懇丁、高雄5天遊~~~預備編

上次去旅行，應該係2010年年尾，過咗半年奶媽期，同恐龍爸二人世界遊倫敦。
上次，恐龍仔唔多高興，媽媽應承咗~下次一定帶埋佢去！
於是，舊年復活節短遊青青世界..
然後忙搬屋，忙裝修，忙搬屋...
終於可以停落嚟，又再計劃下一次嘅遊程！呢次~又係復活節，恐龍仔坐飛機喇！

恐龍媽一路認為，小朋友太細，出外改變哂生活習慣，真係大人細路都辛苦！基於牛牛仲係未係點食街外嘢，又要午睡，所以，考慮過之後，都係唔帶牛牛去喇！

呢個係我地嘅行程:

第一日，午後落機，包車去墾丁，去民宿放低行李，就去農場/大街/沙灘行吓，响大街晚飯，行返民宿 (應該唔太近架！)
第二日，包車墾丁一日遊，會去玩半潛艇，食海鮮，燈塔，恆春，晚飯後出火！
第三日，轉去yoho kids hotel，去海生館玩
第四日，留响酒店玩，約4點前出發去高雄，入住六合夜市附近民宿
第五日，糖廠遊 (或者去旗津)，玩半日，黃昏時間回程

呢個行程同以往嘅自由行最大嘅不同係... 幾乎唔駛計劃交通！因為墾丁嘅公共交通好少，以包車為主，我地唔係包車就係留响一個地方玩大半日，所以交通較簡單！
希望恐龍仔鍾意啦！