入院記

呢幾日, 恐龍仔入咗医院, 腸胃炎, 医生話係病毒引起嘅, 可能因為返緊學喎~

星期日一早出門口去上音樂堂, 恐龍爸同隻仔去食早餐, 食咗d通心粉, 一路都話肚仔痛, 話攰, 上堂無平時咁曳~

放咗學去遊樂場都無心機玩, 肚痛喎~

之後行咗去買相機, 响相機舖門口嘔第一次.. 一分鐘之內再嘔嘔嘔~ 之後醒哂, 想玩!

去餐廳坐落, 嘔! 呢次水多.. 俾少少水佢, 响上菜之前.. 再嘔!

試吓俾少少麵佢啦.. 又好似ok~

去婆婆度~ 無幾耐又嘔! 想佢瞓, 落街買咗罐豆奶~ 嘔!!! 總之嘔完就生猛啦!

唉~ 終於媽媽抱住瞓咗~ 一個鐘後.. 醒--> 嘔!

咁唔係辦法喎.. 恐龍仔叫肚餓! 公公俾咗塊梳打餅佢, 半個鐘後又嘔! 飲水~ 過一陣又嘔!

最後, 恐龍爸同恐龍媽先後食晚飯, 接力湊住隻仔, 然後飛的去仁安.. 响的士度.. 又嘔!

星期日pm, 無医生睇嘅時候, 仁安好旺! 我地7點鐘去到, 等咗個幾鐘先見到医生 (其間再嘔!) , 佢話塞藥, 觀察半個鐘, 無再嘔就走得.. 咁佢再叫我地入去時又真係無再嘔, 以為粒藥有效啦, 恐龍爸去交錢攞藥... 再嘔!!!  (呢次唔敢再俾水佢飲喇!) 咁啱坐响医生房門口, 佢個病人啱啱出咗嚟.. 恐龍爸同姑娘講, 医生答: 咁上房啦~

等搞手續時, 已經十點左右, 恐龍仔攰極响梳化瞓着咗.. 上到7樓, 醒咗, 扭咗兩吓計.. 然後, 嘔黃膽水!!!

可憐豬開始話要返屋企喇!

我地等咗好耐先種到豆, 因為前面有個bb好難搵血管, 搞咗好耐! 最後settle down, 恐龍爸抱住隻仔瞓着.. 已經11點幾喇!

恐龍仔對於佢手上嘅"裝置"唔係太滿意, 但係都算好合作, 無扭計無喊, 只係話要返屋企!  因為恐龍媽個肚已經好大喇, 由工人姨姨留守病房~

第二朝一早又飛去医院等見医生, 医生話鹽水要吊24個鐘, 不過就可以俾佢少食多餐, 呢隻仔.. 唔停咁話要食嘢要飲水, 從來未試過架! 笑c人~~ 見佢生猛返, 個心安樂好多!

然後~ 到恐龍媽去睇医生 (傷風呀!)

之後返屋企瞓一陣, 然後去医院接更, 等工人返去換衫沖涼 (點知佢仲洗埋衫添!)

可憐嘅恐龍仔遇着個扭計鄰居.. 無覺好瞓.. 唉~

响得恐龍媽一個嘅時候, 医生又嚟喇, 佢話要恐龍仔痾到便便, 唔得就要幫幫佢! 咁~ 無幾耐恐龍仔就話要去喇! 可惜坐咗十幾分鐘都無乜料到, 又唔肯出返去.. 唯有使用暴力啦! 姑娘一放咗粒藥入, 出咗房門, 恐龍仔就話要ngng喇! 咁得唔得架? 咁快?! 姑娘話最好等10分鐘, 但係阿仔個樣話我知, 佢唔等得! 又再入厠所~ 呢次好成功喇!

唉~ 難為大肚媽媽最怕聞到臭臭咁.. 仲要响個通風好差嘅厠所裡面.. 仲要幫佢攞少少大便去化驗... 唉~ 當嫲嫲問恐龍仔仲有無嘔.. 佢答: 媽咪嘔呀!

晚餐, 係通心粉, 食咗幾啖咁多就唔願食喇!

臨走.. 當然係唔捨得爸爸媽媽啦~ 可憐豬! 

 

第3日, 恐龍爸去医院, 医生話出得院喇, 不過都搞咗成兩個鐘.. 之後一個星期要戒口, 希望恐龍仔快d好返哂喇! 唔係無生日蛋糕食架喇!!!

----------------------

呢隻仔其實算乖, 起碼病病唔會扭計! 入到医院都有姑娘讚佢叻叻同乖乖, 有精神時妙語連珠! 無精神時一句話都無!

 

恐龍仔病之前, 爸媽鬧咗一場交, 雖然elmolly姨姨响度怪自己搞個party害咗恐龍仔, 不過真係唔緊要, 恐龍媽睇到嘅係, 為咗個仔, 自然夫妻同心, 唔可以話小病是福, 但係辛苦哂恐龍仔喇..