唔識~唔得~唔知~唔想~唔要~唔做~唔鍾意!

恐龍仔開始大喇, 有自己嘅主意, 講嘢進步到乜都識講喇!  結果係點? 咪就係乜都NO~ 講d相反嘅嘢!

今日上音樂堂 (其實之前都試過咁) 老師叫小朋友一齊唱/做, 佢就話: 我唔識嘅~

總之, 你唔可以輕輕鬆鬆咁叫佢做d嘢!

其實, 我覺得我地都有少少責任, 因為每當佢唔願擦牙嘅時候, 我地話:咁恐龍仔(佢d公仔)快d去擦牙喇.. 我地講故仔喇~

咁阿仔就會好緊張咁跟埋嚟: 我又要!!!

激將法~

有時~恐龍爸會講反話 (其實咁唔係幾好..)

唔知係咪因為咁, 佢成日講反話, 又唔正經答問題!

唉~

另外, 夜晚排隊等村巴返屋企, 發生咗件事:

車到, 隊頭位先生想等埋老婆 (其實大把位, 佢老婆慢慢行都仲得!) 咪企吓企吓, 唔願上車囉.. 條隊唔郁~

前面個阿婆突然擰轉頭話有人踢佢.. 恐龍媽當然第一時間講唔好意思啦~ 轉頭話人仔..

跟住聽到恐龍爸喝個仔, 原來佢仲想踢多腳! 呢個仔.. 激到爸媽暈低! 開始咗漫長嘅說教..

呢種行為好大問題, 恐龍媽好少用到警察叔叔架, 但係唔係想嚇佢, 佢咁樣~真係俾警察拉架!!!

最後.. 終於叫做錫返媽媽, 但係都無同媽媽say sorry~ 總叫做講得出佢自己做錯咗d乜啦~

 

多謝sasa媽响Facebook嘅分享, 我會去搵嗰本書, 睇吓有無幫助啦!