三歲生日嘅慶祝活動

30號~

我地約咗爺爺嫲嫲叔叔姐姐上嚟一齊食蛋糕..

恐龍仔自己食咗飯先, 點知隻曳人响梳化跳落地, 頭仔撞咗去枱角! 好在係圓角啫.. 損咗少少, 腫咗少少.. 喊咗一大餐! 飯就.. 食咗少過一半! 放你一馬啦!

今晚最遲嘅唔係叔叔, 而係超忙嘅恐龍爸! 恐龍仔都乖, 再食多少少飯, 同埋好多豆豆!

之後~ 戲肉.. 蛋糕出場喇!

 

當然係超開心啦! 急不及待要吹蠟燭同切蛋糕添!

仲有.. 食咗好多蛋糕! 哈哈!

最後, 要瞓喇.. 傻豬開始喊! 因為實在太高興, 好想好想繼續玩!

下次先啦...

 

正日~

好少有: 起身無叫奶奶! 仲食咗一片多士同一包Happy Birthday維他奶!

恐龍媽book咗下午覆診, 安排好工人姨姨去攞氣球, 然後一齊接放學!

個傻豬見到束氣球.. 開心到傻咗!

之後, 我地去咗沙田行咗一齊街,

去咗cotton candy買咗兩條褲 (恐龍仔太細粒喇, 買埋嗰d 100碼褲全部鬆嘅, 唯有去買過d 90碼夏天褲囉~~), 然後坐落食住等恐龍爸啦~

因為束氣球, 恐龍仔有得玩, 所以坐咗個幾鐘都仲得!

食飽飽~ 跟住就係另一特備節目: 探牛牛喇! 恐龍仔未跟過媽媽覆診架!  不過.. 呢次就因為呢隻嘢, 其實有好多嘢要同医生傾都唔可以講多幾句, 恐龍仔唔停咁講嘢! 嘈住哂!

返到屋企都4點喇.. 竟然仲瞓到 (工人姨姨真係得架!)

夜晚.. 無出街呀~ 飯後玩一樣應承咗恐龍仔好幾日嘅嘢.. 就係玩腳仔印印印喇!