香港。泰國圍棋精英賽

呢次係恐龍仔第二次參加比賽 (第一個比賽係全年性比賽，已經去咗兩次，嚟緊呢個星期第三次)，係一個全日5回合嘅分齡比賽，恐龍仔屬於7歲以下組別。



唔好睇個名好似好勁咁，其實係交流嘅一種，主辦嘅係香港同泰國個別棋會，對於恐龍仔，係一個GAME~ 而好特別嘅係，圍棋game會有獎攞，作為一個無特別去儲"閃咭"嘅小朋友嚟讀，有獎攞已經好特別！估唔到俾錢去玩一日，都有紀念品攞番！哈哈~


其實7歲以下呢組係無泰國參賽者架 (咁細個，我地都唔會放心俾佢跟團出國啦！)，所以賽事中有8個名次有獎之下...
絕對係豬肉大獎！
不過都想讚吓佢，除咗一路自言自語，同埋掃棋之外，坐足一日對於幾歲人仔嚟講，真係唔易！
同埋都叫有贏有輸，中游成績，對俾錢嘅爸媽都叫有個交代！

恐龍仔係由舊年暑期响暑期班接觸到圍棋，跟住自己話要學，由9月參加現時嘅棋院到目前4月，都有7-8個月喇！
復活節假，俾佢玩咗3個半日"習訓"，聽佢講，棋力由之前嘅25，升到23喇！
有進步，當然開心啦~
不過原來棋力呢樣嘢，要升都唔係好難，只要响有director嘅情況下，贏兩局就升一級。