新鮮出爐牛油曲奇！

話說，牛牛唔鍾意食媽媽整嘅糕點。每次只有哥哥食~

早幾日，媽媽用angry bird模整咗d小蛋糕，牛牛玩咗一大輪，終於肯試食，仲成隻豬豬食哂！

今日，媽媽襯小朋友各自忙緊，就自己試整曲奇，點解係試呢？因為次次都唔成功"cup"個模囉！
今次經過失敗之後，終於俾我搞掂喇！！！

整好餅，就問小朋友要唔要畫畫呀？
兩隻嘢不知幾鍾意！哈哈~


畫完，牛牛又係攞住玩唔食！

而哥哥呢？好鍾意食，仲要同牛牛迫埋一齊食 (其實牛牛好想趕佢走！)

終於，呢隻牛玩夠喇！睇吓佢食到個樣~幾甜呀！


開心c媽媽喇！

哥哥見到媽媽咁開心，就話：我幾時都覺得你整嘅嘢好食架啦！

我知道你乖~不過睇見牛牛食得咁開心....


~小插曲~
生日會嘅小主角~皇帝豬~一早已被發現漏氣，今早更加出現唔上唔落半天飄
於是~ 就放咗隻豬隨佢飄，兩隻人仔見到好開心！

當開爐焗嘢之後，一路無熄抽氣扇，呢隻豬就自己走入廚房，咁當然俾媽媽鬧返出嚟啦！(係熄抽氣扇至啱！)

估唔到佢知衰，自己走去大門罰企！牛牛仲幫佢數一至二十！

呢次應該係最開心嘅一次罰企喇...