魚膠片 10g (約兩片)
- 糖 20-40g (因應個人口味~)
- vanilla 香油 少許

因為家裡無食白糖多時，又怕黃糖會影響顏色，所以第一次試做，我用咗冰糖！

做法好簡單，浸軟魚膠片，少許水加熱溶冰糖，加牛奶至暖，加已浸軟魚膠片，cream, 攪拌到溶透，即可放入小樽，再放入雪櫃！

我用咗10分鐘！ 哈哈！！！

希望成功啦~ 咁小朋友嚟到恐龍仔嘅小小生日會就有得食喇！

十年喇！！！

又一年喇！

今年係結婚第十年，好特別...  本來諗過影多次婚紗相 (不過要我減肥先影喎~) ，最後都做到一樣預計要做嘅嘢：買過對介子！

行咗一大輪Tiffany，失望而回！一係就多人到無服務員，一係就細舖，無乜款睇！唔係好明點解咁多人爭住買！最後，入咗英皇珠寶，訂造咗一對有一圈可轉轉鑽石介子！

多謝老公！

今年，牛牛出咗世喇，係一隻好愛笑嘅寶寶！加上識講甜言蜜語嘅哥哥，似乎好美滿喇！

十週年，適逢換樓大project，加上工人就放假，真係無乜心情去玩！

不過~ 人就係咁奇怪，平日吵吵鬧鬧，有事時就會企埋一齊，同心努力！

呢層樓住咗十年喇，真係好鍾意呢度，如果唔係裝修太舊又唔啱小朋友用，又要就d仔出九龍返學，真係唔想搬架！

無乜願望，只希望揾到個好買家，同我地一樣愛呢間我地當日一見鍾情嘅單位！回想當日，只係隨意睇睇樓，都未有人求婚，睇咗5-6個單位，唔係向西(海景)就係向山或者屋邨，睇到有d悶，經紀帶我地睇埋最後一個示範單位...一入主人房就唔捨得走！

嗰時仲未起公路，下面係一大片松樹林！！！

就咁，响無準備嘅情況下，買咗呢度，住咗10年！(多謝爺爺嫲嫲當日嘅幫忙！)

今日，我地正在放盤，希望事事順利，煩完賣樓之後，仲要煩搬！仲有錢嘅安排！出年啦~ 應該可以安定落嚟架喇！(呢次輪到要多謝公公婆婆.. 其實咁大個人，仲要麻煩佢地，真係過意唔去！)

急性盲搶鹽

廣東話有句俗語: 執輸行頭，慘過敗家！

當見到大中華區各地人民去超市搶鹽，搶不到就連鼓油雞粉也不放過，就明白這種民族性有多強！

日本是次地震同海嘯，對香港人本應無太大關係，可能係短期內不可以到彼岸旅遊，或者是部份物資出口會受影響，但當福島核電廠問題見報，不得了~ 大家非常擔心日本產物嘅污染問題，更擔心輻射殺到！

網絡上流言四起！又有人信喎！新聞報導，中國內地有人服食大量食鹽死亡！但其實，如果真是世界末日，我們還能做什麼呢？

當大家努力去搶奶粉時，我家大寶尚有兩三罐奶粉備用，小寶因為轉食豆奶多時，不太擔心會搶到埋身！

今早，日本那邊傳來好消息，有機會重開自動降溫系統！

我自己最擔心的，反而是樓市！如果不是世界末日，那我們還是要生活下去，但核電廠事故對樓市影響已經見到，發展商停售新樓部份單位，二手樓市成交少了，價錢微降，這些對我們有點影響！

願世界和平，福島情況盡快受到控制，其他災區好快恢復過來！向福島正用自己生命去救千千萬萬人民生命的勇士致敬！

 

