K2家長日

又係家長日嘅大日子！呢日陪爸媽嘅，唔係哥哥，而係牛牛！
媽咪想牛牛去吓哥哥學校，睇吓玩吓嘛！

首先，又係睇卷時間，驚喜嘅係：呢個人仔竟得擦咗d唔靚嘅字，然後再寫過！

成績表呢... 今次其實有d驚喜架！
不過正如上次咁，一眼掃過去，只睇見一個B (中文寫字)，個心就當然覺得... 唉~又係寫字！(其實恐龍爸用咗好多精神幫恐龍仔執功課架喇！)

老師話：都睇得出爸媽對恐龍仔嘅功課係有要求嘅！
老師又再提一班只得4位小朋友會有校長信.. 而呢班考試滿分嘅有7-8個小朋友.. 如果計埋下學期成績，滿分嘅都多過4個人嘅話，就會睇埋其他表現..
恐龍媽當然好緊張恐龍仔上堂情況啦！原來都可以坐定定，唔會考多口，只係有時對眼去咗旅行... 仲有去洗手間排隊永遠係最快嗰幾個！
學校嚟緊會多d教小朋友禮貌，見人要笑，講嘢要望對方對眼等等..
老師仲話，今年K3嘅成績比舊年好呀 (其實舊年真係爭少少..)

作為家長，就當然希望學校嘅畢業生得到各大小學認同啦，但係，受歡迎嘅背後，就係越嚟越多人報呢度幼稚園，恐龍媽真係好驚... 會唔會唔收牛牛架？！
雖然話有哥哥响度，但係今年嘅弟妹都異常多呀！

到媽媽得閒睇真d份成績表..
其實，恐龍仔真係做得好好！已經有進步，只係~仲有進步嘅空間！