入圍通知

記得年半前，網上見到有人收到男校第二次面試通知，好緊張~
舅父打嚟，表弟入圍，但我地仲未收到信...
最後，都唔記得咩原因喇 (好似封信打回頭，學校打返俾我地)，總之有份見校長，好開心好興奮！
我知道，恐龍仔係得架！3000人揀300個，應該有佢份！
最終，面試失敗，但只係無緣份，唔係無實力！

一年多後，一個有實力先可以入圍嘅筆試，又係見到網上有人收到電話通知，個心開始緊張！
尋日，恐龍媽帶仔去做健康普查，做完返歸，入電梯時電話響，對方响邊"嘟"咗一聲，好似junk call，返到屋企都無回電....
見人有我無，有朋友覺得不可思異！作為媽媽，有dd失望...我個仔...幾叻呀！
今日先知，原來係學校打嚟！原來我地都入圍呀！

恐龍爸收到通知，都緊張埋一份！
呢個遊戲到呢一刻，其實好睇阿仔自己能力去到邊，緣份呢家嘢....我地控制唔到喇！
但真心歡喜，又一次得到"入場卷"，都係一份認同！

仔！無論結果係點，媽咪以你為榮！

小乖乖牛

上星期日，同哥哥去睇跳舞，晚飯後送咗牛牛去工人姨姨教會，佢好開心，有得去玩，完全唔覺係被遺棄！
媽媽仲要抵死到話哥哥無得去，佢就仲開心！

嚟緊星期日，媽媽要返工，但哥哥有比賽可以玩，得恐龍爸一個打兩個，被困棋院，又真係唔係好得，於是打算放隻牛去婆婆度，佢聽到大叫：好嘢！有得同公公婆婆玩！

又一次，佢反客為主！

牛牛，媽媽唔夠孝順，同婆婆有d梳離，就靠你去氹公公婆婆開心喇！

考完試去玩喇！

哥哥考試最後一日，牛牛學校放假，恐龍媽於是請假同兩個小朋友去街街

第一次去接哥哥放學，好緊張，場面都幾混亂，細小嘅飯堂位，企咗一百人以上！

接咗哥哥，就坐巴士出尖沙咀，架巴士都幾多人，無駛雙座位，有位伯伯於是坐去另一邊，讓個位俾小兄弟一齊坐！

哥哥隨口一句：唔該！

牛牛又跟住講：唔該哂！

老人家大樂！佢話唔駛人教，自己由心咁講，如果有糖嘅話，抵請佢食糖！

哈哈！

出到尖沙咀，我地去咗食壽司，中途恐龍媽收到通知，要返公司一轉，好在仲有時間，我地去咗碼頭的士站，打的返入沙田，中途的士司機搭咀，原來佢係沙田車，俾咗張咭片我地之餘，竟然响的士站上都打折！多謝哂！

快閃完成任務，由上司送我地去太空館。

哥哥坐車頭，人地問佢係咪好叻仔，佢唔識答，之後又話唔係！

哈哈~都啱嘅，咁難答！

開始過牛牛午睡時間，去到太空館開始攰喇！

哥哥同牛牛各自玩，然後我地就入場睇蝴蝶喇！

估唔到，搞搞震坐唔定嗰個係哥哥！牛牛就不停講嘢！

之後，去咗文化中心嘅coffee shop食d嘢，兩隻嘢又開始作反！走去一邊嘅各落玩！

中間，牛牛人有三急，哥哥仲識得帶細佬去揾洗手間！

真係大個仔喇！

兩隻嘢响文化中心跑嚟跑去，真係~失禮哂！

有d意外，原來哥哥抱得起牛牛！

最後，坐巴士去九龍塘同恐龍爸會合，食晚飯。

巴士站嘅姨姨望住兩隻嘢玩，笑哂！

巴士內同我地一齊坐四座位嘅乘客都撩我地傾計，呢兩隻嘢其實無停過，好嘈！

但d姨姨就係咁望住佢地兩隻嘢笑吓笑吓！有個仲問係咪孖嘅添！

(唔係呀嘛？！)

媽媽就俾兩隻唔聽話嘅小朋友激c咗！

不過，今日真係玩得好開心！

雖然有人返屋企時話唔開心.....

我最鍾意嘅人！

有日，有個貪得意嘅媽媽，突然蒙住恐龍仔對眼，問：你估我係邊個！

恐龍仔答：我最鍾意嘅人！

媽媽本來以為佢會答：媽咪！
但竟然係咁~開心死！

哈哈~

大抽獎 2014

今年大抽獎，好似同我無乜關係，但我依然好關注，好想身邊嘅朋友都如願派到首志願！

而結果，似乎大家都好理想！睇見都開心！

另外，更收到一位問咗我好多選校意見嘅網友，佢之前放咗CKY，應該手持SFA，而最終抽到LS！可喜可賀！

突然想起去年，又係有位網友感謝我介紹我間甲一俾佢，佢無選該校嘅情況下叩入到！

真係~無言！

點解一個二個都入到我地想入嘅學校嘅？！
幾時到我地呢？！

牛牛的游水班同學

有日，傻牛牛突然話：A同學同我一齊游水呀！
細問之下，佢話幼稚園同學當中，一位A同學同佢一齊學游水！
因為當然唔係想响呢個地點上，本來下一期要轉地點，佢一講，媽媽就亂喇：到底轉唔轉地點呢？！

問牛牛：我想同A一齊學游水呀！

好~好~好~

報名！唔轉地點喇！

whatsapp問A家長，佢過咗半日先話：A係學緊游水，不過係同女仔上喎，A無話見過牛牛！

吓？！

原來牛牛識得作故仔喇！