一場惡夢: 產後大出血~

深夜, 突然下腹痛, 大量出血! 打俾医生, 佢話聽朝去攞d消炎藥就得, 無事!

食咗止痛藥, 但係兩個鐘後依然血流成河, 開始企唔穩.. 見暈!

於是餵埋牛牛就帶埋佢去仁安.. 佢一路瞓, 無醒過!

去到仁安, 姑娘知道係余医生case, 就call佢, 医生話唔得閒喎.. 咁就見咗當值嘅林医生~

做咗一輪檢查, 流咗好多血.. 佢話一定要入院, 問題係入仁安定PWH, 要抽血做配血, 做手術 (約兩萬蚊), 如果都止唔到, 就要切咗個子宮!!!

 

嚇到我地兩公婆呆咗~ 我就喊哂..

 

咁嘅情況, 當然要去PWH啦!

於是, 林医生叫姑娘掉咗抽咗嘅血同埋一個種菌標本~ 然後寫紙俾我去PWH

响白車, 急症室分流/医生, 病房姑娘, houseman, 医生.. 講咗好多次我嘅medical history, 有好幾個都講: 做乜佢地唔執返自己d手尾! 令我對我嘅医生懷疑!

婦科檢查係一樣好討厭嘅事, 特別係响政府医院! 所有嘢再做一次, 不過無抽血(都無諗住做手術!) 同我檢查嘅医生就話: 開刀生好少會淨低嘢 (會引至大量出血), 而且我曾經穿水, 所以好大機會係發炎, 睇吓食咗消炎藥點先再算~

 

上午, 我個医生打俾我, 佢話check過入院病人但唔見我, 問門診姑娘先知我去咗PWH~ 佢一個電話加上PWH医生講嘅嘢, 我對佢有返信心, 仲將嗰位林医生嘅不滿講咗出嚟! 我有d覺得佢係想揾錢.. 希望唔係無料啦 (其實兩樣都衰架喇!)

 

一個人入院已經慘, 仲要做咁多令人難受嘅檢查, 又俾個医生嚇! 真係諗吓又想喊! 住大房又瞓得唔好.. 我呢個第一次睇急症/坐白車/住政府医院嘅人, 真係好感激恐龍爸公司份保險!

 

點解成日都遇到d嚇壞人嘅医生呢?!