九年喇..

2000年8月~ 我地去睇樓, 係我第一次睇樓, 老遠走去馬鞍山, 完全唔合我要求嘅地點! (我住開地鐵出口旁嘅單橦樓, 樓下有兩間大超市) 呢度.. 無巴士停門口~ 無舖頭响5分鐘路程以內, 買嘢食嘢坐車.. 通通要坐shuttle bus出市中心!  都係諗住睇吓啫..

當時, 我地睇嘅係現樓單位, 其實環境唔錯, 屋苑兩面有海境, 一面向山, 一面對住屋邨, 帶我地行嘅經紀話: 附近唔可以再起高密度住宅, 向海嗰邊塊地會係火車站, 2004年落成, 應該會有上蓋物業~

首先.. 我地睇咗好幾間向海單位, 下午4-5點, 西傾~ 加上會有地盤/起樓.. 無乜興趣! 跟住行去最遠嗰座, 向屋邨嗰邊.. 恐龍爸話一定唔可以見到公屋~ 到最後一間..  入屋見到四正客飯廳, 走廊直望見主人房 (唯一問題), 廚房四正連什物房, 山境, 入到主人房.. 有4個字彈咗出嚟: 別有洞天! 窗外係一半山境, 少少內園, 仲有就係東面永久海境, 座向係東北/東南~  套厠唔會對住大床, 跟住就開始發夢喇... e.g. 走廊要加個門分開個廳..

就咁~ 落咗訂...

同年嘅9月嘅9/19/29號 (唔記得咗喇~) 收到一大束玫瑰.. 有可能係99枝.. 上咗山頂.. 有人求婚~

然後, 我地揀日子, 訂酒樓 (係呀~ 無錢擺酒店呀~), 嗰日係吉日, 好多地方都無期.. 仲有係計劃旅行地点同3個月前去排隊book註冊處!!!!

嗰日, 男人晨早4-5點去到, 好長龍! 我就要返工, 排隊排到佢, 淨返最遲4點半嘅兩個位! 當然照殺啦!

去邊honeymoon係唔難嘅事, 我地覺得日本係一個可以去好多次嘅地方, 所以呢次第一次, 揀咗去九洲.. 好好彩.. 真係估唔到嘅驚喜, 我地遇上櫻花開放!  

仲有婚紗影相等等.. 好多好多嘢.. 男人出錢, 女人出力!

就咁.. 話咁快就到咗恐龍爸同恐龍媽初遇嘅14週年.. 結婚嘅9週年.. 仲有.. 恐龍仔都就3歲喇!  時間過得好~

好多回憶.. 片段~

牛牛又就嚟出世喇~

我唔係一個溫柔嘅女人, 但細心就.. 都OK架~ 無乜記性, 會好易唔記得d唔開心嘅嘢~ 其實一路都好多"意見不合", 但係~ 日子都係咁過~

嚟緊, 工作上會有d改變, 句括工作時間, 但係恐龍爸比我更忙! 都唔知點安排時間陪仔~

唉~

不過講真, 睇見小朋友長大, 真係好多樂趣架! 佢地為呢頭家, 同呢兩個悶蛋男女增添咗好多煩惱同歡樂!

生活變得極為忙碌! 想搵d時間去"悶"吓都無~

展望~ 雖然個口好識講, 兩公婆感情好, 好緊要, 孩子需要相愛嘅父母, 但係有時真係... 為d仔傷感情! 有時做阿媽嗰個就當然以仔為先啦! 所以.. 都係要再三提醒自已.. 唔好淨係顧住d仔!

老公~ 我知道架 !