剪髮記

帶恐龍仔剪頭髮，佢個頭兩個幾月無剪，好長呀！

Eric哥哥有客~要等一陣，無無聊聊，媽媽攞咗部相機出嚟…

呢度d燈光好靚！

影出嚟d相好靚！

到恐龍仔喇~ 一見我攞相機又扁咀！

哪~咪亂郁呀！剪埋你隻耳仔架！

傍晚，我地去咗霖霖嘅生日會~
有美味嘅雞亦！ hmmm.... 駛唔駛食到眼都大哂呀？！

傻仔~倒轉咗喇！

小朋友去玩，佢就自己玩！

6隻牙仔

今朝早發現一樣極重要嘅事，就係牛牛一次過出緊3隻牙仔！原本佢下面出咗3隻牙，第四隻一路無聲氣，點知上面特然間一次過出緊3隻！！好恐怖！

佢發牙痕發到…連媽媽想幫佢搽teething gel嘅手指都唔放過~ 大大力咬落去！

痛死人呀！

呢隻傻牛牛真係乜都咬一餐，好想佢口腔期快d過呀！

病倒了

星期六同恐龍仔出咗一個下午街，困住咗响商場內窄小房間，出到嚟火車都可以吹親，即刻咳咳咳~

星期日，情況惡劣，恐龍仔攰到唔想玩！氣促，咳就唔太嚴重~

星期一無返學，但得係個人精神返喇~  黃昏，到牛牛流鼻水！

唉~~~

星期二，恐龍仔都留响屋企，因為條氣都係有d促，牛牛d鼻水好似好返d

星期三，老師話哥哥响學校無咳！

但係~ 牛牛就有兩聲咳咳呀！唔係好瞓到，不停咳！

睇見佢地兩個咁... 心痛死媽媽喇！！！

 

復活節~ 大計劃！

最近個blog冷清清咁，因為好忙囉！

哥哥做花仔d相都懶得upload，牛牛又11個月大，都未寫！

因為我地煩緊間屋，仲有復活節去邊度玩！經過呢個星期，最後結論係：香港人太有錢喇！大家以為自己多咗六千蚊駛就身痕，個個都去鄰近地區消費，所有平價機位賣哂！package都無哂！就算有機位，一係要原價，一係就11pm起程，6am回程！

唯有叫本來想去星洲嘅恐龍仔失望喇！

下本年，等媽媽再計劃吓d大假點用，到時再算！(或者到時無錢去都未定~~)

最終，我地訂咗深圳嘅青青世界，近近地，平平地，同大自然玩兩日！

 

親子旅行@大棠荔枝山莊

又係一年一度嘅親子旅行，今次我地去大棠荔枝山莊。
講話去呢度玩就講咗好耐，今次終於去得成喇！

一去到，當然要坐牛車啦！

個個小朋友都好鍾意坐牛牛車車架！

之後，我地去咗餵鯉魚。

然後，就係馬騮爬繩網。

乜得你行得咁輕鬆架？！

基本上，恐龍仔都鍾意玩繩網陣嘅，只係有時眼仔望咗去第二度，又或者有dd驚驚咁啦，但係有爸爸陪住嘅話，就無問題啦！

食完午飯之後，就係集體玩動。首先係彩虹傘~

恐龍仔好鍾意走入傘裡面行嚟行去，好開心！

之後仲有推波波，人地明明一個小朋友一條跑道嘅，得係你睇吓呢隻曳人..

專發走過去人地嗰邊，仲要好開心架喎！

每個小朋友都有一袋禮物，裡面有好幾樣玩具，我地之後仲玩咗一陣玩具..

呢日中午有太陽，天氣唔錯！大家玩得好開心，回程時，大部份嘅家長同小朋友都瞓咗，但係恐龍仔就... 一路望住個窗唱歌！

牛牛@大埔公園

呢日係Vicky姐姐結婚嘅大日子，哥哥做花仔，牛牛去觀禮！

呢次可以話係牛牛第一次去公園，唉~ 爸媽掛住照顧哥哥，牛牛連附近嘅公園都未去過呀！

第一次坐草地嘅牛牛~ 好鍾意！鍾意到.. 你叫極佢都唔應，眼仔望實草地.. 手仔開始有所動作， 最特別嘅係，佢研究咗好耐，都無放入口！

牛牛同哥哥真係好唔同，哥哥對所有刺激都好敏感，所有要一段時間同鼓勵先可適應到！但係，到目前為止，睇唔到牛牛有d乜係怕睇嘅！

佢對環境敏感度較低，去到陌生環境都好定，無扭計！

睇見佢研究d草，好搞笑~ BB應該係咁架嘛！探索呀！