提早切西瓜蛋糕！

因為牛牛正日生日當晚，爸爸要返學，所以我地決定提早切蛋糕喇！

我家牛牛對蛋糕無乜興趣，但見到蠟燭就超興奮，之前媽咪見到BK有人整西瓜蛋糕，就覺得好啱牛牛喇！
今晚放工就趕去買西瓜，同埋睇吓有乜生果做裝飾，見到可愛嘅楊桃就好開心，相信應該幾靚靚！

一如所料，牛牛見到蛋糕好興奮，自己已經唱生日歌喇！
可惜有個哥哥走埋嚟爭住吹蠟燭！於是又要點過...曳豬！

 

平時好高要求嘅恐龍爸都讚個蛋糕好靚呀！嘻嘻~

之後，我地拆禮物！兩兄弟等咗好幾日，終於可以玩喇！
最終，牛牛只係食咗少少西瓜同楊桃，因為間屋嘅吸引力實在太大喇！
兩兄弟都好鍾意呢間大屋呀！


牛牛，媽媽祝你身體健康，開開心心！唔好太過揀飲擇食呀！