我地點玩YBCR / Word Card?

响討論區成日見到有家長問Your Baby Can Read點用, 好唔好?

等恐龍媽都總結吓啦~

 

恐龍仔大概响7個月開始, 就每日(weekday)朝早睇一次 (Starter - 約20分鐘): 公公睇報紙, 個孫就睇dvd!  Weekend, 恐龍媽都好少播, 多數都係行公園玩吓咁…直至大概9個月左右, 接恐龍仔返屋企俾工人姨姨湊。

 

恐龍媽叫工人姨姨每日最多播兩次，工人姨姨就主動讀字咭俾恐龍仔聽，恐龍媽一路都唔知，直至大約一歲啦~ 恐龍仔開始認得讀某d字，開始識得見到隻字然後攞返隻小動物俾大人！好記得~佢讀”giraffe” 讀成” 自waff”.. 仲記得，嗰時佢連媽媽都未識叫!

 

响呢個時候，恐龍仔仲開始認ABC, 呢度又係行晨運嘅功勞! 有段時間,恐龍仔每朝都停响大堂張有屋苑英文名嘅大地毯上面認字母! 歲幾人仔~ 就咁樣搞到好多管理員都識佢喇!

 

跟據家長手冊(香港版先有, US版無架~) 認到第一個字之後就可以播disc 1~ 一日2-3次，响bb有精神時播，咭就要1秒1張咁flash， Starter 播兩個月後就差唔多認到字, 然後轉Disc 1, 久不久要播返之前d碟, 又1-2個月後轉disc 2, 如此類推，第5隻係Review, 長d (未試過睇得哂, 因為我地set咗每次睇電視唔超過半個鐘~)，都係久不久播吓..

 

工人姨姨play word card唔係flash, 佢一邊讀一邊慢慢反去後面，bb搶會隨得佢，到後期恐龍媽攞哂成套咭出嚟 (有4吋架!) 恐龍仔有耐性續一讀出嚟! 至於點玩~ 可以讀咗叫bb搵; 可以俾佢睇吓然後搵物件；仲可以玩phonics (YBCR係有少少phonics元素架!) ，恐龍媽玩過幾次 sat/pat/cat 之類，之後又試過用letter card玩過幾次，唔好理有無嗰隻字~照拼! (e.g. bat/cat/dat/fat/gat/hat/jat/kat.. ), 真係無計劃咁玩過幾次咋，恐龍仔已經能夠自己掌握到，好多時會自己讀d未見過嘅英文字，咁當然唔會啱哂啦~ 一半一半左右啦!

 

佢認到ybcr嘅字之後, 我地開始認其他字: 可能係書仔, 亦可能係細細張嗰d圖咭。唯一少玩嘅，係分類 (真係要動動腦根先! 睇吓佢有無興趣玩~) 。 之後，播咗一輪英文兒歌, 到恐龍仔識得跟住歌書turn the page.. 唱到好多歌, 聽到悶喇~ 先買mother goose (兩歲!) 同一時間, 恐龍媽開始買readers, 然後發現佢應該睇到 oxford reading tree 嘅level 3-4!

 

關於flash card~ 其實我地有一set standard size嘅card, 係响yahoo d媽媽group埋一齊搵人print架…相對依家有現成嘅買, 咁當然我地嗰set會貴好多啦! 恐龍媽都諗過二手賣返出去, 但係邊有人要呀?!  至於點解我地唔用? 因為玩嘅時間恐龍仔唔望，play嘅人好無引 (好似robot咁~) d咭太大張喇，好唔方便! 其實呢排教中文, 可以搵返出嚟睇睇..  我估d英文佢應該識得讀大部份喇!

 

恐龍媽曾經响討論區見過有家長話:唔應該學認字, 學拼音就得喇! 佢仲話美國早一代學認字, 但係反而呢班小朋友大咗d英文差咗,於是有人教phonics, 之後d英文水平即係升返云云~~ 所以要教phonics先喎! (但係唔識ABC又點教letter sound呢? 定係用phonics方法順便教ABC??)又有人會問: 幾時適合學phonics~ 其實我唔明, 點解唔可以兩樣嘢都响3歲前教呢? 敏感期嘛!